前言: 猶記得第一年係何文田教書嘅日子中六班有一個非常壯健嘅男同學，身型基本上同經常健身嘅成人無分別。Patrick 中學畢業後經常係 Facebook 見佢上教練課程同有好多教自衛術嘅經驗，今次我就訪問下呢位年輕人對運動嘅執著同堅持。
1. 可唔可以分享下你愛上運動嘅歷程？
其實我小學係無接觸運動的。升上中學後因為自由度多左，我就開始跑步打波，同參加唔同訓練班，我個時已經見到體質有改善。
中二我仲加入左唔同校隊例如長跑隊同排球隊。中三我開始接觸泰拳同埋開始健身，當時係一個禮拜去一次。中四我開始玩搏擊，當時嘅我無咩意識，健身去到每日都做。一次受傷下我就要暫停搏擊，亦開始接觸自衛術，當時係我做運動嘅高峰，每星期可以做到二十幾個鐘。
中五六學業開始忙，老師多補課，令我可以做運動嘅時間少左，於是我會由何文田跑返觀塘。(你無睇錯係，跑!)
K: 揹曬書包咁跑？
係呀!
感激因為師父嘅緣故（亦係中學師兄)，我開始接觸自衛術，之後亦有機會係佢間健身室工作。
2. 好多人認為運動同讀書有衝突，尤其係高中要準備公開試，你嘅睇法又係點呢? 成長期間有無遇過阻力?
我係健身行先的（笑）
當我管理到自己學業，我屋企又無話特別對我好高要求，所以無阻止我做運動。
我覺得時間管理好緊要，我當時可以繼續做運動嘅基礎係搞掂學業。我覺得自己唔係港隊個啲有一樣好就係時間比較彈性。基本上我唔會唔夠時間做運動，高中係好忙，我就一早做運動，學校上體育堂，放學又可以做。我係體育堂會舉啞鈴架，好多謝周 sir 同謝 sir 俾左好大自由度我，而我嘅老師基本上都無話因為我做運動而覺得唔好。
K: 你當年排 JUPAS 有無諗過大學讀 PE 呢？
其實一開始我真係有諗過，不過香港嘅大學體育科唔係太提供到我想要嘅嘢，例如有啲科係準備同學將來教體育，但我主力係想做體適能研究，而當時比較合適嘅只有香港大學嘅體育科學系，可惜當時殺左系，所以最後我選擇左讀 BBA。
其實讀大學第一年我有諗過 quit 的，不過因為殺左系嘅緣故，我就繼續讀 BBA。
K: 咁你有無後悔揀 BBA 呢?
BBA 真係完全係另一個世界，俾我學到好多 soft skills，例如令我建立世界觀，訓練我思考，同埋學習 presentation 技巧等等，我相信呢啲對我將來都好有用。
3. 咁你點樣裝備同增值自己呢?
我有上唔同教練課程，睇好多書同埋會讀一啲 online course。當我去外地做交流時會參觀唔同健身室。
我希望將我嘅興趣同知識融合再教人，呢份熱誠唔只係為賺錢，我希望帶到唔同嘅嘢俾我嘅學生，我亦希望呢個係我做教練嘅獨特性。
4. 你不如簡單介紹下咩係以色列自衛術?
以色列自衛術原稱係 Krav Maga，意思係 contact combat，起源於以色列格鬥軍方，後來有退休軍官將技術帶到民間，世界上好多軍隊同政府部門訓練都用呢套技術。
係我上訓練課程期間識到好多世界各地嘅人，例如來自以色列、菲律賓、甚至有印度軍官。整套自衛術強調意志，因為以前軍方需要嘅係生存，”give up is never an option”。
5. 我知道你今年已經係第三年係公開大學教體育科課程，係一個點樣嘅經驗呢?
其實我一開始無諗過，感激我以前嘅老闆機緣巧合下介紹呢份工，知道有機會我就由 0 開始，寫建議書應徵。到成功應徵，我要自己準備課程框架，課程內容同教材，我唔想就咁用一啲網上下載嘅教材。
我知道有啲同學將來係想考紀律部隊，所以我係意志同知識兩方面都做訓練。我會話呢個經驗無得頂，因為可以訓練到我領導同組織能力。
6. 你有無諗過將來條路繼續點行?
我當然希望搵到體適能範疇有關嘅工作。我希望之後唔單純只幫幾個人，而係可以發揮自己嘅能力改變香港運動嘅氛圍，希望人會將運動變成生活態度，例如去健身唔單純只為大隻，你仲可以改變你體質，係想身體健康啲。
我希望就算唔做教練，都努力將運動健康精神分享俾身邊人。
7. 要堅持行運動路唔容易，你有無咩想同母校師弟妹分享？
我覺得華英同學仔好乖，但同時亦有啲保守，我鼓勵師弟妹要嘗試踏出安舒區去試唔同活動或興趣，唔好只集中係自己嘅專長。
同時同學要把握自己叻嘅方面並裝備自己，唔好只顧訓練社會大眾覺得好/有用嘅事上。我地嘅教育制度比較保守，中學生其實難啲搵到自己定位。
我會話 “live your own life”，活出自己獨特嘅生活，唔係人地想你點過嘅生活。
後記: Patrick 訪問中提及媽咪曾經懷疑呀仔對運動嘅熱情，但見 Patrick 平時好怕睇英文書都睇好多同運動相關嘅工具書，加上 Patrick 長久建立嘅習慣，媽咪亦被感染開始做運動，對於運動嘅熱情，Patrick 係非常認真的！
有故事的人 Story Teller | Kenry Lee 