前言: 最近一次的台灣之旅除了小房和伯廷，其實我仲係台中偶遇剛移民到台灣的香港人 E (由於 E 不想公開身份，所以採用化名)，E 係一名中年女士，最近同老公同埋呀仔用投資移民嘅方式搬到台灣，我決定了解多啲 E 嘅故事。
1. 你同先生移民左去台灣幾耐?
我同先生搬左過來大概半年左右，係決定搬之前用左兩年時間計劃。
2. 點解你地會移民同埋點解會選擇台灣嘅?
我先生覺得香港嘅政治局面有啲混亂，覺得呢到感覺自由啲。
尤其係當係電視見到警察發放催淚彈，我先生就決定要移民。
其實我地都有同呢邊嘅香港人傾過，其實佢地都係政治原因選擇移民。
至於點解選擇台灣，主要係近香港，同埋啲嘢食啱我地。
3. 咁決定移民之前有無話好大掙扎呢?
當然啦，而首要諗嘅係香港嘅屋企人。
K: 有無話擔心無曬係香港建立嘅嘢呢?
由於設計嘅性質比較有彈性，基本上有網絡我就做到野，所以我都唔太擔心。
4. 如果 1-5 分，你覺得你有幾適應台灣嘅環境呢?
3 吧。已經適應左嘅係食個方面，因為有好多選擇同好平。住方面而家地方大左，加上我係屋企繼續香港嘅工作，所以都無咩問題。
未習慣嘅當然係語言，我本身國語唔係話好叻，另外唔習慣而家街上咁多電單車吧。仲有一樣係呢到嘅娛樂無香港咁多。
5. 你覺得移民後有無話同你預期中差好遠?
係除左語言嘅問題之外，其實都差唔多。
6. 搬左去台灣後，你最鍾意台灣嘅咩呢?
可能我係台中嘅關係，我覺得呢到嘅人壓力細啲，感覺有禮貌啲。呢邊公園多過香港，以居住環境來講其實好過香港。仲有一樣係我來到先發現的，就係呢邊電視台多好多選擇。
7. 咁過左來台灣之後有無咩係你擔心嘅呢?
最擔心係天災，因為驚唔識反應。同埋呢邊係有機會要制水的，例如前排台灣一路無落雨，其實唔夠水用的。
我覺得交通方面都係我要啲時間適應，因為真係太多電單車，同埋呢邊好多時有咩事都係電單車一方著數啲。
另外我觀察到呢邊投訴文化好嚴重，例如好多餐廳因為被附近居民投訴所以唔可以炒嘢。(聽到呢句我下左出聲)
最後當然都會擔心台灣同中國嘅政治關係。
8. 你覺得自己會唔會一直留係台灣?
我自己係 ok 的，但都要睇埋之後嘅政治關係點發展。
9. 你有無咩想同考慮移民去台灣嘅香港人分享?
我來到台灣觀察到幾樣嘢。第一，如果你打算移民後開餐館可能要再三思，因為呢邊飲食業好辛苦，亦好似唔知前景係點咁。同埋頭先都提過，呢邊娛樂少啲，夜晚係悶啲的。
當然好明顯係香港搵嘅錢會多啲啦，而呢邊消費其實除左食有啲消費其實同香港差唔多。最後就係，如果你想移民，學埋車先過來會好啲，呢邊交通好繁忙，同埋啲人唔多禮讓的。
後記: 點解今次會用一隻哥基嘅相呢? 由於 E 唔想公開身份，她想用移民台灣後先養嘅哥基代表佢。我相信好多香港人都會有移民台灣嘅想法，係因為鍾意人地國家? 定因為已經唔再想留係自己嘅家?
有故事的人 Story Teller | Kenry Lee 