前言：社會上較幸運嘅一群，能夠享受較多資源，參加唔同課外活動，興趣班；相反，低收入家庭兒童缺乏資源，未必有機會體驗，參與。幸運嘅人享用左資源後有無回饋社會，幫助缺乏機會嘅一群呢？今次訪問到義教鋼琴組織 WeWah 嘅創辦人之一 Javier。
1. 點解你同其他核心會員會有義教呢個概念呢？網上其他訪問有提及係同早幾年政府派嘅 $6000 有關？
係的，當年政府派 $6000，我同幾位中大朋友諗筆錢點樣可以用得有意義，當時社會剛剛冒起「贏在起跑線」嘅概念，朋友之後再介紹其他有相同想法嘅人俾我，我地就由貧窮兒童議題入手，諗到佢哋因為相對中產家庭無咩機會參加課外活動，所以我地想係呢方面入手。
我地嘅成員唔係個個都識鋼琴，但認為鋼琴已經係課外活動嘅基本，而當時坊間亦無鋼琴義教服務，所以我地就嘗試以義教鋼琴為本位，成立 WeWah，亦開始係教會同非政府機構搵地方，以義教提倡平等嘅概念。
2. WeWah 運作左8年有咩難忘事？
開心、唔開心嘅都有。
開心嘅事當然係見到學生嘅成長。我地會見到有啲小朋友一開始好驚，學左鋼琴自信多左，開心左，呢啲改變都係我地值得開心的。亦試過有學生跟我地學左三，四年去考試，考到 distinction，呢個成績對我地黎講都好鼓舞。
唔開心嘅係有時有啲家長可能見到免費就立刻報名，但又無同小朋友溝通，小朋友可能其實興趣不大。我地嘅資源有限，希望可以幫到真正有需要嘅基層兒童。
3. 營運 WeWah 幾年遇到咩難處？
無錢！呢樣嘢好現實。
其實要成功做到義教唔容易。第一，要搵到固定教琴地點唔簡單，琴行自己都要做生意，好難承諾到長期固定的合作模式。試過有教會因為地產霸權緣故需要搬遷而唔可以繼續借出場地。
另外人都係一個考慮。
我地核心成員其實好多都因為不同原因離開左，要搵到老師固定義務教同有理念嘅幹事會新血都唔容易。
4. 義教後你對「學鋼琴」/ 「教鋼琴」嘅看法有無改變?
義教嘅小朋友佢地一定要幾鍾意，先會願意跨區去學鋼琴，我地見到有熱誠繼續學嘅小朋友越來越多。
我自己係十分鍾意彈琴，但見好多琴行學琴嘅小朋友都係因為家長逼先去學，所以就多啲機會放棄。
我觀察到香港好多人學鋼琴呢件事好似好功利咁，例如為證書，為左入好學校，我地希望義教係真係培養小朋友鍾意音樂，所以除左真係好有天份嘅學生，否則我地頭三年都唔係以考試為目標的。如果第四年真係有咁嘅機會，我地都只係當個考試係 bonus。
5. 你同其他核心成員期望 WeWah 達到咩目標呢？
我地希望可以係社會推廣「藝術普及；平等分享」嘅概念，亦希望多涉及公眾參與，所以我地有唔同工作坊同大師班作為公眾藝術活動嘅一部分。
我相信一個地方若藝術/美感教學做得好，個社會唔會差得去邊，例如人與人之間嘅相處。
音樂呢樣藝術係跨越文字，不受語言所限，唔同人都可以享受，一齊欣賞，我地希望大家可以找尋音樂嘅純粹。
其實音樂教育無止境，當然我地希望有資源可以長期繼續呢件事。
6. 你對年輕讀者有無咩分享同提醒？例如係學音樂嘅初心？
我記得前排有個小朋友表演，雖然只係瑪莉有隻小綿羊呢首比較簡單嘅曲，但見到小朋友認真嘅態度，我聽到個下真係好感動，我亦係好多小朋友身上見到多元性，可塑性。
我覺得提供義教嘅人都要注意心態。有啲年輕導師可能對受益人期望好高，但當對方未必有相應付出嘅時候，佢就好失望。但其實我地義教更需要同理心去理解義教對像，了解佢地生活上所面對嘅困難。
後記：係香港呢個現實社會要做義教實在唔容易，要有有心人要有地方，所以 WeWah 都有轉緊型，希望為義教基層兒童呢件事可以持續落去。有興趣了解更多嘅讀者可以 Facebook search WeWah音樂家 了解更多。
有故事的人 Story Teller | Kenry Lee 