前言：機緣巧合下見到 Kevin instagram，見到 Kevin 玩緊一項我未見過嘅運動，形式同以前細個玩過嘅毽差唔多，但有世界性比賽，亦見到 Kevin 為香港拎到好多獎項，所以決定約 Kevin 了解多啲。
註：足毽分平推同競技兩種。競技可一對一，二對二及三對三。比賽係羽毛球場進行，滿分 21 分，賽例同排球比賽無異，三局兩勝。
1. 從你觀察一般人對足毽呢項運動有咩理解/誤解？
好多人都會覺得足毽老人家先玩，以前好多人都唔知呢項運動，更加唔好話比賽形式。經過十年嘅推廣，而家終於多啲人認識足毽。
K: 如果十分滿分，你覺得十年前同而家嘅普及度係？
以前係 2-3 分，2003 年少過 1000 人參與，而家我俾 5-6 分，有超過 1000 人參加。
2. 我知道你初接觸足毽係中學時期，一開始點解會嘗試呢項運動呢？
我中學時期其實好 sporty，好多運動都會玩，但如果遇著雨天就多數玩足毽。以前中學有足毽隊，所以有接觸嘅機會。
3. 接觸足毽後點解咁著迷呢？
我估係成功感。
頭先提到其實好多運動我都有玩，但好似唔知點樣去進步，但足毽呢項運動我係不斷有進步，亦知道點去玩。而且我覺得啲 technique 好型，所以我就 keep 住玩。係一年內，我由新人升做正選，再做埋隊長。
K: 你著迷嘅原因同以前嘅教練有關係嗎？
以前中學足毽隊係一個中文老師帶隊，我覺得佢嘅管理方法令我不斷想挑戰自己，例如我地要達到某個標準先有機會出去比賽，所以我會不斷鞭策自己。
4. 運動 / 足毽係你成長嘅角色係？
運動係我 1st priority，就算我鍾意打機，都係低啲 priority。以前讀書時期週末我會好早起身去練習或者比賽。
我諗成長過程中足毽令我學識點樣去定目標俾自己去進步，呢樣嘢其實無人教我，但我就自動自覺定立短期同長期目標俾自己。足毽亦令我自信多左，學習相信自己，當自己有足夠準備，就要放膽去做，唔好令自己後悔。足毽作為群體運動，亦教識我點同人溝通。
5. 我知道你曾經受傷過，亦有諗過放棄。除左個次，過程中有無遇到咩掙扎 / 想放棄嘅時刻？
我一直都無放棄嘅念頭，直至兩次大傷。12 年我傷左左腳，15 年右腳受傷，第二次係連行路都痛，一直都無咩起色，個下有諗過係咪要放棄，好在後來搵到個合適嘅醫生，休養後再繼續。
另外一次掙扎我諗係大學畢業後，因為要兼顧全職工作，仲要自己練習其實好攰，但我都堅持住，因為我鍾意同年輕人接觸，而我而家做全職教練係一個好嘅機會。以前我都有遇過好嘅教練，我希望可以透過訓練令年輕人有改變，希望可以為佢地帶來一啲正面影響。
6. 你係點樣平衡工作同練習？係時間管理上有無咩可以分享？
有時候我都會想休息的，但我嘅生活差唔多每日都有足毽，我諗超過9 成時間都接觸住呢項運動。以前讀書嘅時候我好享受咁嘅生活，而家有工作就會覺得有啲攰。
K: 咁你有無私人時間呢？
好少。有時練習完已經好夜就返屋企瞓覺，都唔好話同朋友聚會。
但我會話呢個係一個必要嘅付出。當我做左一個決定，我會盡力做，我想趁仲有得踢嘅時候努力啲。呢條係我揀嘅路，所以我唔會後悔。
7. 如果讀者有興趣可以有咩機會嘗試足毽呢個運動？
足毽總會有提供一啲興趣班的，想了解多啲嘅讀者可以留意下。
K: 可唔可以話足毽係適合任何人呢？
係的，但當然越細個開始越好啦，因為我地都想從少訓練柔軟度。而成人嘅比賽只會係平推模式。
8. 對於追夢，你有咩想同讀者分享？
可能好多人都分享成功嘅經驗，我會話如果遇到失敗或挫折，大家要企起身再試過。以我為例，其實受傷個陣我可以選擇放棄，但最後我堅持住，因為我唔甘心，唔想放棄一樣係我生命咁重要嘅一個興趣。當時我受傷我無得練習，我就係屋企鑽研技巧，所以休息後隊友都話我不但無退步，仲進步左。
無嘢係無可能的，只要你努力就有機會創造奇蹟。同埋我成日都鼓勵學生多嘗試，咁樣我地先知道自己鍾意咩，唔鍾意咩，而發掘嘅過程你可能搵到未知嘅潛能。
後記：訪問當日得知 Kevin 係一個大忙人，好多時間都係練習，連見朋友嘅時間都無，所以更感激 Kevin 願意抽時間同我分享佢嘅故事，令讀者們認識更多。
有故事的人 Story Teller | Kenry Lee 