前言：九月底剛係 JCCAC 舉行嘅手作市集，我一眼就被 Karol 嘅產品吸引左。放眼望去，全部產品都同科學概念有關，例如有骷顱骨嘅文件夾同肺部嘅貼紙。縱然我唔係理科人但都覺得產品十分有趣，於是上前邀請 Karol 做訪問。
1. 點解一開始你會有呢個意念用科學概念設計產品嘅？
我本身雖然係一個理科人，但我好鍾意畫畫，我亦希望可以將書學到嘅知識得意啲咁呈現出嚟。而且我觀察呢樣概念係香港唔係好普遍，好少人將學術知識融入手作產品。
同埋好多人可能都會覺得中學學嘅理科知識將來用唔返，例如係一啲公式，所以我希望有趣啲咁呈現學過嘅概念。
我中學讀理科，大學亦係生物學，我覺得我將來會繼續畫落去。我由考完 DSE 開始畫，而家已經 5 年。
2. 咁你設計左呢一系列產品，暫時反應如何呢？
普遍都表示幾鍾意啊。我覺得係香港呢個環境讀書感覺係一件重要嘅事，而大家係中學又經歷操卷、補課、補習，所以大家可能嘅印象讀書都唔係一件特別有趣嘅事，而見到我嘅產品會勾起佢地以前讀書嘅片段。
3. 你創辦左「努力手作」後有無發生過一啲有趣事？
有啊。有一次路過嘅人同我講我有啲產品畫錯左，例如血管數量唔啱，又或者係肺嘅氣管唔啱，我返屋企翻查後發現真係有錯，我都修改左之後嘅產品，所以呢個過程我都學到嘢。
4. 頭先提到讀理科感覺將來用唔返，作為過來人你有無說話可以同在學嘅年輕人分享？
我覺得讀書有時候會經歷迷茫嘅階段，但我鼓勵大家要繼續讀，有句說話我覺得好啱就係「船到橋頭自然直」。以我為例，我大學時候讀生物系，但其實中學時期嘅我好少接觸環境同生態方面嘅知識，係大學讀過一啲課程後我就發現自己好鍾情環境及生態學，所以大家繼續探索嘅過程可能就會搵到自己鍾意嘅事物。
K: 點解你會大學選生物系嘅？
可能我鍾意背嘢掛（笑），同埋我覺得好多生物概念都引人入勝，例如唔同器官（筆者聽到有黑人問號 LOL)。
後記：訪問期間好多人都會過來指住 Karol 嘅產品，從佢地嘅笑容同表情你會感受到佢地從 Karol 嘅產品上搵到嘅共鳴。有興趣嘅讀者可以 follow instagram @loraks_handmade 欣賞 Karol 嘅創作。
有故事的人 Story Teller | Kenry Lee 