前言: 相信我嘅高年級地理班一定有聽過 Jackie 呢個名 / 甚至見過佢真人。Jackie 係我中學師兄，畢業後我專注地理，佢專注地質，所以好多時我都會係堂上提及佢。除左地質研究，最深刻係每次見面他都會做左啲我覺得好佩服嘅事。南極、非洲、北韓、仲有好多地方都有佢嘅足跡。I’m always proud of having Jackie as my friend
1. 你係幾時開始接觸地質同埋點樣朝呢個方向發展呢?
讀中學嘅時候已經覺得大自然好神奇，同埋覺得地球有四十六億年歷史有好多嘢可以讀，仲有好多考察可以去，所以大學就揀左地球科學。
當時其實無諗太多將來嘅事，除左地質，我一直都覺得海洋充滿神秘感，尤其係從科學角度嘅研究，所以我之後再報讀英國海洋地質科學嘅碩士。當時我係唯一一個國際生，而我亦深深感受到英國重視同強調自然科學。
由於我讀個科冷門，相關人士唔多，競爭細，當我返到香港已經立刻有中國公司請我，我就開始左地質有關嘅工作。
2. 你有無做咩去裝備自己呢?
與其話裝備，其實我覺得只係做自己鍾意做嘅嘢，當你多鑽研，你自然會對個方面精啲。反而我覺得我嘅性格令我比較適合呢科，我熱愛大自然，喜歡戶外活動，同埋我有強烈嘅好奇心。
3. 你覺得地理同地質嘅唔同係?
我本來覺得無咩唔同的，但讀完就覺得好唔同。我覺得地理有涉及人類活動，例如人類對於環境嘅影響，地質感覺探險成分多啲，真係同個 wild 有好密切關係，因為我地係要搵最原始嘅物質，例如礦物。
4. 你而家係香港從事地質研究同教育，有無遇到咩困難呢?
我觀察到對於地質有興趣嘅人其實唔少，但香港政府唔夠重視。同埋 Geog 同學係中學有接觸，要考試，重視程度會高啲，相反地質我感覺大家投入程度少啲。但如果我將地質嘅內容同地理公開試扯上關係，大家又會好專心聽。
(聽到呢到大家知道我地 exam oriented嘅 教育制度幾失敗)
5. 你係地質研究同教育方面有咩目標？
我希望多啲人認識地球、地質、同埋多留意資源保育，例如我地嘅礦產。香港係一個無咩資源嘅地方，所以我地相對意識較低，但作為一個發達嘅城市我地其實耗用好多資源，所以我希望大家懂得珍惜大自然嘅資源。
6. 我認識嘅你係一個好 adventurous 嘅人，你係幾時發現自己鍾意呢個模式嘅呢?
其實中學已經開始係咁，當時我成日同朋友行啲少人行嘅山。當大個啲，發現唔容易搵到其他人一齊出發就開始自己一個出發，我覺得我都幾鍾意呢種感覺，自此我就越去越多，越去越遠。一個人外出嘅感覺同有伴唔同，最明顯係你會有多啲機會同時間同當地人交流。
7. 係你心目中暫時最難忘嘅旅程係?
如果講人，南極嘅旅程係其中一個。我要係南極紮營，亦係過程認識到世界各地嘅代表，由於大家背景唔同，國家唔同，令到南極資源保育嘅討論好 fruitful。
至於地方呢，最令我難以忘記係非洲。好多人都話呢個地方有魔力，我自己覺得呢片土地好有靈魂，雖然已經去過但我仍然想返去，每次都會好感動。
而最特別嘅體驗係攀上非洲最高嘅山。當時我有嚴重嘅高山反應，我其實好辛苦，個 guide 亦叫我唔好繼續，但我無諗過放棄，覺得自己會後悔，上到山頂個下我喊左出來，覺得好無憾!
個次我去非洲亦戶外紮營四十日，由東非去到西非，我覺得如果我再去，體驗都會唔同，因為每次嘅人都唔同。
8. 咁你去左咁多地方，認識左唔同人，對於「人」嘅體會有無唔同呢?
有啊，我對於人嘅睇法唔同左。記得好早期我去俄羅斯嘅時候人地提供住宿同願意接載我，當時我係好猶豫，亦會諗啲人係咪有其他目的，但後來我覺得係我諗太多，人地係熱情好客想招待訪客。
去左咁多地方，我發現城市係最危險嘅地方，越城市化嘅地方越難搵到人與人之間嘅呢份熱情，因為城市入面所有嘢都用錢嚟衡量，所以落後村落會好啲，例如我剛去完東帝汶，當我問當地人可唔可以係屋外空地紮營，人地招待我入屋，仲煮埋嘢比我食，所以我會話城市化令呢樣人與人之間咁珍貴嘅特質無左。香港其實好多人都熱情，但係咁繁華嘅地方你咁樣做好唔符合主流，人地會覺得你好傻。
9. 係你咁多旅程入面最驚險係? 有無 discourage 你呢?
(礙於可能帶來麻煩，所以個地方名唔公開)
有的，係我最危險排行榜嘅頭三，個次因為人為因素有威脅性命安全，所以得到嘅結論係：城市可以好危險，我亦警惕自己日後去城市地方要加倍小心。
10. 你覺得你會 keep 住呢個咁 adventurous 嘅 pattern 嘛?
我自己當然想，但真係講唔埋，因為唔知將來有咩事發生，可能屋企情況有變，或者我心態上有改變都可能有影響呢個模式。
11. 有無咩鼓勵說話想同 take adventure 嘅人分享?
如果有樣嘢你想試的話，去試左先。你可以問下自己做左後悔定唔做後悔啲，咁你可能有答案，因為如果你不斷諗「我做左會點」其實有好多好多可能性，咁點解唔試下?
我覺得凡事跟自己興趣，因為我相信業精於勤。
最後呢，我個人係比較 spontaneous ，我幾鍾意自己咁，但唔等於個個都要咁，唔係 adventure 就要自己一個人咩都唔理咁行動，其實搵自己舒服嘅方式更重要。
有興趣了解 Jackie 嘅 adventure 可 like 佢嘅 Facebook page “朱晉德 Jackie Chu 的地質世界”
有故事的人 Story Teller | Kenry Lee 