正職與興趣之平衡
前言: 幾年前係 Facebook 上見到有個 page 啲相好靚於是開始留意 Dominic 嘅作品，最深刻係佢係玻利維亞拍攝嘅星球大戰相片，後來從 Dominic instagram 得知他舉辦第一次相展，係日本之旅回港後立刻去男拔萃參觀，參觀後決定膽粗粗inbox 邀請 Dominic 做我嘅 story teller，好榮幸他答應我嘅邀請
1. 我係你嘅文字作品見到你好重視屋企人，唔知你成長環境 (屋企或者學校) 有無影響到你而家咁 adventurous 呢?
由於我父母忙返工同要照顧呀哥，我細個嘅時候係跟太嫲同嫲嫲住係中文大學的，以前嘅我成日係湯宿外面個草地到玩，令我對於自己一個人好自在。同時我太嫲係一個好叻好哲學嘅人，佢係我細個嘅時候已經灌輸左「地球好值得你去睇」嘅訊息俾我。
我嘅中學文化同同學對我都好有影響的。我嘅中學同學好多都好醒目，好叻，好有獨立思考，亦好知道自己想做咩，所以都有影響到我的。另外由於身邊太多勁人，有時會俾人笑下，所以我好多時都唔怕瘀，個人會夠膽試多啲唔同嘅嘢。我母校嘅文化係比較自由嘅，基本上學校好支持我地做想做嘅嘢，所以學校可以話放左粒種子係我到。
講起母校，我覺得今次嘅相展好有返屋企嘅感覺，而我亦好榮幸有呢個機會，要多謝學校嘅Art committee 俾呢個機會我。
至於點解我會開始影相呢，其實我大學畢業先真正開始接觸數碼相機，因為試過有一次去旅行 capture 唔到個 moment 我覺得好可惜，所以我大學畢業後份工第一次出糧買左部數碼相機。
2. 你嘅相展主題係 Self discovery，你覺得咁多次旅程入面你感受最深係咩?
我會話係「共存 co-exist」呢個概念。我地要學識同唔同價值觀嘅人共存，但香港社會無咩空間俾我地去諗呢樣嘢，我自己生活都未搞掂仲講咩共存？但世界好多地方係人與人共存到，更甚係人同大自然嘅共存。
K: 咁你去嘅地方你覺得邊個地方嘅共存做得最好?
Tasmania! 去到你真係融入大自然，當我去觀鯨同見到海豚跳躍嘅個刻真係覺得好震撼，當時我亦希望我太嫲可以係到同我一齊見證呢個時刻。
3. 你下一個想去影相嘅目標係邊呢?
我想去非洲睇動物大遷徙。
4. 你已經舉辦左相展同出左書，有無啲咩係你係攝影仲想 achieve 嘅呢?
講真呢兩樣嘢一次過做左我嘅慾望真係低左好多，不過我有一個 dream 嘅，就係上宇宙，由太空影返落來又好，或者單純等我係大氣層外望返地球。我本身好鍾意黑夜中影相，我想睇下被黑夜包圍呢個藍色嘅星球係點嘅。
5. 你本身有一份正職，但又同時可以追隨自己興趣，你覺得你係點平衡呢兩樣嘢? 你覺得自己呢個平衡維持得好唔好?
我覺得自己平衡得幾好的。我係興趣行先，希望份工可以配合到我嘅興趣，所以我就要諗點樣有效率啲去搵錢，同埋我可能就會諗其他方法例如請人幫手。我好 value 呢個自由，所以有時唯有比較煩嘅唔做，我亦同自己講有啲錢唔到我賺。我大學嘅背景係幫左我好多嘅，亦令我搵到呢份正職，我好享受而家嘅生活，亦唔會羨慕其他比我更好嘅人。
K: 咁當中你有無遇過咩 frustration 呢?
我都會擔心份工嘅 stability 同埋有時會覺得自己影相好似無咩進步，但當你好清楚自己想做咩你會克服到。我覺得有一樣嘢我比較叻係去 prioritise 我要做嘅嘢，當我認定左呢樣嘢係重要我會努力去做好，亦因為咁我克服到我嘅 frustration。
6. 你有無咩說話想同讀者分享?
其實有人會話我有選擇先可以過到咁樣嘅生活，但我都有正職的，雖然我話我興趣行先，我堅持要先處理好我嘅工作、屋企嘢先追隨興趣，當然有啲人可能會咩都唔理咁去追隨興趣，但我會覺得我咁樣係負責任啲，freedom has a cost。
同埋有啲人係鍾意批評其他人，但我會覺得與其將時間話人，不如諗下係人地身上有無咩值得你去學習再改善？唔好只係停留係一點，同埋只顧羨慕人地嘅好。
最後我想分享係有啲人覺得興趣一定要做啲好特別嘅嘢，但其實做平凡事唔係問題，最緊要係呢樣嘢係咪你自己想做嘅嘢。
後記: Dominic 係本地故事中我第一個事前完全唔認識嘅受訪者，係 Starbucks 一路期待他出現，到大家分享各自嘅故事，當 Dominic 提到一啲人地嘅批評時其實我都身同感受的，希望 Dominic 可以繼續平衡工作同追夢，再影多啲靚相。
有興趣嘅朋友可以 Facebook search Dominic Chiu Photography 留意 Dominic 嘅作品。
錯過左相展嘅朋友仲有機會，Dominic 最近嘅著作《幻旅X魅影》已經係書局有售
有故事的人 Story Teller | Kenry Lee 