前言: 九月底到訪係筲箕灣嘅「豐見遊人」旅遊市集，見到一個男仔正係到擺檔，有個紙牌寫住「業餘空少」，檯上有唔同產品例如圖文書、筆記簿、筆袋，令我好奇呢位空少背後嘅故事。
1. 請問你做左幾年空少?
5 年多啲。
2. 你提到你本身唔係做空少，可唔可以分享下你嘅故事?
我大學讀會計，畢業後做左兩年半會計，當時我係做好專門嘅稅務。當初我點解揀呢科都係因為好多人揀，而讀完唔做返呢行又好似好浪費，但我一路做其實感覺唔係特別好，我覺得自己唔適合做呢份工。
做會計通常三年就考牌，考到人工就會加，我預計到如果加左人工我更加唔想走，所以我就毅然離開。當時嘅想法係我想見識多啲，我自己都鍾意旅行但以前屋企環境唔許可我成日可以去，所以就決定考空少。其實本身我都只係打算做 1-2 年，但最後無停到。
3. 你覺得真正做左空少同你預期之中有無好唔同?
咁一定有唔同，不過我又無因為呢啲唔同而想離開。我點解叫自己做「業餘空少」呢，係因為我覺得人唔應該只被一份工規限住，所以我嘗試擁有自己嘅 Facebook 專頁，繼而寫書，我希望可以發掘多啲可能性。
雖然話同期望有落差，但呢份工同時提供左彈性同自由度俾我，等我可以有空間做我而家做緊嘅事。
4. 點解你會由一個 Facebook 專頁發展到有書甚至係其他產品嘅?
其實一開始我會用畫畫記錄我嘅工作係因為我細個鍾意畫畫，但你知啦，香港嘅氛圍唔鼓勵你做呢樣嘢，所以我中途放棄左。
呢份工其實可以俾我見到好多人，所以我想記錄低遇到嘅人同事。我係專頁大多係文字，我希望可以有圖畫去表達，加上以前我曾經夢想有屬於自己嘅作品，所以就有出書嘅念頭。我覺得當所有人見面都係交換卡片，而我可以同其他人交換自己作品的話，成件事立體好多。
至於個發展，其實我一開始無計劃會有周邊產品的，但當多左讀者認識你，佢哋會有期望你做多啲，所以出產品主要係為左回應讀者嘅期望。
最近其實我開始拍 vlog，主要希望分享自己嘅見聞，希望會有人可以做交流，有共鳴。
5. 你嚟緊有無咩計劃/目標呢?
暫時又真係無。我畫嘅畫其實都係業餘性質，我咁樣無咁大壓力，同埋我為興趣多啲，當然我好珍惜因為我嘅專頁同本書帶來嘅機會，例如去電台訪問同上電視，令到我有機會試唔同嘢。
丫，我諗到啦，我嘅目標係有我下一本書。
6. 好多同學其實都想做空姐/空少，或者對呢行會有好多想像，你有無咩想同佢地分享?
呢樣嘢其實係我下本書嘅主題（笑）。
其實好多人都抱有期望咁入來做空姐/空少，但當我見到亦有好多人因為個現實同佢地想像嘅唔同而離開，我覺得好可惜。
網絡上同電視劇呈現嘅呢個行業好光鮮，啲人好似好開心周圍去，但飛機降落前嘅工作無咩人知，背後嘅辛苦好多人都唔了解，其實每行都有自己嘅難處。
你千其唔好期望唔使受氣。其實你有好多本份要做好，同埋入左行嘅當你好辛苦嘅時候要回想下當初係啲咩推動你入行。
後記: 當問到有咩想同讀者分享嘅時候，從飛 Sun 嘅說話我感受到呢份工唔簡單，但同時從佢嘅反應我知道佢好鍾意呢份工，希望飛 Sun 可以保持部份熱誠。有興趣睇多啲飛 sun 故事嘅讀者可以 search and like Facebook “業餘空少飛sun” 同埋 Instagram “cabincrewsun”或者支持佢嘅圖文書「飛身到天邊 — 好做唔做做空少」
P.S. 我身邊其實好多空姐空少朋友，聽得多佢地嘅分享都好驚自己不自覺成為其他空姐/空少嘅「麻煩客」，尤其今年成日飛，希望我無犯眾憎啦
#cabincrew #飛sun #flight_attendant #travel
有故事的人 Story Teller | Kenry Lee 