前言: 訪問 story teller #41 Creamson 當日見到工作坊有好多手製耳環，縱然係男仔，目光亦被呢啲咁特別嘅耳環吸引住，細問之下原來 Steffa 同 Creamson 一齊合租工作坊，今次我地了解下另一雙巧手。
1. 可以分享一下你嘅背景嘛？整耳環係你一直嘅夢想？
我整左手造飾品大概兩年，但主要係耳環。其實我從來無特別計劃去整耳環，只係兩年前待業期間我想搵啲嘢做，我覺得耳環唔難整，加上自己鍾意，所以就開始左。
我一開始擺市集係幫人畫 Henna，當時市集嘅檯面放置左啲耳環，發現都幾多人好評所以就主力做耳環。
我有一段時間好迷失，一來我唔係好鍾意呢種感覺，二來當時有人話我「高不成低不就」，所以我想創造屬於自己嘅嘢，於是就開始設計耳環，所以我都可以話係因為好勝心促成左我嘅事業。我想證明自己得，加上想證明耳環設計其實唔難。
2. 我覺得你設計嘅耳環有別於我見過嘅耳環，可唔可以介紹下？
我會話我係行復古風格，係 7，80 年代 disco 風，所以會有好多閃、撞色、金色嘅款式，有啲嬉皮、吉普賽、波希米亞風格。
3. 創業過程中遇到咩障礙？
當然一開始收入唔多，而屋企亦 support 唔多，係開始左大概半年，因為一次去澳門擺市集，有人表示有興趣，所以開始左係澳門寄賣。好在呢段艱難嘅時間唔係好長，我亦無諗過放棄，因為我知道要堅持先有機會搵到多啲錢。
屋企人例如我外公會想我搵份全職工作，連我朋友初期都會覺得我應該正正經經搵份工。不過隨住我做到有成績，屋企人而家都好正面，例如會去市集支持我。
4. 你由一開始無諗過整耳環，到而家兩年時間，心態上有無轉變？
我都有問過自己係咪繼續，我覺得我仲想繼續做，短期目標我希望參加多啲市集，有多啲寄賣點，甚至有實體店。長遠嘅目標我希望可以有多啲唔同類型嘅飾品，衫，袋等等，建立自己嘅品牌。
5. 你由無方向到而家目標清晰，有無咩說話可以同讀者分享？
我覺得如果你係知道自己想要行咩路嘅人，你應該要清楚了解入場卷係咩。如果你無方向的話，嘗試多啲，唔同經驗，不論好壞，都會話到俾你知你想 / 唔想要咩。
多啲同其他人傾計亦好重要，可以更了解自己。
我亦建議無方向嘅人多啲一個人出街，等自己有思考空間，你亦可以做啲平時自己唔會做嘅事。
最重要你唔係要似人地，係要問自己想點。
後記：聽完 Steffa 分享，留意到有一部分人可能從小已經好有方向，但亦有部份人可能係經嘗試後搵到自己鍾意/想做嘅事。Steffa 嘅好勝心成為創業嘅堅持，令自己嘅手作有而家嘅成績。
有興趣嘅讀者可以 Facebook search AMLAS 或 Instagram search Amlas.s 留意 Steffa 嘅產品。
有故事的人 Story Teller | Kenry Lee 