前言: 認識恩師已經13 年了，由中五補習、高考補習、大學協助恩師準備題目、開始教書後恩師總係我有需要嘅時候助我一把。難得恩師返來香港，我嘗試為大家揭開「補習名師」嘅神秘面紗，究竟呢位咁多人補嘅老師嘅故事係點嘅呢?
1. 你可以講下你工作嘅背景嘛?
我係日校教左 25 年，其中 15 年係副校長，期間有寫地理科參考書同兼職做補習，直至 1995 年轉做全職補習老師，一路係現代工作至 2014，教左 44 年。
2. 我記得你講過當時開始做補習係因為呀仔嘅同學?
係呀。當時我個仔嘅同學話某間補習社無地理科，問點解當時已經寫左好多參考書嘅我唔做補習，後來呢間補習社就問出版社拎我嘅聯絡方法。
一開始我係兼職形式的，以為係教夜校成人地理班，之後先知係教會考班。由於要兼顧日校副校長繁忙嘅工作，我覺得留作日校備課嘅時間好少，所以最後請辭全職做補習。
3. 咁當時有無打算放棄補習嘅工作?
我覺得我鍾意教書多過行政管理，收入亦係一個好重要嘅考慮。我當時希望快啲搵多啲錢就可以退休去加拿大搵呀仔，1995 年嘅時候我兼職做補習收入已經係日校收入嘅三倍。
(聽到個下我好 shocked)
4. 你日校，補習社都教過，你自己有無話鍾意邊種教學模式多啲呢?
我覺得兩種教學各有不同。日校注重同學嘅全人發展，而補習社就只需著重成績。但我認為補習社點都只係一個 supplement，你日校如果完全唔聽其實你補習係無用的。
5. 以前我好印象深刻你每年都會更新你嘅筆記，唔會同一份筆記用兩年，係咩令你有動力可以保持住年年咁做呢？
大概係以前寫參考書令我養成呢個習慣。以前我寫參考書總係見到有錯就會立刻更新，成日都想做好啲，所以就連補習筆記都套用左呢個習慣。我對自己高要求，亦自覺責任重大，所以期望我嘅筆記個個 moment 係最好嘅。
6. 你覺唔覺得以前你有「補習名師」嘅光環?
我知道人地覺得我呢個職業好特別，所有名都係人地封嘅，但我自己就覺得無咩特別，唯獨係我覺得自己都係一個公眾人物，會多留意自己嘅言行。
K: 有無咩特別事發生過呢?
試過係街見到學生，佢即刻同家長介紹我，仲影相同向我道謝，另外亦有 video class 嘅同學係街會上前同我講佢係我學生。
7. 講起 live class， video class，你會唔會講下一啲補習界嘅生態呢?
以我個人為例，我以前高峰係一個星期 18-20 堂 live class，但當 video class 盛行後，我就得返 4-6 堂 live。我初初好抗拒 video class，因為我想接觸多啲學生，但後來發現會有唔同班進度不一嘅情況，加上體力無以前咁好，後來試過加左 live class 都仲係有同學報唔到名我就試下 video class。我最高峰係一個禮拜 150 班video class。Video 我會返屋企睇一次，睇下有無嘢口快講錯左，好處係如果我有嘢講錯我可以下次講一次全部班一齊改返。
8. 我聽聞補習界其中一個生態係日夜顛倒，係咪真嘅呢?
我自己係的，我亦知道好多老師都係咁，我可能一個星期有 2-3 晚會做到好夜，我好享受深夜嘅寧靜無人打擾，我可以集中做好我想做嘅事情。
9. 識左你咁耐，都無問過你係地理科嘅教學理念，可唔可以分享下?
我覺得以前 A-Level 課程真係一個好好嘅課程，俾同學有好多嘅接觸，認識到世界唔同嘅地方、人同事，我希望係我嘅教學中同學會多了解自己身處嘅地球，知道多啲人係地球嘅角色，認知人同唔同事物之前嘅關聯，同埋知道所有嘢回歸原始其實都係同我地四個 spheres 有關 (Atmosphere, Hydrosphere, Lithosphere, Biosphere)。
10. 咁而家你離開左教育界，有無好唔捨得?
我回想返，我上完最後一堂 A Level 比起最後一堂 DSE 更唔捨得，可能A Level 個課程我教得耐好多，我最怕都係當我唔教書我嘅知識會流失。
11. 我記得你以前筆記成日都會有呢句 “Whatever you do, try to love it”，唔知你今日會唔會想用呢句勉勵一下睇到呢篇訪問嘅人呢?
會呀
我覺得有機會選擇當然好，但若然你無得選擇嘅時候，你應該要嘗試調節自己嘅想法，係面對嘅事中搵到個份 passion，當你成日都會調節想法，我地生命就會少啲厭惡，你唔會覺得做咩都好似無意義咁。
後記: Miss Lau 當日回顧返自己嘅教育生涯仍然好熱情好開心，係呢段傾談中好濃縮咁重溫一次。好記得當年年少無知嘅我問過她「你同 Samuel Chan 唔係對手嗎? (Samuel Chan 為現代教育另一補習天王)，她答我「我地兩個風格唔一樣，學生只要根據自己喜好，選一個合適嘅補習老師就可以了，我同他都係想為學生好」，個次對話令我知道唔係所有補習名師都只為錢，只顧贏人地。感恩自己有機會遇到呢位恩師，一路上幫左我好多，俾左好多機會我，等我可以係佢身上學到咁多嘢。
祝恩師身體健康，退休生活愉快。
有故事的人 Story Teller | Kenry Lee 