前言：當我邀請媽咪做訪問嘅時候，媽咪問我點解要搵佢，我解釋媽咪雖然咁多年都係護士，但卻係唔同部門都有做過，我覺得咁樣都係踏出安舒區嘅一種。而且，第 50 個有故事的人當然要搵個重量級人馬。
1. 你係咪細細個開始已經想做護士？
其實我以前從來無諗過做護士。我中七畢業之後因為升唔到大學所以開始諗自己想做咩，當時我想做老師或者秘書。個陣我報左商科學校嘅秘書課程，但面試個陣個修女猛鬧我地班申請者，我俾佢嚇親所以最後無讀到。
當時有個朋友嘗試報 nursing，我又一齊試下，我記得當時面試人地問我要讀咩我都唔知，但最後我有機會讀到，然後就開始我嘅護士生涯。
2. 我記得你唔係第一次就成功入大學，點解你最後都讀返呢？尤其當時讀大學仲要係件難事。
做左幾年嘢之後，見到身邊都有啲人讀返 degree，不過我無話因為咁所以跟風想讀。反而係有一日見到大學 leaflet 內容覺得吸引有興趣想讀，所以就報名。成個大學課程我都好有動力去讀。
3. 護士呢行應該大多數人都係留係自己熟悉嘅範疇，點解你會選擇唔止一次轉去新範疇呢？
其實我都真係試過好多部門。以前嘅制度係不斷調職令你熟悉唔同專科嘅護理，所以畢業後幾年內我做過骨科、內科、外科、深切治療部同急症室。身處深切治療部嘅時候有機會接觸產科嘅知識，後來有機會就去贊育醫院做咗十幾年產科，亦係呢個地方我升咗做病房經理。
後來產科重組，部門調上瑪麗醫院，出現人手過剩嘅情況，剛好當時見到另一間醫院嘅急症室有位，所以就申請過去。
K: 當時由熟悉嘅產科去好耐無接觸嘅急症室無有猶豫？
當然有猶豫，但我覺得病房經理唔係全部前線工作，我嘅心態係雖然好多唔識，但我可以重新學習，仲可以 update 返急症嘅 skills。
係呢間醫院做嘢期間我完成一個關於 behavioural health 嘅碩士，覺得自己對cancer care 有興趣，但好似急症室工作唔係太多機會用到。同時因為呢個部門有啲人事問題，所以我都有探索有無其他機會。
剛巧瑪麗婦科有空缺，我知道可以應用我嘅碩士知識，所以我就決定試下。其實同上一次轉變一樣，好多嘢我都唔識，不過好在我對呢個專科有興趣，所以我都好有動力去做，更好嘅係我可以係呢個部門應用我係其他部門嘅已有知識。
K: 你覺得你願意轉變同你性格有無關係？
我覺得唔係太關事，其實我本身唔係特別話想求變，但環境因素令我有機會轉變。有宗教信仰嘅我當然會覺得係神嘅安排啦，不過都係際遇令我離開安舒區。
4. 你覺得你一開始做護士嘅目標/抱負實唔實踐到？
咁多年嘅前線工作無疑係令我嘅目標能夠實踐。我希望幫助有需要嘅人，尤其係留院嘅病人，我覺得就算係傾計都好，都係幫助緊病人嘅精神健康。
好多人或者會選擇私家醫院，我就希望可以幫吓基層有需要嘅病人。好多人會覺得護士行業辛苦，工作性質厭惡，我覺得又唔算好辛苦，其實行行都辛苦，但工作好 rewarding。
5. 好多年輕讀者都對護理學有興趣，你有咩說話可以同佢地分享？
如果真係想做護士要「有心」，要真係有心幫人，唔係因為人工高而做。大家要有心理準備係辛苦，要有心服侍人。雖然近年做醫護工作壓力大，但係一件神聖工作。
K: 而家傳媒報導公立醫院情況惡劣，有無咩想同讀者分享？
而家入住率過高，加上人口老化，對醫療系統真係有壓力，同時私家醫院人工高啲，流失率亦高，所以公立醫院人手都唔夠。我覺得留係公立醫院嘅都係有心人，但個環境令病人未必得到最理想嘅護理。
我覺得病人家屬同護士們都要包容多啲，互相體諒。例如有時候病房好忙，可能語氣會麻麻，但病人家屬因為擔心就會令情緒放大左，繼而引起衝突。所以我地雙方都要從人地角度感受諗，同埋有時候處事係咪可以存在一啲彈性。
後記: 同媽咪訪問過程勾起咗我一啲童年回憶，亦解釋返點解會有個啲片段。媽咪訪問最後話其實當時讀大學有覺得內疚，因為我讀幼稚園嘅時候寫字功課成頁錯曬，原因係佢要返學所以要菲傭姐姐教，聽到個下笑死
有故事的人 Story Teller | Kenry Lee 