#36 Annie Sit | 電影，電視劇助理美術指導

前言: 身邊朋友都有著唔同興趣，而醉心電影嘅就非 Annie 莫屬。Annie 由讀書年代已經經常出入電影中心欣賞唔同作品，修讀有關課程後仲投身成為電影，電視劇助理美術指導，究竟電影世界有咩吸引力呢？

1. 你可以分享下自己工作背景嘛?

我做左助理美術指導 6 年。

K: 美術指導係你想做嘅範疇？

我一直都想做同電影製作有關工作。我修讀演藝學院課程期間先知多啲有關美術指導呢個工作，我亦都多做相關嘅工作，因為我覺得呢方面幾適合自己。呢個係一個比較容易入門嘅崗位，同日常生活有關，亦有創作成分，例如我地要選擇合適主角性格嘅用品。當然亦因為咁有人覺得呢個係無咁專業嘅崗位，例如機燈組係比較 technical 嘅工作。

2. 電影製作有咩吸引你嘅地方呢?

我諗係團隊合作。

我地電影製作係 by project，我遇到嘅人都好好，大家坐同一條船，又會成日見。我覺得參與電影製作嘅人相較之下比較鍾意團隊合作。

3. 你選擇呢條路有無咩顧慮？

我屋企支持我的，暫時亦無話唔景氣。一開始其實我無諗咁多，做左先。

唔好嘅地方就係我成日唔係香港，無得同家人相處，亦因為唔係固定地點我進修唔到。

不過，每套製作之間其實有空檔，我可以做下自己嘢，所以我都好掙扎的，例如我就暫停接工作十個月先有時間學日文。

4. 係呢個行業有無遇到咩事令妳覺得好挫敗呢？

我覺得暫時都幾好。

唯一係我成日都會覺得可以再好啲，但靚唔靚，適唔適合呢樣嘢其實好主觀。

內地公司有時會令人覺得好挫敗。有啲公司用人唯親，所以引起好多混亂，例如可能用嘅人其實唔識電影製作。當然內地亦有好多專才，因為有部分人係中學已經修讀相關學科。

5. 你有無為自己係工作訂立咩目標？

我希望可以同呢個行業嘅朋友一齊製作一部戲，大家可以發揮自己專長，亦希望咁工作狀態會係最好的。

6. 點解你咁鍾意電影世界呢？

我覺得睇一套好電影就好似有一個好經歷。好嘅電影係應該睇到導演嘅價值觀同世界觀，咁樣可以豐富自己。

電影係一個渠道可以令你了解更多關於呢個世界，係學校以外嘅學習。

我爸爸都問我「電影世界係假嘅，你點解咁鍾意？」

我覺得好嘅電影係會令你知道人與人之間相處係點。而家大家都身處科技世界，人與人之間相處變得薄弱，亦唔係係教科書可以學到嘅學問，但透過電影你會知道有咩應該做/有咩唔應該做。

7. 最影響你嘅電影係邊套呢？

係一套伊朗電影 “Wind will carry us”，係講述一個由鄉郊搬到城市住嘅人嘅經歷。呢套電影對我生活睇法有改變。我覺得每個人都應該有重新檢視生命嘅機會。由於呢套戲比較靜態，令我有空間可以反思。

8. 你即將去日本工作假期，同你熱愛電影有無關係呢？

有的。當我進修期間經常接觸好多日本書籍同電影，而好多日本原著都無翻譯的，所以我去學日本，亦希望係日本生活可以令我日文更好，等我之後可以更理解呢啲日本原著。

後記: 以前好多時約 Annie，她總係話係電影中心，由讀書到出來做嘢，能夠將自己興趣成為自己工作，係一件幸福嘅事。希望 Annie 呢一年係日本會有好好嘅體會。