前言: 大家有無印象我三年前係 PMQ 畫過一幅素描呢? 當時其實我行過 Jessie workshop 見到好靚嘅 galaxy 畫，再見到 Jessie 嘅賣點寫 “Everyone can paint”，所以我當時就決定去上堂。呢幾年見 Jessie 除左教班，仲有好多自己嘅創作，今次搵 Jessie 分享下佢嘅藝術家夢。
1. Jessie 我睇過你以前嘅訪問，你提過自己無受過藝術方面嘅訓練，你可唔可以講下你嘅背景?
我細細個係屋企牆身畫畫，後來屋企人帶我去學畫畫。我係香港中學讀到中三就過左英國讀書，當時我有讀美術的，而大學入學試亦有讀美術。當時我其實選大學嘅時候都有問自己，如果修讀美術畢業後會做咩，最後我都係選左主流嘅商科，係 London School of Economics 讀管理，但讀左一年我就無讀，之後我返左香港。
本身我有諗過唔讀的，同樣地我又考慮到將來「搵食」，最後我選擇係香港讀時裝設計。畢業後我做左大概一年 fashion buying 嘅工作，做做下我覺得唔開心，所以開始思考究竟生命嘅意義係咩，我有嘗試尋找宗教，亦開始睇哲學書，後來我決定報讀中大嘅哲學碩士。我會話讀呢個碩士係我人生其中一樣最美好嘅事。呢個碩士帶俾我唔同啟發，思想上嘅寬度有改變，呢啲都有幫助我而家嘅藝術創作。
2. 點解最後你選擇行藝術呢條路?
其實我細個從無諗過向呢個方向發展，係後來有機會開畫室，再到而家行藝術家條路。
2013 年我只係兼職教畫，當時剛好 Andy Warhol 展覽係香港舉行，同時香港流行 art jamming，朋友同我傾起睇下有無一個大家可以一齊玩嘅機會，最後我研究左一個 painting + printing 嘅方法。
當時我係 meetup.com 放自己嘅畫班，見到參與者好投入，見到佢地揀顏色嘅過程已經好開心，亦因為咁我有好大嘅成功感，亦覺得教班好有意思。教左一陣之後有人問我會唔會有新班，我就再研究其他好玩嘅班。教嘅過程我發現自己鍾意教人，而參加者可以留返好嘅回憶。
2015 年暑假我係 PMQ 開左我嘅 pop up 畫室，當時係我全職咁教畫畫。約滿後我就搬左嚟荔枝角呢間 studio。
一路開 pop up 期間都有路人鼓勵我應該要有自己嘅創作，所以我除左教班亦有以 studio 名義參加唔同公司活動，例如馬莎同 I.T.。
至於點解我會真正開始創作，係我搬去荔枝角之前去左幾日新加坡，當時剛好 National Gallery 開幕幾日，我參觀完後就好想有自己嘅創作。
當我要畫畫嘅時候其實我需要閉關專心，所以返香港後我無教班，剛好有一間畫廊邀請我做畫展，我要完成 6 幅作品，亦係呢個過程我更加肯定自己想做一個有自己創作嘅藝術家。
3. 你有無諗過全職做藝術家完全唔教班呢?
可能當我好出名有人會買我嘅作品而我又維持到生計的話我會唔教班，不過暫時未係時候。
4. 成日都有個講法「香港係文化沙漠」，你認唔認同?
我十分認同，藝術係香港整體氣氛差同埋我地一班藝術工作者無咩 support，而且藝術係香港有時被扭曲左。例如好似近年好受歡迎嘅 Art Bassal，其實好多人為打卡而去，根本就唔係為藝術欣賞而去，同時又有一班人係識藝術但又自我感覺太良好，有點太 show off。
所以我有時都會問自己，我可以做啲咩呢?我都係還原基本步返去教班。
其實第一次係 PMQ 搞完 pop up 後，我有再次申請的，見曬評審對方都表示好欣賞，但最後竟然申請被拒。我好失望但我無否定自己，而且我覺得我咁有計劃推廣藝術但都被拒，背後個 implication 更令我失望，但我都會繼續諗下之後嘅計劃。
5. 點解你會用 “Everyone can draw” 作為你嘅教學理念呢?
