前言：近年都會有種感覺現代人太多娛樂可以選擇，紙本閱讀好似係香港越來越唔普遍，又或者想閱讀都無咩時間。係何文田第二年任教嘅時候有機會同圖書館主任麥太合作，今次我邀請佢同我傾下佢同書本嘅故事。
1. 可以同讀者分享一下你嘅入行經過同工作嘛？
其實我唔係一開始就擔任圖書館主任，1981 年我係做中文，體育代課老師（2015-16 2D 同學仔應該記得聖誕 party 麥太嘅厲害)，去左另一間中學教三年，85 年再返何文田，直至 1991 年前任圖書館主任離任，我就試下申請。
K: 當時點解會想試做圖書館主任嘅？
其中一個原因同我家庭規劃有關。當時我已經有計劃生小朋友，我想留多啲時間俾屋企，所以試下教擔較少嘅職位。
K: 當年電腦未普及，你點樣處理你嘅工作呢？
一開始我都係由頭學起，頭兩年嘅在職培訓教我點樣買書，點樣同唔同科組老師合作。圖書館無文員，全部我一腳踢，當時我搵左啲有經驗嘅同學幫手，有系統咁排列圖書館藏書。
1993 年學校都未有資源，但我就自己買左電腦，學點用 excel，嘗試快捷啲排書。整體都係邊學邊做，除左讀書，當時仲要學寫網頁，係以前個年代真係唔容易。
2. 你作為圖書館主任嘅使命係？
我希望同學識得善用呢個寶庫。同學以外，我亦著重培育學生圖書館管理員，提升同學個人素質，擴闊眼界同發展唔同共通能力。我期望培訓唔同學生圖書館管理員隊伍，由高年級帶動低年級學生，應對唔同任務同解決問題。
3. 現今科技下，大家好似都忽略左紙本閱讀，覺得最可惜嘅係？
閱讀除左可以令知識增長，通過唔同人嘅見解仲可以刺激我地嘅創意。
而家部分人會選擇電子書，不過網上都有分析覺得紙本可以令讀者更專注，亦提供更多時間俾讀者沉澱，而且真係拎住一本書嘅感覺其實好唔同。
當然有時間進行紙本閱讀更好啦，但如果無的話電子書都係一個選擇，但我深信紙本閱讀係不能被完全取代。
4. 同你合作做班主任嘅時候，好深印象你要同學做讀書報告，你對於學生閱讀同做讀書報告堅持嘅原因係？
我主要希望同學從低年級開始培養閱讀嘅習慣，透過書寫可以加深同學對本書嘅印象。我期望做到「聽、講、讀、寫」嘅練習，等同學可以沉澱，亦通過閱讀報告唔同部份刺激思考。
閱讀其實亦可以提供動力俾同學吸收課外知識，就算同學可能係某學科考試表現未夠好，閱讀仍然可以令有興趣嘅同學知多啲。
5. 有無去過邊個地方覺得人地嘅閱讀習慣/模式好深刻？
我去旅行未有機會深入了解外國嘅閱讀模式，例如可能歐洲某啲圖書館只限國民進入，但唔講模式，我覺得台灣嘅閱讀氣氛好濃厚，每次我同先生去誠品都會見到好多人係度「打書釘」，有好多空間俾市民閱讀，反觀我地香港嘅書局無呢種氣氛。
6. 閱讀對你人生嘅影響 / 重要性？
閱讀開闊我嘅眼界同提供左一個思考空間，亦係我一個良伴。閱讀又係我減壓嘅方法，係我屋企唔同地方都會有我睇緊嘅書。有時學生分享嘅書我又會睇下，我試過學生介紹一本小說，最後我睇曬全套。
7. 有無咩奮勉俾年輕讀者 / 分享上班族可以點樣運用時間閱讀?
上班族可以用通勤時間，係電話閱讀報章或者係 YouTube 揀有興趣嘅片，可以的話同朋友傾計時可以分享最近閱讀過嘅有趣內容。另一個閱讀時間可以係睡前，睇一啲輕鬆啲嘅，例如旅遊雜誌。
上班族其實都有分消閒或比較認真嘅閱讀模式。前面講嘅就係消閒，有時行下書局可能會發掘有趣書本。至於認真模式，可能就係為左解難，為左某樣技能，例如種花，所以上班族其實都好多機會可以閱讀。
同學們呢，我鼓勵初中時期多閱讀，因為上到高中同學就要忙於應付公開試，可能要去到大學先有機會多啲時間做到消閒閱讀。除左閱讀，希望同學可以做到頭先提及「聽、講、讀、寫」，嘗試投入書嘅情節，可以稍微記低重點，並採用唔同角度思考問題。
後記：進行訪問之前，麥太剛好教緊學生唔同解難嘅方法，聽麥太分享佢點樣有系統咁培訓同學們，就知道麥太擺左幾多時間係咁多年嘅學生圖書館管理員同係圖書館度。麥太提及擔任圖書館館長二十八年，今年榮休，希望麥太退休後生活愉快，身體健康。
延伸閱讀
印象好深刻前任中文大學校長沈祖堯曾經同年輕人分享閱讀習慣:
「有一件東西，希望大家不要失去的，就是閱讀的習慣。因為很多良好的品德，就在書本裏。有閱讀的話，會吸收很多好品德，包括做人道理、眼光、價值觀，令你更成熟，令你對社會更有關懷。當你只顧自己，又不看書，只是走自己的路，容易走錯。一年內看到五至十本書已經很好。」
延伸活動
今年書展開始左啦，去到 23rd，各位讀者想搵心水好書就行動啦！
有故事的人 Story Teller | Kenry Lee 