前言: 剛剛週末係中環舉辦嘅賞想文創節除左搵朋友同 story teller 小房，其中一個意外收穫就係即場做左個訪問。經過 Karen 嘅檔攤個剎那，我被手繪嘅貼紙吸引住，Karen 介紹係世界其中九座比較出名嘅山，買完野我決定解釋下自己嘅背景同問下 Karen 有無時間做訪問。
1. 介意我問下你嘅背景嘛?
畫畫同擺檔並唔係我嘅正職。我一開始做係因為我鍾意畫畫，但我覺得純賣畫好難，所以決定將畫畫嘅元素融入唔同嘅產品到，不過我發現咁樣比起畫畫更花時間，例如要剪貼紙，同埋我賣嘅筆記簿都係自己縫。我其實上年三月先開始，因為轉左工有多啲時間同空間去做。
2. 可唔可以分享下你創作嘅方向呢?
你見我好多都係畫大自然，我無咩畫人的，因為我覺得純大自然最靚。大自然入面我最鍾意山，而九座山我去過一半。我亦有畫動物，鯨魚係我最鍾意嘅動物，因為感覺好 peaceful，我好鍾意畫鯨魚飛過一座山，因為覺得咁樣感覺好自由自在，不受限制，而呢個概念其實我有係外國嘅 MV 都曾經見過。
3. 你去過咁多嘅山，最鍾意係邊座呢?
係蘇格蘭嘅 Old Man of Storr，我去到就好鍾意個環境，同埋我睇資料個到某啲植物係英國只有兩座山嘅山頂先搵到，我覺得呢樣野好特別。
4. 咁你下一個目標係去邊呢?
我想去多次南美，因為我覺得呢個地方好神秘，我想去智利嘅 Torres del Paine 同埋馬丘比丘。
5. 你而家做緊嘅嘢同你學習背景有無關聯呢? 例如你係咪讀地理嘅呢?
我嘅學習背景其實唔太關事。其實我係一個兒科醫生 (聽到個下真係 o 左嘴），因為而家係私家診所做所以多啲時間空間做呢件事。以前我都鍾意地理但會考理科無得讀上去，我好鍾意大自然所以生物係我最鍾意個科。我會考個陣有讀視覺藝術的，當時都有諗過如果唔係 medicine 就係讀同 Art 相關嘅科目。
6. 你來緊有無咩目標呢?
我剛剛學左潛水，所以都想畫下同水有關嘅畫。我希望我嘅作品帶到 “mindfulness” 呢個概念，希望大家會更關注環境同大自然。
7. 作為一個手作檔主同畫家，你有無咩想同讀者分享呢?
香港其實手作方面係有市場的，但係咪真係可以當正職咁做呢就要再諗諗。
我希望讀者可以記住我地嘅生活可能好煩擾，但其實我地打開窗見到大自然嘅時候可以幫我地冷靜沉澱返。同埋為左將來幾代嘅人，我地真係要好好保護環境。
後記: 大概係地理人嘅緣故，我見到 Karen 嘅作品好有共鳴，當 Karen 再介紹某啲作品嘅時候我覺得 Karen 嘅畫你就咁望會覺得花花草草好舒服好靚，但其實背後她係有訊息想表達的，例如好似呢張我買嘅卡咁，Karen 話人好努力保護溫室入面嘅植物，但唔好忘記我地嘅大自然都好需要我地好似溫室植物咁呵護。
錯過左賞想文創節嘅讀者仲有機會，Karen 15,16/9 將會係 JCCAC 擺檔，有興趣嘅讀者記得親身支持下，睇下 Karen 嘅作品。
另外亦可以 like Karen 嘅 Facebook page iwikart。
有故事的人 Story Teller | Kenry Lee 