前言: 周 sir 係我係華英第一個合作嘅班主任拍擋，好多時係 fb 都見到佢帶隊/集訓嘅相，同時亦覺得周 sir 對排球有一份熱情，所以希望訪問周 sir 嘅排球故事
“I’m proud to be a volley-baller” 係傾計當日周 sir 件衫寫住嘅 quote
1. 你係幾時開始接觸排球嘅呢?
小學嘅時候其實我係打乒乓波的，中一開始先接觸排球，係體育老師嘅影響下我加入左排球隊
2. 點解排球咁吸引你?
主要受體育老師影響，我中學排球風氣亦好強，所以有多啲機會接觸排球，而當我係好多比賽中贏到，自然建立到成功感
除左自己打，開始教書之後，更加有機會參與教練嘅工作，例如我自己隊波「龍隊」同香港青年隊
3. 點解你會想成為一個體育老師?
主要都係受以前嘅體育老師影響，所以想行同一條路，而係教院讀 PE 期間，我發現自己對運動科學有興趣，所以之後再 part time 讀 degree
4. 你做體育老師嘅願景係?
我當然希望同學可以發展對運動嘅興趣，同埋我希望運動普及化，唔好只係精英先參與，最理想當然每個人都有一個 life long sports
有時候舊生令我開心的，因為有啲舊生畢業後開始 pick up 運動，例如參加馬拉松，呢樣係我好希望見到的
5. 你覺得參與運動同讀書有無衝突?
係我接觸嘅學生我覺得呢個想法唔普遍，反而有部分家長同老師會有咁嘅想法，但已經比以前少左，可能係因為佢地意識到同學唔讀書唔係因為掛住做運動，而係打機
其實好多同學都能夠係運動同讀書取得平衡，而我地學校嘅運動員入大學比率係唔錯的
6. 有咩係令你覺得做體育老師/教練好難忘?
見到同學鍾意運動，鍾意排球係開心的。另外，見到同學係隊之間嘅良好關係亦令我好有滿足感。之前我覺得同學畢業後無再打波好可惜，所以就組織左校友隊，希望可以延續呢份熱情
我亦希望我地體育堂除左一般運動外，仲可以試下其他嘢，例如前兩年我地特意安排中六同學去 Bounce 跳彈床，希望可以減減讀書壓力，見到同學好享受我地安排嘅活動係有滿足感的
7. 你點樣評價香港嘅運動風氣?
我覺得香港嘅運動風氣改善緊，尤其學界，有好多機構或有心人士都貢獻左好多，多左資源例如可以拍片宣傳下，學界籃球係一個做得好好嘅例子，有好多 sponsor 比到多啲資源，學界排球都開始朝呢個方向發展
其實而家多左活動種類/令人分心嘅事物下少左人打波，所以教練有一個好重要嘅角色去團結隊友。海南島就係一個近年排球由好厲害跌得好緊要嘅地方，因為啲人掛住搵錢
8. 我見近年你積極推廣排球隊嘅海外交流，點解你會想做呢樣嘢？
我知道唔係每個打排球嘅同學都入到港隊，但我想同學有機會擴闊眼光，藉此提升球技。第一年我係本港搞排球營見到有好嘅果效，例如訓練同學嘅自理能力，希望同學除左學打波，都學做人，當我係「國際教練班」認識其他地方教練之後就想籌辦海外訓練，係學校嘅支持下我籌辦左第一次係泰國嘅集訓。
我希望同學係唔同嘅海外集訓都會學到球技以外嘅嘢，例如我地去台灣個次遇上颱風我地都要立刻應變，去日本個次太太叫同學仔準備左一段片俾我，叫佢地要懂得感恩，我都成日同同學仔講有好多人幫緊大家，例如校友請假陪大家去集訓，又請大家食飯，我希望同學將來有機會都要幫返人。
係好多集訓入面，大家一齊經歷，建立左感情，我亦同家長建構左互信，當然仲有學校同校友嘅支持
我就當然期望同學集訓會更叻，但實際效果其實只有參加者先感受到
9. 你嚟緊係排球方面有無咩目標？
我希望成立左嘅社區體育會可以幫到更多人，尤其係幫助低收入家庭參與運動，就算條件差啲都唔影響
10. 有無咩鼓勵說話想同同學分享?
我覺得而家排球隊嘅表現比較內斂，有時候太謙虛，唔係話我地要囂張，但當我地比賽要發力嘅時候咁樣唔夠，我希望同學可以發揮得好啲，希望練習有 100% ，發揮都要接近 100%。
希望同學除左打波進步之餘，另外都要培養做人嘅態度同「情」。希望同學可以 expressive 啲，唔係網上就好 expressive 但去到現實就好靜。
有故事的人 Story Teller | Kenry Lee 