前言：Jackie 係荃灣舊生，知道佢 DSE 一直為入醫科努力，已經大學五年級嘅佢經歷過本地實習，剛過去嘅暑假同大部份同學唔一樣，放棄本地工作，決定去非洲較落後醫院感受當地醫療系統，今次請佢分享係當地嘅體驗。
1. 可以簡介一下你去非洲嘅體驗嘛？
我五月嘅時候去左非洲 Zambia attachment 三個月。我地去嘅地方係一個落後村落，係機場要再搭四至五個鐘先到達，呢個地方好多基本建設都由救世軍幫忙。
2. 點解你會選擇非洲作為今次 attachment 嘅地點呢？
其實好多同學都會留係香港或選擇其他發達國家。發達國家個醫療系統同香港差唔多，我覺得我地平時無咩機會可以去外國，仲要係落後國家長時間做 attachment，所以我有呢個決定。
而且係落後國家會有啲罕見疾病，我想去研究下人地點樣係缺乏資源嘅情況下處理唔同情況。我去到見到其中一個比較印象深刻嘅位係非洲男性生殖器官割包皮非常普遍，因為佢地知道割左會令女性得到 HIV 嘅機會下降，縱然人地係落後國家，佢哋呢項手術係免費咁向人民推廣。
3. 今次非洲探訪最深刻係？
我有一個體會非常深刻，但係一個唔開心嘅體驗。我地一班外國學生有一晚由宿舍管理員陪同下去同當地人一齊開 party。我地同管理員見面時已經覺得佢把聲怪怪地，但佢話無嘢，點知 party 期間佢突然面歪，佢係我地面前中風。
當時我地全部人都好著急，但當地資源實在太短缺，我地去到醫院但唯一嘅醫生忙緊另一個接生 case，clinical officer 知識又唔夠，而我地雖然有知識，但因為係外國學生所以唔可以做任何野。我地只可以乾等。當時嘅情況要送佢出大城市係非常困難，雖然我地好多外國同學都學左有關中風嘅知識，但我地都係留意唔到，而係無資源嘅情況下全部人都好無助，而最後好不幸呢個人半身不遂。
4. 今次非洲體驗最 rewarding 嘅係？
我諗係認識到好多當地人。當地人好熱情，每個人見到都會向你問好。
當地學生非常好學，會向我地問好多問題，例如我地外國係同樣情況會點處理，我地仲試過舉辦左 teaching session，互相交流。當地人雖然資源短缺，但佢地唔會埋怨，反而會好努力，亦會諗其他替代方法。
當地學生問我 “What do you think about Africa?”，我答覺得非洲窮，無資源，當地學生話只係因為我來自發達國家，所以先覺得佢哋窮，佢哋慘，但其實當地人滿意現況，亦唔想外國勢力或文化「幫助」佢哋而破壞非洲嘅面貌，例如中國係非洲起左好多賭場，呢啲都唔係當地人想見到。
5. 今次交流後思想上有無咩調整或改變？
我諗有兩樣。
第一係有關快樂。人好多時都會套用自己嘅想法係人地到，例如我地覺得非洲人好慘，但其實人地未必覺得自己咁慘，而好心做壞事仲會影響到對方，所以我地要分清楚人地係咪真係需要「幫忙」，亦唔好覺得「幫人」就做咩都係啱。
第二樣係學習嘅反思。雖然我地香港學生學到好多知識，但非常需要科技嘅支援，我地係咪可以諗下有時點樣返回基本步，當遇到資源缺乏嘅情況下又應該點做呢。
非洲人雖然資源唔多，但唔埋怨，佢哋有機會就爭取，但唔會因為無資源而放棄學習。
6. 有無計劃一下畢業後嘅路徑？會唔會考慮做無國界醫生？
我有諗過做無國界醫生的，但無國界醫生好需要經驗，你要裝備好自己先幫到人而唔係變成負累。
如果有機會的話我唔抗拒，但當然都會睇埋到時情況係點。
其實除左無國界醫生，非洲仲需要好多其他專業人士嘅幫忙，例如社工、老師、起基本建設嘅義工等。
7. 作為醫科生，你有無咩說話想同有志讀醫嘅同學分享？
真係要諗清楚先好揀醫科，或者你會好有抱負，但當你發現好多嘢都做唔到嘅時候會消磨意志。而且做醫生都會好多牽涉到同人嘅關係，唔係醫科就無呢啲問題。
我接觸過嘅人入面有人怕辛苦，所以想只揀返 9 放 5，唔使返 shift 嘅工；亦有人雖然讀醫但唔想接觸病人⋯其實而家有好多科好多工都同醫學相關，當我見到部份人有以上考慮嘅時候，我會覺得其實可以選擇醫科以外嘅學科，所以建議同學要諗清楚。
後記：唔知有無人記得我提及過呢個專頁我想訪問「非主流」人士？縱然 Jackie 好似都係跟隨左香港崇尚嘅主流，努力讀中學、入神科、搵好工，我十分欣賞佢今次決定「來點不一樣」，你又有無諗過跟隨主流嘅同時可以點樣嘗試不一樣呢？
有故事的人 Story Teller | Kenry Lee 