前言: 手工皮革製品係香港近年大受歡迎，好多人都試過參加工作坊親手準備禮物俾身邊人。Creamson 係 Craftihood 主理人，平日除左接受訂單，亦有開辦 workshop，今次我地一齊了解下佢嘅皮革夢。
1. 你係幾時開始接觸皮革嘅呢？點解會以呢樣工藝創業？
我中七 study leave 時留意到呀哥對日本手造銀包有興趣，於是我就開始去接觸。我無去上堂的，主要睇書同 Youtube，去了解唔同工具同用法，後來去深水埗考察。
大學期間我一直都有研究，2013 我第一次將產品係網上賣，主要係靠 Instagram 同 Facebook 宣傳。
大學畢業後我做左半年全職工作，但因為呢份工我完全無時間整皮，加上又唔係太開心，所以我就將儲落嘅錢係觀塘開 studio。
K: 你呀哥知唔知你開始整皮係因為佢？
我無特登講呀，不過佢一直好支持我做自己鍾意做嘅事，係我觀塘 studio 開張亦幫好多忙，因為佢覺得係我人生嘅轉捩點。
2. 皮革有咩吸引你嘅地方？你希望你嘅顧客係 Craftihood 感受到啲咩？
我諗係皮革帶俾我嘅成功感同個份自我肯定。整皮革令我個人好有自信，每次我只會想做得更好。當然過程中可能會遇到 frustration，但通常一段短時間後就無嘢。感謝我屋企人，朋友支持，令我夠膽，放膽以皮革創業。
我嘅客人嚟到，最基本就係我希望客人有一件滿意嘅手作，而過程中我希望客人學到嘢，為左保證有質素，我有別於其他 workshop，我主要 1 對 1，最多 1 對 2。
3. 自己創業遇到咩困難？
我諗大致四樣。
第一，我除左教人整皮外，仲會接訂單整貨品，但有時可能只靠訊息溝通，件貨品整好左唔完全係對方想要嘅，咁可能又要再整過。
第二我諗主要係客源。香港有咁多皮革工作坊，其實競爭好大，我都係靠口碑同靠網上渠道宣傳。
第三係設計款式吧。設計總會遇到瓶頸嘅時間，而你設計左亦有機會被其他人抄襲。
最後係收入唔穩定。特別節日例如聖誕，情人節係最忙碌嘅時間，但一年好多時間其實都偏靜，呢啲時候就靠一啲優惠吸引顧客，亦襯呢啲時間諗下新款式。
當然以上並未包括要交租、原材料成本、工具耗損等等，呢啲都係經營嘅困難。
K: 中間你有試過其他形式，例如同其他人合作，亦搬過幾次工作室，呢啲有無令你覺得有阻礙？
我覺得經歷過先更了解自己想要咩。同人合作過我先知我鍾意自己做，因為啲產品唔經我手我會擔心，會有壓力。我覺得我而家搵到自己想要嘅模式，想專心做好自己嘅品牌。
4. 過程雖然遇到困難，有咩令你堅持落去？
最主要當然係整皮帶來嘅快樂。我屋企人、朋友、伴侶嘅支持都好重要，例如遇到瓶頸/困難我地會分析下，再一齊諗解決方法。
5. 你有無咩價值觀想透過 Craftihood 傳遞的？
其實好多時我都會聽到人地形容我地係「手作仔」，似係用嚟 hea 時間，但其實皮革係一門工藝，一門技術。
我鍾意擺市集係因為我可以面對面同顧客解釋產品用料，製作過程，而呢啲其實亦係教育。香港人太愛追牌子，但其實手作背後要付出好多，所以要多欣賞。
K: 1-10 分 （10 分最高）你認為香港人尊重 / 欣賞手作製品嘅分數係?
6 分吧。手作文化係鄰近地區例如台灣同澳門都好好多，我會俾 8 分。
6. 你為自己訂立嘅目標係？
我希望可以有多啲寄賣店鋪，而且可以係多啲國家擺賣。我亦希望可以去多啲國家擺市集，例如歐洲，感受人地嘅風氣。最後，我當然希望可以有屬於自己嘅實質店面。
7. 有無咩想同年輕讀者分享？
如果遇到自己嘅興趣，努力將呢樣嘢變成事業，咁樣你會有推動力，做起上嚟亦會開心啲。
K: 我有聽過相反說法，唔好將興趣變成工作，因為怕會變質，你有咩睇法呢？
我諗好睇個人，我就希望分享自己鍾意嘅嘢俾身邊人。我希望有日當其他人睇得起自己，我可以證明我係得的，亦會帶來更大成功感。
後記: 訪問當日，Creamson 雀躍分享自己嘅皮革夢，縱然提及困難，Creamson 仍然對自己嘅選擇好肯定，因為皮革係佢好鍾意嘅手藝。有興趣了解更多嘅讀者可以 add instagram craftihood 或 Facebook search Craftihood – Hong Kong Handmade Leather。
有故事的人 Story Teller | Kenry Lee 