前言: 由於黑妹最近確診腎病嘅緣故，呢幾個月多左進出獸醫診所，見左唔同獸醫同護士，作為黑妹嘅主人當然最緊張獸醫同護士嘅質素，然後我注意到佢。每次獸醫要抽血，或者要做檢查，佢總係好細心咁幫手，當我有問題嘅時候佢亦耐心解答，當大家覺得獸醫好厲害嘅時候，其實係身邊幫手嘅獸醫助理亦好重要，今次我決定訪問呢位我心目中嘅優秀助理，維他。
1. 點解你會成為一個獸醫助理嘅?
其實我嘅志願係想做一個獸醫，由於我中學物理讀得比生物科好，我大學選擇左讀應用物理。畢業後我做左工程幾年，五，六年前我知道城市大學準備開獸醫學位課程，而申請者需要相關經驗，所以我想係診所累積經驗。一開始我搵唔到工的，後來朋友向呢間公司嘅經理介紹我，我就開始入診所做助理。
我做左快五年，本身打算做 1-2 年之後再報讀獸醫課程，但我申請過兩次都失敗，我會檢討下失敗嘅原因，但我會繼續嘗試的。
2. 咁點解你會想做獸醫嘅?
我細個嘅時候係住係村屋，條村有好多狗。有一次返學嘅時候有架車入村，有隻狗仔被輾過，我見到佢當時好慘，我好想幫佢但覺得好無助。中一嘅時候我知道有獸醫呢科，所以就想朝呢個方向進發。當然我本身好鍾意小動物同埋接觸動物。
3. 做左呢份工快五年有無咩好難忘嘅事呢?
我諗係我自己隻貓過身。我覺得我係獸醫助理呢個身份令我覺得更無助。係最後嘅日子其實我隻貓已經留左係我做嘢嘅診所，但我又要顧其他動物，只係休息時間可以望下佢，每晚都見到佢好辛苦。本身我係想等家姐返香港後見佢最後一面，我後來回想返有啲後悔，唔應該俾佢咁辛苦。
4. 呢件事對你有咩影響 / 轉變?
我覺得呢件事有令我對呢份工嘅熱情低左。我當時其實辭左職，去左三個月旅行散心。
K: 對工作嘅熱情低左即係點呢?
散心後我返左呢間公司做，我會覺得生離死別太多，個人麻木左，好似無咩動力去學新嘢，不過最近好返啲。
5. 你有無諗過辭職轉換下工作模式呢?
我之前有諗過辭職係因為香港獸醫診所大多照顧貓狗，而咁樣唔夠全面，我希望自己可以接觸多啲唔同種類嘅動物，例如去海洋公園或者嘉道理農場。我之前亦有諗過去菲律賓係動物園做義工照顧動物。
K: 你有無考慮過去其他國家讀獸醫?
唔同國家讀獸醫嘅入學條件都有分別，人地未必認可你香港嘅成績，加上屋企經濟壓力，同埋屋企人同我屋企其他貓都開始老，所以我想留返係香港。
6. 你頭先有提過成日面對死別，你點樣處理呢啲情緒呢?
一開始打工其實我反對將動物安樂死的，後來發現當貓年老腎病好普遍，狗又會好大機會有心臟病，我而家會同主人講其實佢地好辛苦，當然我要自己先平復先冷靜到個主人。
其實有時候我地照顧嘅動物明明好地地，情況可能突然會變差，我地當然會唔開心，但可能時間只容許我地洗個面深呼吸，然後要諗下點同個主人解釋。
五年時間，其實都麻木左，所以而家情緒會恢復得好快。
7. 你覺得整體嚟講自己第一日返工同而家嘅心態有咩唔同?
我覺得我成熟左。係做好多嘢之前會考慮得更清楚，亦會詢問醫生意見，因為唔想帶來咩反效果。
我覺得自己對呢份工仍然有熱誠，如果唔係我應該辭左職，因為無熱誠咁做呢份工好機械化，亦有啲厭惡性工作例如要洗籠同其他清潔工作。
8. 對於寵物有病嘅主人你覺得佢地應該用咩心態面對?
頭先我提過一開始我反對安樂死的，但而家我覺得我地要有同理心，有病嘅寵物去到最後情況可以好差，腎病貓貓可能會完全無食慾會嘔，有心臟病嘅狗成日都好似游水浸親咁，呢啲情況其實我會建議主人可以考慮安樂死，一來寵物會舒服啲，同埋你係佢身邊。
其實寵物老左同人年老有病類似，其實佢地有主人照顧已經好好，所以唔使太自責，你地太傷心反而佢地走得唔安樂。
K: 你記唔記得第一次接觸顧客寵物過身嘅感覺?
我記得個次我好唔開心，即刻喊左出嚟，個醫生當時叫我行開下冷靜下，同埋當時會好緊張唔知點好，唔知點幫獸醫。
9. 你有無咩說話同有興趣從事獸醫或獸醫助理嘅同學分享?
呢份係一份高壓工作，有啲厭惡性工作連醫生都要落手落腳做，同埋有機會接觸好多血。
我覺得大家都要問下自己係咪真係有熱誠，以我呢間公司為例，其實前幾年流失率好高，因為呢份工要輪更好辛苦，又要面對生離死別，最差你預左可能無曬朋友，因為你放假時可能大家都返緊工。仲有起薪人工唔係咁高，到你考左某啲專業先再加人工。
當你有興趣同熱誠，你就唔會計較咁多。一開始當人工唔高嘅時候，你嘅投入更重要。
K: 有無咩係呢份工好正面嘅嘢呢?
好似無 wor (笑)
可以同動物接觸吧，同埋我地都有接觸過案例例如有隻狗驚難產，但最後我地都成功接生。
最後我都可以講多少少香港讀獸醫有咩好，當你錢唔多嘅時候住宿其實不成問題，政府而家認可獸醫課程好重要，其實畢業後除左香港市場，大家可以返內地做培訓，因為內地嘅獸醫行業其實同國際有少少脫軌。
後記: 維他最後有補充其中一個想做獸醫嘅原因係因為細個嘅時候唔識照顧屋企嘅寵物，所以想補償，做返好啲。每次係診所見到維他，他都係努力工作緊，他嘅耐性同細心我相信其他寵物主人同寵物都會感受到。感謝維他一直對黑妹的照顧，亦希望維他早日考到獸醫牌照
有故事的人 Story Teller | Kenry Lee 