前言：係荃灣任教最後個年有一個中一同學不時會請假去比賽，同學會話「佢去體操比賽呀」，當時聽到已經覺得好厲害。當我親眼見過 Daisy 係校內表演更加係讚嘆不已。Daisy 作為前港隊藝術體操隊成員，究竟華麗動作背後要付出幾多努力？
1. 可以分享下你如何走上體操嘅路嘛？
小一嘅時候學校有競技體操隊，當時見到覺得啲衫好靚，但屋企人覺得危險所以無玩。小三嘅時候學校開辦藝術體操嘅興趣班，於是就試下，而呢次嘅經驗俾我見到自己柔軟度高，體操方面算有天份。
雖然我遲過部分人開始，但由於我開始時大個啲，亦相對無咁容易出錯。升到小四小五，我加入左一支精英隊，亦開始密集訓練，大概五個月後評估過後我入選港隊體操隊。
K: 入港隊後有咩特別體會呢？
其實我喺精英隊(港隊下一級) 練咗一個禮拜已經想走因為自己體能弱，覺得好辛苦，上到港隊就更加啦。我一開始跟得麻麻，頭三四年都係下游狀態，其中一個原因係驚教練鬧而令自己緊張比賽容易失手。雖然係咁，我無輕言退出，因為其他比我大嘅隊友都好鼓勵我，佢哋亦都係我嘅學習對象，所以我嘅意志力慢慢加強，努力練習。
2. 你最鍾意藝術體操邊個部份呢？
藝術體操唔係鬥快，其實更加似一個表演。好多運動感覺係一直線，要衝要贏，體操變化會多啲，可以俾機會我自己篇套路，當試到可行嘅時候會有滿足感，有時其他人會覺得某啲動作唔靚，唔好做，我就鍾意試下點樣融入到。
3. 你參與藝術體操有無遇到咩困難？
體重 (笑）（一秒回答）。
體操運動員對腳要瘦（但眼前嘅 Daisy 其實好瘦）
K: 咁你使唔使成日 keep fit?
要留意飲食㗎。其實我有經歷過一輪食完嘢會有罪疚感的，所以食完會令自己嘔返出來，去到高中開始欣賞自己身形多啲，接受自己，唔太理會人地目光。
K: 練體操同讀書，尤其高年級，時間有衝突嗎？
同其他運動一樣，其實我地都有「壽命」，去到二十歲以上已經算「老」。係隊入面有一個女仔大學三年班都仲玩緊，其實我一直視佢為目標，亦希望我地可以一齊玩。
體操唔練習就可能會跟唔上，所以就算中五，六我都差不多去曬所有訓練。我覺得時間上無衝突，因為我比較自律。正因為我知道時間會少左，平時上堂更加專心，希望唔影響訓練，亦希望準備充足令自己吸收得最好。
4. 玩體操最特別嘅經驗係？
我諗係第一次教練唔在場望住我比賽，因為個次我無壓力下，突然開竅領悟到應該點比賽。
亦係呢次同朋友有誤會，朋友見到我成績突然有進步然後有少少惱左我，但我覺得因為成績嘅嘢同朋友嘈好無謂，所以我對成績係睇得唔係好重，我情願將集中力放係點樣令個動作可以做得靚啲，點樣令自己進步。
5. 屋企人係你練習體操擔任嘅角色係？
我父母成日都覺得我搞得掂自己就得，所以都無話擔心我讀書受影響。父母俾左好大嘅 financial support 我，因為有時可能買件新嘅衫已經用唔少錢。
我唔俾我父母去睇我比賽㗎，唔想咁大壓力，我最多謝佢地肯放手，俾我學習點樣獨立面對唔同挑戰。
6. 玩左呢項運動咁耐，而家決定退出港隊，最唔捨得係？
或者我可以講下點解我本身話想上到大學繼續玩，但毅然選擇退隊。
我發現一個跟咗好耐嘅教練同我嘅價值觀有好大嘅出入，佢亦都畀咗好多唔關體育方面嘅壓力畀我，令我喺考DSE期間壓力爆煲，我突然之間好逃避訓練，我唔想為咗討好佢繼續啞忍扮冇事，所以我決定離開， 嘗試以另一種方式去繼續熱愛藝術體操。
人越大，當我認清教練嘅為人，我決定唔再留低。其實我都掙扎左好耐，唔開心左好耐，考完 DSE 後我都係決定退隊。
我最唔捨得係做運動員嘅個種優越感，加上港隊所配備嘅儀器等等塑造嘅練習環境。其實而家講起都會覺得心酸，但我會發掘其他興趣。
7. 咁你嚟緊有咩目標呢？
其實體操界別發展得非常快，我都擔心退左隊自己會跟唔上，我希望繼續學習新嘅動作。
而家我最想係同後生啲嘅成員分享我識嘅嘢。
我見到好多教練做做下無左為運動員個顆心。我希望自己做一個教練時，要站係運動員角度，要因材施教。我希望一方面提升自己運動科學嘅知識，另一方面培養小朋友嘅體育道德風範，想佢地明白成績都只係浮雲嘅道理， 最重要嘅係嗰啲喺運動方面培養返嚟嘅良好品德可以畢生受用。
8. 就你嘅經驗，有無咩想同學弟學妹分享？
我覺得讀書同運動訓練無衝突，不過大前提係大家要自律，係學校學習要專心，咁你就可以擺時間係訓練。而且訓練嘅素質係睇你有無心，唔係就咁望時數咁表面。
仲有一樣就係，我中學無去補習的，我認為當你無嘗試發掘老師們嘅付出或用心，就唔好隨便評論老師，有啲同學有時說話可以好難聽。我知道有啲老師可能唔係咁考試導向，但佢係本科嘅知識或者觸覺可能好強，呢啲都會幫到我地。
或者係港隊嘅訓練令我知道環境有時我地無得選擇，但心態係我地可以控制到的。
後記：訪問當日好感受到 Daisy 好有自己嘅想法，亦係一個超級自律嘅人，正因為佢好清楚自己想點，亦了解要點先可以達到目標，不斷努力下所以有今日係體操界嘅成就。希望 Daisy 可以保持對體操嘅熱情，同年輕運動員分享，傳承。
有故事的人 Story Teller | Kenry Lee 