前言: 訪問當日見到陽光，外向嘅消防員 Don，有邊個會預計呢個曾經係中學時期非常迷失，「讀唔成書」搞事嘅學生呢？今次有幸訪問 Don，聽下佢嘅人生故事。
1. 中學時期有無咩特別原因所以「迷失」？
朋輩影響吧。我中四個陣群埋啲唔係咁好嘅朋友，跟埋成班人打交，係屋邨後樓梯流連，同埋蒲下旺角啲古惑仔 disco。
諗返起嚟好在個時無案底，如果唔係我做唔到今日嘅想做嘅事。
2. 點解會從迷失「醒覺」呢？
大概係我呀爸有一次係我中五嘅時候喊。我呀爸不惱好有威嚴，個次喊我真係好深刻。我中五畢業後唔想再讀書，但我呀爸想我讀埋個毅進課程，亦因為呢一喊我應承佢我會毅進畢業。
加上我嘅危機意識話俾我知有啲嘢我唔應該做，所以就開始醒覺。
3. 可唔可以分享下點樣由迷失，無方向發展到你今日嘅成就？
其實個轉變都好長篇。
我讀毅進期間開始遠離壞朋友，而其中一個原因係我好有意識知道我一定要畢到業。讀緊毅進有籌備下話劇，時裝表演，覺得感覺還好，但我都無話好鍾意讀書。
後來我畢業後插班去左讀 IVE，見有咩讀就讀，最後去左攝影班。
IVE 畢業後做左一年散工，之後去左 TVB 做 PA，打算係 TVB 行導演嘅方向。後來我有朋友報名考救護員，我又跟埋一齊報，但當下無諗特別去做的。
最後點解去做救護員呢，就係因為我以前賭錢。有一年世界杯，我輸左錢，有朋友叫我去澳門賭，當時好簡單嘅想法係做救護員人工高啲，我可以有多啲錢，剛好我又收到救護員最後一輪面試，最後俾我做到。
K: 咁做左救護員多左人工唔係賭多啲咩？
就係個晚去澳門，好在我輸錢，然後個晚我無船返屋企，坐埋一邊吹住風，覺得本來明明都過得 ok，做咩搞成咁，就係呢晚我決定左戒賭。
其實係做救護員期間我努力讀書。我做救護期間想裝備自己好啲，即使得自己一個都知道啲步驟點做，就係呢樣嘢令我想知多啲。最後我救護係拎「銀盾」畢業（第一名畢業）。
好多人可能唔知，其實救護員同消防員都屬於消防，但大眾會覺得消防人員勁啲，對消防員尊重多啲，個時作為救護員嘅我有種好勝心，覺得做救護員都要做叻嘅，同埋想挑戰下做消防員。
消防我其實考左第二次先得，第一次唔係好識應對考官提問，第二次我係最後講左番說話「我讀救護係拎銀盾，我知道如果我想做好件事我一定會盡力去做好」，當時心態係覺得唔講會後悔，就係咁，我最後成功考到做消防員，而家已經做左六年幾。
4. 由迷失到醒覺，有無特別想多謝邊個？係咪就係爸爸？
我諗係，如果唔係個日嘅眼淚我未必會咁深刻。
如果真係要講嘅，可以話多謝當日叫我考救護嘅朋友。不過我成日都鬧佢，佢係消防員但就叫我考救護員（笑）
整體而言其實我都係順應天嘅安排同變化所以走到而家呢步。
5. 你做過救護員，有提及大眾對消防員投放多啲目光，而家做左消防員，個感覺有無唔同？
我兩邊都做過，我覺得仍然存在我講嘅情況，但起碼我自己會尊重救護員。有時同事未必明白點解救護員要咁做，我就會同其他消防員解釋。
我覺得消防員有「光環」係因為佢地係衝入火場嘅人，傳媒捕捉嘅自然係佢地，但我想話救護員嘅職責一啲都唔比消防員輕。
6. 做左消防員後對生與死嘅睇法有無改變？
我成日都話而家嘅願望係自己同身邊人身體健康同開心，第二步先係諗錢，地位個啲。
我當然都有經歷過好多生命好脆弱嘅時刻，而家嘅我會同自己講「我係幫人，唔係救人」。我覺得生死唔掌握係消防員手中，有時連醫生都控制唔到，所以如果冠名係「救人」你就會好大壓力，好多情緒。我而家係盡力幫人，同埋希望唔好係因為自己做得唔夠好令其他人受影響。
7. 你希望你嘅故事可以為年輕人帶來咩提醒？
我會話千其唔好咁快放棄。
我知道有時候讀書時期會唔知自己做緊咩，又可能唔明點解要讀某啲科，將來感覺用唔返。
我會鼓勵大家搵自己有興趣嘅嘢，當你開始專門研究呢樣興趣嘅時候，你自然會變得專業，或者你會想自己專業啲。
人生太多估唔到嘅事有機會發生啦，俾個例子，可能有人好鍾意飲酒，可能當你將呢樣嘢發展做事業，你可以做調酒師，甚至擁有自己嘅酒吧。
K: 你以前讀第三組別學校，最後都係救護學校第一名畢業，你會唔會覺得其實所有人都讀到書嘅呢？（笑）
我覺得係㗎，你搵到自己嘅興趣，你就會有動力讀好佢。
後記：訪問當日其實係我同 Don 第一次見面，感謝 Don 真誠分享自己嘅故事，在此祝 Don 工作順利，亦感謝我嘅中學同學 Hei 介紹 Don 做有故事的人。
有故事的人 Story Teller | Kenry Lee 