前言: Bonnie 係我地理科大學同學，以前返學當我地準備放學嘅時候，Bonnie 總係話「我要去上 Art 嘅 lecture」，我地迎新營好多產品 Bonnie 亦有份設計。畢業後知道 Bonnie 有畫漫畫，近年更為兒童書畫插畫，點樣由讀地理走到插畫師呢一步呢，等 Bonnie 分享佢嘅故事。
1. 點解你會志願成為一個插畫師嘅?
其實細個我無咁強烈想做插畫家，一路我都係想做畫家。一直我都係為興趣畫畫，其實第一年讀中大係唔習慣的，當時有諗過轉去理工大學，但當時考慮畢業後搵工點算呢，所以就留左係地理科。
雖然係咁，我知道自己唔係好想搵地理科有關嘅工，好似我嘅專長同地理科唔係好相關。同時我回想做畫家嘅初心，最後我決定讀 Art School 碩士，亦算係開始左準備我而家嘅工作。
2. 既然你有志向藝術方面發展，點解你學士學位會選擇地理而唔係視覺藝術呢?
我當時考英國會考成績好可以拔尖，但當時我嘅分數只可以入讀中大或科大。第一樣我諗嘅係中大近啲我屋企（笑），另外我唔係太鍾意中大視覺藝術系嘅風格，所以我就揀我第二鍾意嘅科，地理。當時我家人亦希望我選地理，因為佢地覺得我成日自己一個人畫畫好似自閉咁，希望我可以出去多接觸大自然。先讀地理嘅好係，讀地理令我學更多關於呢個世界嘅知識，開拓我嘅眼界，幫助我而家嘅創作。
3. 我印象中你係 Roar Street Journal (RSJ) (Bonnie 的連載漫畫作品) 會講好多同環保有關嘅訊息，可唔可以分享下你畫畫嘅靈感或意念?
畫 RSJ 好多時都反映一啲個人價值觀，抒發情感，但有時都會帶出唔同訊息，例如環境保育、動物保護、或者一啲正面訊息，類似心靈雞湯。
我其他嘅作品會係我日常遇到嘅特別事同埋趣事。
我設計嘅角色大多都識嘅人有關，由於我本身好鍾意動物，我就畫左 RSJ 呢個系列，而有啲角色係我自己性格嘅投射。
4. 我見到網上訪問你有提過你參加過Line 舉辦嘅 Line Webtoon，呢個係咪你創作路嘅一個轉捩點?
都係的。其實讀書期間一直都有唔同作品都有啲工作。大學三年級參加 Line 第一屆嘅漫畫創作比賽，得到第三名，其實當時贏左之後我都只係主力創作自己嘅漫畫 RSJ，到畢業後因為我將自己嘅作品上載係自己嘅網頁，有中介見到於是就同我簽合約，亦開始左而家做插畫嘅工作。
5. 你有無為自己嘅創作定立咩目標?
有三樣吧。
第一樣係有我自己寫同畫嘅書，除左畫嘢我都鍾意寫嘢，因為可以表達下自己想法，不過呢件事其實即將會發生。
第二樣係有少少自相矛盾的，就係我想將 RSJ 發展做一個品牌，矛盾嘅位係我漫畫嘅內容好多提倡環保，但如果發展做一個品牌就會鼓吹消費。
第三樣係出版宣揚環保嘅作品，可能係書或者漫畫，希望可以用軟性手法影響下人嘅行為/思想。
6. 你覺得你行藝術呢條路有無犧牲?
（笑）有啦。
社交方面有影響吧，其實好多時朋友聚會我都未必會出席到，因為我要用好多時間練習畫畫技巧。而且我嘅工作模式同一般寫字樓工作唔同，所以同朋友相處嘅時間又未必夾到。
7. 你有無咩想同有志行藝術路嘅讀者分享?
雖然我行藝術路，但係香港做藝術真係好難，市場細同埋某啲對藝術嘅看法唔夠成熟。香港「藝術」嘅文化係 「畫畫係一個工具」，目標為本，比較少著重創作。
我覺得如果同學有呢個想法係好事，但要衡量清楚究竟應該點行呢條路。假如你屋企好支持，經濟又可以支持到，咁你當然可以放膽去做。但假若屋企唔支持，其實可以考慮藝術做興趣/副業會穩陣啲。
我覺得香港有意投身藝術行業嘅應該去睇多啲藝術作品，接觸多啲唔同作品，例如你好鍾意動漫嘅，你可以睇動漫之餘都要睇多啲其他類別嘅創作。
我覺得有心想試係好事，因為可以豐富我地城市嘅藝術氣色。
同埋做藝術唔一定要限於香港，例如好似我咁，我而家主要幫外國出版社畫插畫，當你接到外國工作搵嘅錢又會多啲。而家網上資訊咁發達，其實要遙距工作唔難。
後記: 其實讀書以來都無機會同 Bonnie 傾下佢嘅創作，今次更了解多左佢而家嘅工作。訪問完結前 Bonnie 展示俾我睇佢插畫嘅原稿同真實出版嘅書，大家睇下係咪好厲害?
有興趣留意 Bonnie 作品嘅讀者，可以 Facebook search “The Art of Bonnie Pang”+ instagram “bonniepangart”，仲有佢嘅個人網頁 www.bonniepangart.com。最近 Bonnie 畫緊同男朋友日常相處趣事漫畫 “ITguyARTGirl”，大家都快啲去睇下呢個令人會心微笑嘅漫畫系列啦！
有故事的人 Story Teller | Kenry Lee 