前言：經荃灣學生 Raymond 介紹下認識左佢嘅模型老師，Adam。一直知道部份同學有砌模型嘅興趣，所以決定自己都去認識多啲。見面前望下 Adam 製作嘅片，以前嘅訪問，可能你都會驚嘆當專注嘅時候，一個興趣都可以做得好專業。
1. 你係幾時第一次接觸模型？你又幾時發現自己咁鍾意呢項興趣呢？
其實一開始係小學嘅時候睇高達卡通，然後想買玩具，未話特別鍾意住。去到中學嘅時候，我睇好多模型雜誌，覺得自己嘅作品同雜誌上差太遠，好想追求好啲。加上本身我有畫畫，所以對手工藝都有興趣。
2. 你覺得大眾對砌模型呢樣興趣有無咩誤解？你又有咩睇法呢？
好多人都會覺得呢樣興趣好「毒」，好「宅」，我認為大眾對「毒」呢個概念有誤解。我覺得對一件事「毒」代表你好專心去做一件事，而每個人都應該有「毒」嘅一面先完整。
香港人無咩嗜好，當有人好專注做一件事嘅時候就俾人標籤「毒」，其實好多人眼光好窄。
K: 而家時下興講 “me time”，砌模型係咪你嘅 me time 呢？
係呀。
K: 我嘅印象覺得鍾意呢個嗜好以男士居多，係咪真嘅呢？
係的。以男人為主，但女士參與其實都有上升趨勢。
3. 你係砌模型做過最瘋狂嘅事係咩呢？試過砌一件模型用幾長時間完成？
我試過最長用兩個幾月完成一件作品，當中包括砌嘅過程同拍片。
我覺得最瘋狂嘅事係我無接 studio job，專心預備比賽。外面嘅人好少為左比賽完全放棄接 job，因為如果比賽輸左就蝕好多錢，但我想專注啲個比賽，所以有咁嘅決定。
4. 你係點樣發展到擁有自己嘅工作室？途中有無遇到咩障礙呢？
好多人都會問，究竟興趣應否變成職業，我覺得同你係邊類人有關。雖然你好鍾意某樣興趣，但你嘅性格可能比較適合打工。
由細到大我都覺得自己唔適合打工，最初我對於想做咩係無咩方向的，但當然一路都有個想開工作室嘅情意結。開工作室前我係做廣告同 freelance 幫客砌模型，離任廣告公司後未搵到工，我亦發現自己夠客，所以就試下開工作室。
至於你將唔將興趣變為職業，就要睇你係咩人，我覺得可以有個藍圖，再見步行步。但如果決定要自己創業，就要接受有高高低低，有風險。有啲人可能會因為呢樣嘢自憐，覺得生存唔到，我覺得決定左就要做到，要有規劃。
我想創業嘅時候屋企都講左兩句，但佢哋支持的。如果你真係鍾意個件事，你會堅定，唔會咁容易受旁人說話影響。
5. 成立工作室後最有滿足感嘅事係？
以前未有工作室嘅時候我會幻想成件事好型，但擁有之後發現其實都無咩特別（笑）。我諗最有滿足感係贏比賽。我本身唔鍾意參加比賽，我同自己講如果贏到冠軍就唔再參加比賽，最後我得到第三名，我覺得呢個名次俾我嘅提醒係叫我唔好停住，但同時有滿足感係因為付出完有回報贏到比賽。
6. 你設立工作室有咩目標呢？
我覺得有兩方面。
第一係我希望擁有自己嘅產品，創作人總想有自己品牌。
第二係開左工作室後我發現好多中年人士都有參與，成件事好大同，無話要咩人先可以砌模型，當然如果你有某啲技能，你會容易掌握某啲技巧。
我希望透過係社交媒體嘅分享可以令人有啲啟發，砌模型方面又好，或者係做人嘅態度。希望有啲鍾意砌模型但因為種種原因放棄左嘅人可以參與返。
7. 有咩說話可以同年輕讀者分享？
頭先提過我以前只知自己想創業，但實際咩事業我係唔確定的，所以當你唔肯定自己想做咩嘅時候，代表你可以試嘅嘢有好多。
有時候當你唔清楚自己想點，咁就先專注做好目前嘅責任，例如讀書。有啲年輕人會覺得讀書令佢地發展唔到興趣，我覺得唔可以咁樣自怨自艾，兩者並無矛盾，點解你唔可以讀書同追夢同時兼顧呢？當你好鍾意一件事嘅時候，你總會有辦法，而唔會俾其他嘢影響到。
最後就係，就算有啲嘢你唔想做，去到某個位你都要有行動，唔可以話唔鍾意就完全無行動，試左就真係了解自己點解唔鍾意，唔好就咁坐係到等機會到。
後記：訪問當日去到 Adam 裝修得好靚嘅工作室，見到好多模型組件，有展示櫃，加上 Adam 製作嘅 YouTube 影片，完全感受到佢對砌模型呢件事係幾咁專注同認真。有興趣嘅讀者可以 search and like Facebook page N.Maker 製作工場 and Instagram n.maker 睇下作品同上堂時間。
有故事的人 Story Teller | Kenry Lee 