前言：或者你會對澤日生呢個名有啲陌生，但你可能聽過好多佢寫嘅作品，例如陳奕迅《富士山下》或《任我行》同謝安琪《獨家村》，《你們的幸福》。
一首金曲除左歌手嘅演繹，詞曲亦非常重要，今次搵到澤先生同我地分享佢嘅作曲夢。
1. 你覺得一般人對作曲嘅印象或者誤解係？實際又係點呢？
有啲人覺得作流行曲會做埋編曲，有啲人係的，但有啲人只集中作曲嘅部份。如果係古典音樂的話作曲的確包括編曲。
好多人可能會覺得要讀音樂出身先可以作曲，但其實有啲人唔識樂器都作到曲。而家後生一輩可能有好多身份，而其中一個就係音樂人。
有啲人會問藝術家係咪好大脾氣，其實係睇人的。（笑）
2. 我知道你正式參加作曲比賽係大學時期，但細個點解會有第一次作曲經驗？
細個屋企有部木琴仔，個陣好 casual 咁彈下，又會配啲覺得合適嘅詞落去，個陣我大概 6/7 歲。（筆者當時有啲哇然）
中學時期我發現可以聽完首歌一次自己彈返出來，呢個階段仍然係創作一啲不完整作品。大學開始我就多啲參加比賽，當然都有啲係參加左但無獎。
K: 講起彈琴，而家好多小朋友都係被逼學琴，唔知你細個係點呢？
一開始學我鍾意的，係到考試要練琴就想懶或者有啲掙扎，不過我父母要我係呢件事上付出，所以我都有堅持，我都要多謝我父母俾呢個機會我學琴。
3. 你有無話作曲嘅靈感多數來自邊方面？有無咩習慣會令自己多啲 idea？
我會聽多啲唔同類型嘅歌，有時候可能儲起左啲 idea，到某個時刻就寫到想要嘅曲。俾自己放空嘅時間，我認為都係幫助到我有靈感嘅方法。
不過而家智能電話咁普及，俾自己放空嘅時間真係少左，所以我都想減少用智能電話同用社交媒體嘅時間，希望可以俾返多啲時間自己。我覺得要放空其中一個方法係接觸大自然或者坐船，俾一個屬於自己嘅空間就容易啲有靈感。
4. 你係以前嘅訪問分享過澤日生呢個名係「擇星」嘅含意，有追夢嘅意思，你嘅夢想係？
我覺得唔同人對於夢想定義都唔同，有啲可能短期，有啲可能長期。我希望我嘅作品可以同觀眾 emotionally connected。
K: 咁你覺得自己追到夢未？
人好貪心嘅，我覺得我某程度上做到，但仍然期望可以做出更多自己喜歡嘅作品。
5. 係你嘅作品入面，最鍾意嘅係？
如果只係曲的話我最鍾意張敬軒嘅《塵埃落定》，但整體而言我最鍾意陳奕迅嘅《任我行》。
6. 你暫時遇過最大嘅挑戰係？
17 年尾嘅時候我收到麥浚龍邀請，希望我可以係短時間內寫到一系列嘅歌。今次係一個新嘗試，根據個故事創作，曲式同以前有啲唔同，而且同 Juno 合作有不一樣嘅 chemistry。今次係挑戰另一個原因係我一向都唔係量產嘅作曲人。
K: 你有係其他訪問分享過你唔量產，除左有正職外，係咪你唔想作曲有壓力呢？
係的，我唔想將興趣變成壓力。其實之前都曾經嘗試參與音樂製作，不過用嘅時間多好多。有時候係呢行你付出嘅努力同收成未必成正比。而且如果我全職做的話可能就算唔鍾意嘅工作都要接。
7. 你為自己定嘅下個目標係？
我同朋友之前做緊一個indie project，不過最近暫停左，希望可以繼續啦，唔一定要流行曲，可以係純音樂俾人放鬆。
K: 有無邊個歌手你好期望合作呢？你係好多訪問提過王靖雯（王菲原名）影響左你好多，會唔會希望可以合作呢？
我希望同王靖雯同個個年代嘅班底合作，因為我覺得呢個班底對於個個年代嘅人好大影響力。
8. 如果年輕讀者對作曲有興趣，你有咩建議俾佢地？
如果年輕讀者真係對音樂有興趣，係大學修讀音樂當然最好，因為可以有一個更穩扎嘅基礎，亦可以認識多啲新嘅音樂科技。修讀音樂的話亦令你個人全面啲，將來可以嘗試嘅範疇更多更廣。
以前嘅人可能無特別推崇追夢，大家都要考慮現實環境。呢一輩就多好多機會，若你好肯定你鍾意，加上自己能力掌握到，不妨試試。
以前好多人可能無咁嘅能力讀音樂，而家就好多機會，不論係本地或海外嘅課程。
將來透過參與不同音樂項目去make a decent living 係可行嘅。
人其實有好多方面嘅能力，亦有好多條路，例如有啲朋友大學主修語文，再讀音樂碩士，有好多組合嘅可能性。
最後一個分享，如果將來讀者有機會參與作曲，我覺得創作者同買家需要互相明白，要有良好溝通，如果你只顧創作自己想寫嘅曲，可能市場無人想要；但若果你只顧符合市場需要，可能你嘅作品會無靈魂。
後記：澤先生作為業餘作曲人並不量產，但係網上好多人都會留言「一年一首歌都令人留有深刻印象」或「一聽就知道係澤先生嘅風格」。如澤先生分享，要追夢有好多路徑，最重要係搵到最合適自己嘅路。
問澤先生想放咩相，佢選擇左呢張係丹麥渡假時影嘅相，因為當時正係《任我行》發行嘅一年，佢亦感恩神創造左好多美麗嘅事物提供靈感俾人創作。
筆者係好多首喜歡嘅作品挑選幾首私人推介:
(1) 謝安琪 《鍾無艷》
(2) 謝安琪 《你們的幸福》
(3) 麥家瑜《好得很》
(4) 林家謙《下一位前度》
有故事的人 Story Teller | Kenry Lee 