前言: 係香港好多人讀書，考到好成績，最後搵份好工，只有部份人係學術路上繼續有追求。香港人好多都擁有碩士資格，但只有一少部分再修讀博士學位同持續地做研究，今次我訪問到我係香港大學讀教育文憑嘅教授 Tammy，一齊傾下佢嘅教學生涯。
1. Tammy 你係教育界有做過唔同崗位，可唔可以分享下?
我從事教育38 年，其中 27 年係香港大學。
一開始我係中學教書，2 年後就去左英國讀書，之後返左香港代課同全職教書。後來我係香港大學做 teaching consultant，亦係柏立基教育學院做講師。去澳洲讀博士學位前做過香港大學講師，完成學業就一直係香港大學工作直到退休。
2. 你覺得做中學老師同大學教授最大嘅分別係咩?
大學教授集中做研究同教書，亦可能對社會有啲服務，中學老師就除左教書，仲要兼顧好多行政工作。中學要顧及學生嘅全人發展，培養正確嘅價值觀，但大學基本上做到教學就可以了。
3. 你中學大學都教過，點解你最後會選擇係大學教書呢?
我好相信 “multiplier effect”。一個老師可能每年只係教幾班學生，但當我係大學教書，我每年教幾個學生，而呢幾個學生再每人教幾班，我覺得個果效會大啲。
4. 你係大學工作左咁多年有啲咩帶俾你最大嘅滿足感?
我覺得第一樣係剛剛提到嘅 multiplier effect，當我係堂上見到學生嘅成長，或者觀課時見到學生用返所學嘅，呢啲都令我好開心。當然有時候學生亦會俾到 idea 我，我地都係互相學習緊。
第二樣我覺得自己算係工作範疇嘅「先鋒」，我嘅教學材料唔會年年都一樣，我希望有進步，當有同工想套用我嘅一套 framework，我會同自己講「你好人地先會想用」，我唔會等，我會主動去做一啲想試嘅項目，例如同唔同學校搞 partnership program。
5. 有無啲咩係你退休之前未完成到嘅目標呢?
其實我退休前一直都好想做到教育文憑課程改革。前兩年其實我已經著手整理地理科教育文憑嘅課程，而整個教育文憑嘅課程改革亦因為咁係 2016-17 年度我地嘅團隊推行左，所以算係完成左我嘅目標。
6. 係你眼中點先係一個好老師呢?
我覺得「有教無類」呢個講法真係好啱，老師應該要幫學生發掘每個人嘅潛能，亦應該要同學生講自己唔係最叻唔緊要，更重要係培養同學做到「flexible thinking」，同埋睇嘢要全面啲。
7. 作為教育文憑嘅老師，你有無咩好想同老師們同學生們分享?
我覺得老師一定要對自己同學生們有信心，你永遠唔知學生嘅潛能可以有幾大。另外我相信師生之間有信任同關係係重要的。老套啲都要講句「大家要做好老師呀」。
至於學生呢，我想話做老師好辛苦的，同學應該要主動啲學習，唔可以只等待老師準備俾你嘅嘢。
8. 都唔記得問 Tammy 你點解一開始想做老師？係咪因為遇到啟蒙老師呢?
其實正正相反，好多人話自己係被老師影響，我以前中學嘅老師大多都係好有心但唔太識去處理唔同學生嘅學習需要，所以我希望自己可以做一個識教書嘅老師。
後記: 以前讀教學文憑嘅時候每個禮拜兩日趕返香港大學，同好多同學都有好深感受Tammy 好有熱誠，好想同我地分享好多嘅想法同知識。記得第一次 Tammy 觀課，當時我係教一班能力較弱嘅同學，初時擔心學生表現未如理想，最後同學嘅表現比我想像中好，落堂後 Tammy 提醒我要相信同學，而呢一次嘅經驗亦一直係我腦海中。Tammy 桃李滿門，好多中學地理老師都係佢嘅門生，希望 Tammy 退休生活愉快，身體健康。
有故事的人 Story Teller | Kenry Lee 