前言: 有幾多人願意捨棄穩定工作同收入，踏出自己嘅安舒區，嘗試全新嘅挑戰？Peann 同 Jay 創辦環保社企綠行俠，回收咖啡渣再造環保產品及售賣各種環保產品，由參加創業計劃到發展業務幾年，究竟呢兩位年輕人背後有咩想法？
1. 你地可以分享一下你地創業嘅契機嘛？有咩令你地踏出安舒區呢？
J: 我諗係不甘於平凡。其實我中七畢業後已經有一次創業經驗，當時我想做啲唔同嘅嘢，同埋我覺得就算唔成功我都無咩損失，無咩係輸唔起。
我覺得就算唔成功我都無咩損失，無咩係輸唔起。
同時我都希望自己係一個有故事的人，希望將來回望我有故事可以分享。創業與否當然我都有好多考慮，加上 Peann 邀請，所以我都想嘗試。
P: 我本身嘅工作其實俾到好多機會我，但我要不停加班，同埋我覺得我對社會好似無咩貢獻。
我希望可以更好咁運用我嘅時間，亦為社會帶來一點影響，而我同 Jay 都覺得環保係一個我地可以入手嘅範疇。
同時我亦預計到原先工作嘅 career path，我覺得唔完全係我想要嘅嘢，所以我想試下創業，去探索下。
當時見到創業計劃嘅廣告，覺得係一個好機會等人地話俾我地知我地嘅意念 work 唔 work，所以我就同 Jay 組隊參加。
K: 有無咩特別原因令你會想為呢個社會帶來影響呢？
P: 我諗係中六嘅時候參加青協嘅社會服務。個陣我地要諗自己嘅計劃，會留意社會需要啲咩，然後當成功推行你發現原來可以用自己力量幫到其他人。
2. 創辦綠行俠幾年，暫時最有滿足感嘅事係？
J: 我諗係我地見到個轉變。我地實現到好多計劃，甚至係旁人覺得唔可行嘅計劃。
我地可以改變到客人嘅選擇，例如唔同公司願意選擇環保產品，個別客戶我地亦睇到取向嘅改變。
P: 最有滿足感應該係衝破瓶頸。由創業比賽到真正營運公司，其實我地有好多猶豫，都好一段時間處於瓶頸。年幾後開始明朗，我地有自己辦公室，而家有職員幫手，我覺得有人一齊努力緊嘅感覺好好。
3. 1-10 分（10 分最難），你地覺得係香港推行環保有幾難呢？
P: 我俾 5 分
J: 我俾 4 分
P: 我覺得香港唔算好差，新加坡更差，我地試過係新加坡擺攤，有人買環保飲管都想拎個膠袋。日本算比較好，因為人地簡約，亦會有善後工作。
J: 我覺得香港嘅風氣可以再改善。雖然政府有時推行環保政策，但好多內部人員都唔係真係咁配合。例如有時佢地想整環保產品，但又想低價，最後可能選擇左好多塑膠成份嘅產品。
至於市民，多數都係因為唔方便所以先唔做。同埋香港好多人唔環保，亦唔想你環保。我地見過有人係網上張貼同環保有關嘅訊息，底下有好多負評，亦惹到其他人追擊。
J: 我諗成人更需要多啲時間去改變想法。我地去過小學做環保講座，小朋友都好雀躍，但家長可以一盤冷水潑埋去，覺得我地唔實際。
4. 你地希望達到咩目標呢？
P: 當然好似我地所講，希望每個人都係綠行俠，同埋希望有一日我地唔使介紹自己公司人地都知我地做緊咩。環保呢件事當然我地希望做到日常生活化，唔會好似做緊咩特別事咁。
J: 我希望會有更多人認同我地做緊嘅嘢。而且我希望將來就算我同 Peann 因為某啲原因唔係到，公司仍然運行到，仍然秉持到綠行俠嘅理念同精神。
5. 你地以前嘅訪問提及過行動力同決心嘅重要性，你地覺得創業仲有咩重要素質呢？
J: 我會話係去適應嘅能力。市場需求經常改變，你都要有調節嘅能力，點樣改變，幾時改變係重要嘅學問。
P: 我地出嚟做嘢，可能同時要拋接好多波，除左要接得住，我仲堅持要有質素。我會花時間去度細微位，人地收到件貨會點諗，好多時我地嘅客都會驚訝我地主力得兩個人。
Multi-tasking，時間管理，如何排列優次都好重要。與其只話創業，其實大家唔可以忽略 soft skills 嘅重要性，你對事情嘅敏銳度亦好重要。
6. Peann 你之前去大專分享，覺得學生創業信心好低，你地有無咩鼓勵說話可以同年輕讀者分享？
P: 我覺得佢地咁無信心係因為了解得太片面，同埋只係集中睇到負面報導，例如租金貴人工貴，但佢地有無了解過實際情況係點呢？其實創業嘅初頭係唔需要即刻請人同租 office。
之前同中學生傾計，有啲都好負面，覺得無人欣賞自己，自己無機會。但我會話只係讀書叻唔夠，soft skill 亦好重要，所以有自知之明好重要，你想人地俾高人工你，但你係咪值呢個人工呢？
之前我有帶過中學嘅創業計劃，參加者全部都係讀書叻嘅同學，但同學嘅 commitment 好少，時間管理唔好，所以如果年輕讀者參加比賽的話，應該要好好把握每次機會去學習。
J: 我會鼓勵佢地多嘗試，鍾意嘅嘢多嘗試。當然要先考慮屋企情況，然後你再衡量自己有咩籌碼可以輸。
P: 仲有就係頭先提過嘅行動力，如果只係得把口好難可以創業成功。
後記：準備訪問過程細閱二人以前嘅訪問，睇到佢地對環保同營運綠行俠嘅熱誠。訪問當日聽到兩位所講，所付出過嘅努力，就知道兩位今日嘅成就係靠自己雙手打拼返嚟。祝更多人認識綠行俠，亦希望可以早日達成 Peann 同 Jay 嘅目標。
有興趣嘅讀者可以 Facebook search and like Eco-Greenergy 綠行俠 了解更多。
有故事的人 Story Teller | Kenry Lee 