背景：Tracy 係我嘅好朋友，印象中係我認識嘅人入面由讀書到而家一直堅持戲劇夢嘅只有佢，好想比大家了解下佢既戲劇夢 
P.S. TWGSS 同學仔其實你地好好彩呢
1. 你係幾時發現你對話劇有興趣呢?
小五嘅時候因為學校活動老師揀左我做話劇，我仲記得我扮演瘋狂博士，個次我覺得好開心同埋好玩。
中學時期屬於比較少接觸戲劇既階段，直至中六轉校參加戲劇學會籌備校際戲劇，仲做埋戲劇學會主席，帶住低年級同學。
大學時期係黃金時期，參加左劇社，每年兩個製作，畢業前已經有六次製作，除左演員，甚至試做導演。大學二年級我更有機會參與外面劇團演出，我發現自己越來越鍾意話劇，我覺得話劇好吸引，亦覺得自己有天份。畢業後，我唔想業餘咁做話劇，想更加專業，所以就再讀有關戲劇既課程。
2. 成長過程有無試過遇到事令你挫敗/氣餒?
主要係媽咪吧，佢會擔心我嘅前途同埋我搵錢嘅能力，但我同媽咪講我唔想勉強自己做啲唔鍾意嘅嘢，我真係鍾意戲劇。
3. 咁係咩令你有動力堅持?
小學嘅經驗令我觀察到自己有天份，成長過程有人欣賞我做呢件事令我好有成功感，所以最後我放棄工作全職修讀戲劇課程。
4. 有無試過好迷失?
有！等機會嘅時候。
課程畢業後我嘗試搵其他演出機會，但等待嘅過程令人迷失，但期間我亦有試下其他工作，除左教話劇，我嘗試 Art admin 的工作，希望認識如何營運一個劇團，之後亦有機會教小朋友話劇班。
5. 咁講下小藝谷丫，點解教嘅對象會定位係小朋友嘅話劇呢？
可能因為我鍾意做老師既角色，而我之前有教過小朋友嘅經驗，所以教佢地有成就感。之前教個間中心執左後有諗過頂嚟做的，後來有個 moment 同媽咪傾，又得到佢支持，就創立左小藝谷。
6. 創立小藝谷兩年，最有滿足感係咩？
參與我地課程嘅每一個小朋友都會有演出機會，除左唱歌跳舞，仲會有自己嘅角色同對白，雖然要準備一個演出好難，亦要準備好多嘢，但我同團隊都堅持做到呢個目標，而小朋友同家長亦好鍾意。當見到小朋友完成到挑戰，我都好滿足。
另外，有啲小朋友好勤力，屋企會 send 佢地練習嘅片段俾我睇，我見到佢地好多都好享受，同埋我感受到個份熱情，令我繼續有動力教好小朋友。
7. 你心目中嚟緊有無咩計劃？
我希望除左小藝谷嘅課程，仲有機會籌備大型嘅兒童歌舞劇，從而向外面其他家長同小朋友推廣戲劇教育。
8. 有無咩同其他追夢者分享?
知識係重要的，可以豐富自身，但搵到自己鍾意嘅事同樣重要。而家搵唔到唔緊要，你要咩都試下，慢慢摸索咁先知自己鍾意咩。
好似我咁，因為我係學校做過教學助理，我知道自己享受同學生既互動。不過，係呢份工作以外，我更想實踐做一個專業演員嘅夢。
9. 最後，有無咩想同家長講?
家長要信任自己嘅小朋友，要放手俾佢地試多啲唔同嘅嘢。有部份家長會擔心小朋友係台上既表現，但其實享受過程同樣重要，可能家長同小朋友係過程中會得到意想不到的收穫。我希望小朋友係舞台上獲得成功感，從而建立自信。
後記: 訪問當日再次去小藝谷，每次入去都覺得個環境令人好開心，牆身貼滿學生的相，門口亦掛住好多小朋友演出嘅相，呢到有好多好多 Tracy 同小朋友嘅回憶
希望 Tracy 可以保持呢份熱心，係戲劇教育同推廣繼續努力
有故事的人 Story Teller | Kenry Lee 