前言: 我相信好多人都會係 Facebook 或者 instagram 見過一隻可愛嘅塵配上一句簡單鼓勵人心嘅說話，或者係唔同地方都有見過一隻塵公仔，其實佢叫 Dusty Kid。一直都有留意 Dusty kid 嘅我某日嘗試 inbox 作者 Rap 睇下有無機會可以做個訪問。訪問當日 Rap 話多數訪問都唔接的，感恩有緣有呢個機會可以訪問一下塵爸。
1. 可能有啲讀者唔知，你可以介紹下點解當初會用塵做創作概念嗎? 同埋點解會有 Dusty kid 呢件事呢?
要數返 2005 年，當時我中學畢業，又遇上失戀同朋友各散東西，感覺自己好孤獨，會考又考得麻麻，人生好似好多障礙咁。以前嘅我係一個好敏感嘅人，會因為少少事開心，亦會因為咁好容易唔開心，當時我好想有啲嘢可以陪住自己，於是就開始左畫 Dusty kid。Dusty kid 前身其實唔係而家咁嘅樣，一開始我只係 xanga (以前好流行嘅個人網誌) 上載作品。到我 19，20 歲左右人生開心返啲我就停左畫 Dusty Kid。
25 歲嘅時候我開始同朋友創業。其實我由中學畢業到 25 歲我只係打過一份工，而多數我係接 freelance，因為我唔想幫人打工，但其實我係一個工作狂，所以都適合做生意。第一次搞品牌授權嘅生意賺得好少錢，當時我要一次過打三份工幫補生意。最後我決定同朋友拆夥，而拆夥前其實我已經開始畫返 Dusty kid。
2013 年我入左間廣告公司到做，呢到嘅老闆好叻做品牌授權，而我就主力做創作，所以後來我地就合作做 Dusty kid，而公司亦轉型主力做 Dusty kid，因為呢個角色係屬於自己嘅。
當我再畫返 Dusty kid，有一次我畫左隻塵加個 quote 發現 Facebook 有好多人 like，我就發現其實好多人都需要 Dusty kid。其實寫嘅 quote 都係我想同讀者分享嘅說話，有部分可能係我細個經歷過自己消化左再將佢變成一句 quote。
一開始我係每晚十一點就係 Facebook 出一個 post，久而久之呢個變為習慣，我亦感覺自己好似有種「社會責任」，因為我知道有讀者真係等緊的，所以不論幾忙都好我都會準時出 post。好似我上年其實好忙，我係 16 個月出左 15 本書，但我都堅持要準時出 post。
至於點解用塵呢，因為以前我父母都好忙，無咩時間打掃，所以我屋企好多塵，而呢樣嘢係我覺得成日陪住我嘅，塵能夠跨越時間，形狀，又可以依附係唔同物質，而好多人覺得自己「平凡」就好似一粒塵一樣。
2. 我見你新書有提及「放下執著」，亦提及「因果」，唔知你係咪想分享一啲佛教道理呢?
我其實無特別相信咩宗教，亦無特別去 share 某一個宗教嘅道理，但凡我覺得合用嘅道理哲理我都會分享，所以其實佛教同基督教嘅週刊都有訪問我。其實我自己比較多接觸莊子嘅說話，但我唔否認「塵」係與佛有緣的。
我嘅創作會留空間俾人，俾人可以代入，你係咩背景睇完我嘅書可能會有唔同體會。
3. 你嚟緊有無為 Dusty kid 訂立咩目標?
我一直都想畫有生命體嘅角色，係 target 所有人嘅，例如好似櫻桃小丸子呢類角色。我希望 Dusty kid 唔只係平面出現，仲可以有自己嘅動態，例如以動畫呈現，所以我地之前嘗試運用其他媒介例如廣播劇。
我亦希望研發一隻 Dusty kid 機器人，好似 buddy 咁陪住唔同嘅人，等人可以有對象可以分享生活，而呢隻機器人又會同時回應。
4. 你係創作路上如何平衡現實與夢想?
我覺得而家係容易靠創作去賺錢嘅時代，但要成功唔容易。你要自己都覺得好好，自己都有感動你先可以感動到人。同時你唔可以太孤芳自賞，唔可以覺得人地唔鍾意你嘅創作係對方唔識貨，你應該多聆聽外界嘅聲音，聽多啲意見咁先有機會進步。
當你做到以上嘅嘢你就會搵到食，因為而家 Facebook，Instagram 咁方便。一開始可以唔使太擔心錢，先建立好自己嘅價值先講夢想。
5. 你曾經講過你成長嘅過程有遇到唔愉快嘅經歷，你有無咩說話可以同讀者，尤其年輕人分享如何面對逆境?
當然係睇 Dusty kid 啦（一秒內嘅答案哈）
如果係人際關係方面，我覺得你要誠實面對自己係一個點嘅人，當你做自己，你自然會吸引到同行嘅人。做一個自己鍾意嘅自己，唔係人地鍾意嘅自己。
有啲同學可能覺得點解好似無人鍾意自己，但其實細心諗吓可能其實你都拒絕過好多人，我覺得面對困難亦可以當係鍛鍊自己嘅機會。
6. 關於夢想，工作，你仲有無嘢想分享？
頭先提過，人要誠實面對自己，當你做自己，你會開始搵自己想點，呢樣嘢好緊要。當你做到嘅時候，不論你係咩人讀咩科你都有機會搵到錢。
我覺得香港人有樣嘢好奇怪，例如會好強調自己有幾多錢，或自己有幾多層樓，但其實外面嘅世界唔會咁，外國人唔會成日提住自己有幾多層樓，我覺得彰顯自己嘅價值，成就，比起只顧搵錢重要。
後記: 訪問當日我拎住最近我覺得好有共鳴嘅繪本 「貓在想念誰?」去搵 Rap，正當我解釋因為遠行所以可能會令黑妹唔習慣，我睇呢本書嘅時候仿佛覺得好似講緊我個情況咁，問 Rap 係咪有養貓，佢話無，佢話當你切身處地去諗吓貓嘅感受嘅時候你就會寫到個故事。
有興趣嘅讀者可以 Facebook like Dustykid 或 Instagram like dustykid_hk。
期望 Rap 將來有更多觸動人心，安慰人心嘅作品。
有故事的人 Story Teller | Kenry Lee 