因為我打從心底覺得呢樣嘢係真嘅。
大家回想下，其實每個人細個都會畫畫，甚至鍾意畫畫，到大個因為你知道邊啲畫靚啲所以你先無再畫，但其實唔理結果的話大家都可以好享受呢件事，所以我覺得好可惜，因為呢樣係一樣好簡單，根本嘅快樂。
6. 咁係呢個理念下，有無遇到咩難忘嘅故事呢?
有三個故事我都覺得好難忘。
第一個係一位退左休嘅美國太太，佢鍾意畫畫但覺得自己唔叻，我每個班佢都上幾次，佢有同我講返，唔係我嘅 workshop 佢都唔會重拾畫畫嘅樂趣，亦有話因為上我堂覺得好多嘢都容易跟到。
第二個係一位來自英國嘅室內設計師，佢係香港上左我一堂返左英國，佢後來同我講將上堂學嘅幾個技巧畫左十幾幅畫，仲成功賣出左 5 幅，聽到個下真係好開心。
第三個係一個係香港讀書嘅內地人，佢話自己唔鍾意 art 但都參加左兩次我嘅班，本身做會計嘅佢最後仲 quit 左，去一間畫廊做助手。
7. 作為前線藝術工作者，除左文化沙漠，你仲遇到咩困難呢?
先補充一下點解我覺得香港係文化沙漠，我覺得整個系統應該要包括創作嘅人同觀眾，而香港係呢方面仲可以再好啲。
我覺得第一樣困難係地方，有時我地搵唔到地方做創作或者展覽，同埋我地需要大啲地方。
第二樣係其實藝術家都要謀生，有好多人因為基本生活都照顧唔到所以唯有放棄。要遇到識欣賞嘅人唔容易，我試過係 British Festival 有攤位，有位太太表示欣賞我嘅畫，但就係想壓我價，但其實只差 $100，佢仲要連續幾日都嚟壓價，我有同她講如果係她嗰個價錢有其他選擇，但佢又唔啱心水。係香港從事藝術嘅難處係好多香港人都唔 value 我地嘅創作，但其實我地嘅創意，功夫都「值錢」的。
K: 咁你有無諗過你會唔會做藝術家做到退休呢?
我有時都會睇下其他工的，但成日都會有掙扎，我覺得自己已經做緊最想做嘅工作。
8. 你最後有無咩說話想同讀者分享?
我希望自己可以成功，起碼可以搵到食，唔使擔心自己三餐，然後我期望自己可以提供一啲工作機會俾有才能嘅人。香港政府亦應該提供更多機會俾本地藝術家。
至於應唔應該行非主流例如藝術呢條路，或者大家可以問下自己「係咪下半生就如此過」，你甘心嘛？曾經有個電影導演講過一句說話「年輕人有無堅持自己想做嘅嘢」，大家都可以反思下。但其實，我覺得藝術應該係一個生活態度。
藝術家呢條路唔容易行，你要諗清楚係咪想做，你要意志好堅定。
不過我唔會特別去鼓勵讀者行藝術路，我覺得更重要嘅係大家都去搵自己想要嘅生活，諗下自己生命嘅意義係咩，最重要係:金錢唔係生命唯一嘅價值。
後記: 當初想邀請 Jessie 受訪除左因為佢係藝術方面嘅熱誠，仲因為我地都有共同想法：香港社會太現實啦，有好多嘢其實比錢更重要。回想返三年前參加 workshop 嘅我，drop 左 Visual arts 後嘅我基本上無再畫畫，但個日係 Jessie 嘅指導下我覺得「我都畫到畫的」。
由於工廠活化嘅緣故，Jessie 嘅 studio 將需於年底前遷出，有興趣參加 Jessie 畫班，體驗下Jessie 嘅魔法嘅讀者可以瀏覽 www.mbart.co 或者 Facebook search MBA Art Workshop。
#Art #Drawing #Painting #Make_beautiful_art
有故事的人 Story Teller | Kenry Lee 