前言: Jamie (右)係我以前係華英嘅學生，佢中四嘅時候當我知道佢係粵劇演員我有啲驚訝的，因為感覺好少年輕人做呢件事，而 Jamie 亦應該係我第一個認識嘅學生做呢樣嘢。最近係 Facebk 再見到佢做粵劇嘅相，決定訪問下佢嘅粵劇夢，係我邀請佢嘅時候，佢向我介紹埋佢嘅小學同學兼拍檔，Karin (左)。
1. 你地係幾時開始接觸粵劇?
Ka: 我記得讀幼稚園嘅時候屋企有隻帝女花嘅 VCD，其實我唔明內容但唔知點解當時我會成日睇，升上小學後有粵劇嘅興趣班，升小四個年我同屋企講我想學粵劇，就係咁開始左我嘅粵劇路。
J: 我嫲嫲係業餘粵劇演員，但真正開始接觸係因為小四個年我呀爸叫我搵啲嘢學，學之前其實我對呢樣嘢無咩特別感覺，但試左之後又發現幾鍾意，小五個年我就參加左學校個粵劇班。
2. 你地學習粵劇嘅動力係咩呢?
Ka: 一開始係因為我有朋友同我一齊學，而且團入面有師姐，所以會想一齊學。做耐左我就發現我可以借助粵劇去了解唔同角色嘅故事，又會想像一下呢個角色係個點樣嘅人，而且每次我都學緊新嘢，包括唔同花同埋服裝。
J: 我覺得我細個跳舞嘅底子有幫助到我，所以一開始我覺得都幾容易跟，但細個嘅動力主要都係可以同朋友一齊玩。
3. 粵劇呢樣活動有無影響你地讀書嘅時間呢?
Ka: 平日返學其實每個禮拜我地只排練一次，暑假嘅時候我地會排得多啲，因為通常暑假過後就會有演出。在我而言反而係因為將時間放左去排練所以我會同自己講讀書嘅時候要更集中。
J: 老實講我自己排粵劇重要啲，尤其係中五嘅時候其實讀書方面有啲迷失，令我投放更多時間係粵劇，亦令我個人開心返啲。我覺得有時候讀書好似付出左好多但無回報，但粵劇我付出左見到回報。
4. 1-10 分 （10 分係十分普及)，你地覺得香港青年人認識同參與粵劇有幾普及呢?
Ka: 4 分啦，其實小學音樂書係有提及關於粵劇嘅知識，大家都會有基本認知，同埋好似歡樂滿東華呢類節目大家都會知粵劇大概係咩一回事，只係大家比較少深究，普遍人可能唔抗拒但無再有更深認識。
J: 我覺得 5 分，其實都有啲人鍾意，不過無咩人真係係呢個 industry 入面。
Ka: 我覺得有一樣比較差嘅係，家長灌輸俾小朋友嘅印象粵劇就係「悶」、「老套」、「嘈」。
5. 咁如果要妳地幫粵劇平反，妳地會用咩形容詞去描述粵劇呢?
Ka: (笑) 我覺得係變化多端，其實粵劇同劇集一樣劇情好多變化。我覺得啲人覺得粵劇老套係因為觀眾大多係老人家同埋因為啲故事係古代故事所以啲人覺得情節老套。其實如果識欣賞你會留意到粵劇有四大元素，唱、做、唸、打，唔係咁簡單的。
我覺得係變化多端，其實粵劇同劇集一樣劇情好多變化。
J: 我會話粵劇其實內涵豐富，而且你可以欣賞劇中嘅曲詞。
6. 你覺得你係香港暫時行呢條粵劇路遇到咩困難?
Ka: 我覺得個困難可以分做個人層面同環境層面。
Ka: 個人來講我其實比較懶去練習，有時遇到啲角色亦唔知點掌握。而且我觀察到係劇團嘅成員開始大個，大家嘅目標唔同，其實好多人已經離開左個團，呢樣嘢有時候都會動搖我繼唔繼續留係到嘅決心。
J: 我自己基本功比較好嘅，所以一開始演武打戲無咩難度，一開始轉演文戲其實好大壓力，不過而家好啲了。我估個人嘅難處係屋企都會想我讀一個大學學位，然後先再放時間係粵劇，但其實我想去演藝讀粵劇的。
Ka: 環境方面，其實我地個圈子好細，無乜人係全職咁演出。政府雖然而家會投放多啲資源，例如有青苗粵劇團，但另一個問題係我地無一啲年輕啲嘅觀眾。
J: 其實我地個圈子都似娛樂圈，好講人際關係同際遇，當你好現實考慮到生計，而你唔係日日有演出的話，其實真係好難全職咁做。而且我地嘅物資其實好貴，你見啲人揈水髮，其實要過萬蚊。
7. 相比起其他地方，粵劇演出係咪都面對同樣問題呢?
J: 其實都有類似問題，不過例如內地咁，人地有粵劇學校，訓練出來嘅專才畢業後就會多啲機會投身唔同劇團。
Ka: 至於台灣呢，其實人地係唔止粵劇，仲有其他種類例如京劇，人地做到百花齊放，而台灣人對唔同團或劇嘅認知程度亦相對高啲。
8. 妳地演出左咁多次，有無咩難忘事可以分享呢?
Ka: 我有試過有一次服裝錯左但我唔知。個次我要係好短時間之內由 A 角色嘅服裝換做 B 角色嘅服裝，但我唔記得換條褲。
J: 我有一次差啲俾對手吉到眼，但我仍然繼續演出。
K: 如果真係整到你咁點算?
J: 我覺得我點都會完成個演出先。
Ka: 有一次我上左台突然唔記得對白，我憑記憶自己作左啲對白，同埋偷望下提示屏幕。
J: 所以其實我地上到台都好考我地臨場反應的。
9. 妳地有無係呢條路上定立咩目標?
Ka: 我而家讀緊電影研究，我亦知道我將來會想走電影製作嘅路，所以可能會好忙，會少左時間排練，但我起碼會做觀眾繼續支持粵劇，同埋個重心就會係幫一啲參與粵劇嘅年輕人 / 小朋友，好似我而家都會繼續幫小學嘅粵劇團咁。
K: 你有無諗過拍一套同粵劇有關嘅電影呢?
Ka: 要睇下有無呢個機會，因為拍粵劇嘅電影需要唔少錢同人力物力。
J: 其實我都無特別去諗自己係粵劇條路係點，但我希望我可以保持住呢顆熱心，仍然可以好投入參與粵劇演出。
有故事的人 Story Teller | Kenry Lee 