前言: 係剛過去聖誕節由歌手何韻詩係科學園籌辦嘅 “我們正在 On the pulse of ” 聖誕市集，我遇到 Cardia。行過檔攤嘅時候我被好多顏色吸引住，細心望下全部都係 marbling pattern，用直覺挑選左心儀紙品後，我同 Cardia 傾左陣。
1. 你可以分享一下你嘅背景嘛？你從事紙品創作幾耐呢？
其實今次係我第一次係市集擺檔。
以前中學時期我已經好鍾意手作，成日都會係 YouTube 睇片。
其實我唔係一開始就做紙品創作。我而家係日本讀緊大學，有做兼職，但我覺得人生好似無咩目標，無咩熱誠，個人好灰。2017 尾我決定新一年要踏出安舒區，2018 三月我開始規劃，尋找同試驗材質，又上網搵參考，最後搵到自己嘅風格。
其實一開始我覺得自己好似唔識藝術咁，都係逐步逐步嚟，多謝我朋友俾 feedback 我話俾我知 ok。
2. 可以向讀者介紹一下你作品嘅風格嘛?
我嘅作品係 Marbling pattern，每張作品都係獨一無二，因為顏料會自己喺水面上流動，就算喺同一地方點顏料，每次化開既形態都唔一樣，無辦法控制，所以每張作品都只此一張。
呢種風格其實多見於日本傳統藝術，但多數黑白色。我自己睇左好多外國作品，trial and error 後得出而家嘅風格。我嘅作品比起外國作品更多留白，比起日本作品就多點顏色。
3. 你嘅手作平台叫 “For you From me”，點解改呢個名嘅?
頭先提到，每張紙品都係獨一無二，而呢份心意係由大家親自挑選俾身邊人，所以好符合 For you From me 嘅意思。
4. 你有無為自己嘅創作訂立咩目標?
我本身唔係讀藝術的，但我希望大學畢業後我都可以一直做呢方面嘅創作，除左紙品，我仲有寫字，希望可以再有多啲發揮，有機會的話我都希望呢件事可以成為正職。
K: 咁你有無考慮畢業後返香港做創作？
我可能會留係日本。除左鍾意呢邊生活。紙品藝術係日本嘅發展空間多啲，多啲人會欣賞。
後記: 係的，每個人對於 Cardia 每張紙品嘅解讀都唔同，大家都用最直接嘅感覺解讀訊息，再用直覺尋找想送贈嘅身邊人，一份 For you From me 嘅心意就係唔同顏色嘅流動入面。
有興趣嘅讀者可以 follow instagram @fyfm.marbling 留意 Cardia 嘅作品
有故事的人 Story Teller | Kenry Lee 