前言: 熟悉我嘅人都知道我同黑妹係街到相遇，相處左一年先帶佢返屋企，帶返屋企前，黑妹唔完全屬於流浪貓，每日就算打風落雨都會有人定時餵個到嘅貓，如果受傷/病會好好照顧佢地，其中一位幕後照顧黑妹嘅人就係 May 姐，佢亦係個區流浪貓嘅其中一個負責人，所以想訪問一下呢位幕後英雄嘅故事。
1. 你幾時開始餵流浪貓嘅呢?
我 2004 年開始餵流浪貓，當時沙士過後我無再做嘢。有一日行街見到一個人餵緊貓，覺得兩個人行同一條路會好過一個人，所以就決定開始加入餵流浪貓行列。
2. 距離你一開始餵貓都有 13/4 年，你覺得以前同而家餵貓有無咩唔同？
好大唔同呀！最初我以為只係餵貓，但其實我地仲會照顧有病嘅貓咪，同埋會盡力去搵人領養佢地。而家就好似企業化左有好多分公司，大家會有唔同負責嘅區域，我以前以為只係負責一個地方，而家都越做越多。
3. 係啲咩推動你一年 365 日都會去餵貓呢？
我觀察呢貓咪每日都好定時係一個地方等你，當你唔出現佢地可能會好失望。呢個就好似一個承諾咁，佢哋都有感受，不過當然要量力而為啦!
如果我病左我會搵人幫我餵我負責個啲地方。
同埋有時有啲貓要「特別服侍」，例如有啲貓只食鮮魚唔食罐頭，又或者好怕其他人要我餵先食，可能得我先記得佢地嘅喜好。
4. 餵貓咁耐有無咩特別嘅故事呢?
最近有兩隻貓都令我好心痛，好唔開心的。呢兩隻貓我地啲貓義工都以為係有 bb，仲滿心期待，但當去照超聲波嘅時候先發現原來係「假懷孕」，係貓咪性病嘅一種，最後要做手術先好返，費用更加係絕育手術嘅兩三倍。
5. 咁當你遇到傷心事，你點處理自己嘅情緒?
我身邊太多貓要照顧啦，無時間停留係悲傷。如果我真係好傷心我會喊，同埋會同身邊人分享。
6. 餵流浪貓令你最有滿足感係咩?
每晚當我見到佢地齊齊整整我就好滿足，佢哋全部都有名，有時如果搵唔到我會唔開心或者失望。
有時候啲貓見到你，你都未叫佢，佢已經跟住你。
7. 你通常改名有無咩原則?
通常都係顏色先，例如黑妹，黃色通常有個旺字，之後就係花紋，例如「黑白」，「白黑」，「白白黑」，大家可以估下佢地身上白同黑嘅分佈。
8. 你最後有無咩想同想養貓/養緊貓嘅朋友分享？
街貓其實只要你好好照顧都可以好靚，但當你係街見到又唔熟悉就唔好亂掂。
養貓呢，唔好覺得得意就養，係要使錢，同埋係一生一世嘅! 同埋最好唔好係寵物店買啦，因為有好多無良繁殖場，你係寵物店見到好得意嘅背後其實可以好慘，啲無良商人將動物嘅痛苦用來賺錢。
後記: 訪問當日係 May 姐屋企進行，第一次去見到 May 姐間左一間房做「貓房」已經覺得好誇張，佢自己都有養緊 15 隻貓，間房有塊大玻璃可以見到曬所有貓嘅一舉一動。May 姐當日一路拆緊鮮魚肉，將魚同骨分開，May 姐話「我自己嘅貓只會食骨，魚肉全部留比外面嘅貓，因為流浪貓今日唔知聽日事」。
P.S. 為免為 May 姐帶來不必要嘅麻煩，所以唔將佢嘅樣貌公開
有故事的人 Story Teller | Kenry Lee 