前言：提起芭蕾舞者你第一時間諗到係女仔定男仔？係幾時開始我地有咁樣嘅既定印象？我必須承認，當眼前嘅陽光男孩同我講佢跳芭蕾舞嘅時候我好驚訝，究竟係咩驅使一個男仔「打破常規」，學習芭蕾舞呢？
1. Matthew ，我記得你分享過你開始學芭蕾舞係因為《跳出我天地》呢套戲？
係的。當時我應該六歲左右，睇左呢套戲先知咩叫芭蕾舞，當時我覺得芭蕾舞好似好有趣，有興趣想試下。我爸爸媽媽亦無反對，認為唔好因為怕人地定形就唔做一件事，既然我都覺得 ok 我就開始左學。
其實套戲係以7,80 年代傳統社會為背景，當時男主角被爸爸安排參加較陽剛嘅拳擊，但上堂時見到隔離班房練習芭蕾舞就被吸引左，個男仔隱瞞爸爸去跳芭蕾舞，亦時常係屋企練習，最後亦成功成為一個芭蕾舞者。
2. 接觸芭蕾舞後，有咩驅使你繼續呢項興趣呢？
芭蕾舞好多表演都需要男性角色，有啲動作係男仔做會適合啲，亦有好多好型嘅動作。
我覺得我嘅滿足感來自台上表演，因為係一個你可以展現能力嘅機會，亦可以透過群體合作同其他舞者溝通。我第一次上台係 9 / 10 歲，到 14 歲第一次認真嘅表演。
雖然我好快已經有出台機會，但其實我本身啲筋比較硬，所以有時都會被同學笑，亦因為咁我有時會自卑，因為我有啲動作無其他人做得咁好，但舞台上嘅滿足感係推動我繼續學芭蕾舞。
3. 你跳舞咁耐有無遇到「性別定型」嘅情況呢？
表演嘅時候完全無呢個問題，因為會嚟支持嘅人大多認識芭蕾舞係點。
中一自我介紹嘅時候我好自豪咁分享呢項興趣，當時我嘅同學驚訝為多，覺得呢個興趣唔夠 masculine。
當然平時都有機會遇到一般人驚訝男仔跳芭蕾舞，但我盡可能都會分享多啲，令身邊人明白呢項興趣唔止係女仔參與。
K: 咁有無因為性別定型而想放棄呢？
我無因為咁想放棄，但有因為咁變得怕醜啲，亦無一開始咁熱衷分享。
4. 你有無因為呢樣興趣覺得自己同其他人唔一樣？
其實無特別覺得自己有咩唔同。其實男性學習芭蕾舞係外國非常普及，所以我有時都想問「點解男仔唔可以跳芭蕾舞？」其實好早期芭蕾舞源於法國宮廷，亦係男仔跳先。
大家唔好有個錯覺覺得跳芭蕾舞會影響一個男仔嘅性格。縱然有啲比較陰柔嘅男仔，同佢係咪選擇跳芭蕾舞無因果關係。
5. 芭蕾舞帶俾你最大嘅學習係咩呢？
如果係跳舞方面，我學識點樣係表演時展示自己，點樣將自己強項同個情緒表現出來，其實我地都係 story teller，以跳舞將情緒表達出來。
關於人生方面我有兩個學習。
第一個係點樣學習放空。
當我已經好熟悉舞步，我練習嘅時候就可以有時間放空，可以諗下其他嘢，放空嘅過程令自己沈澱下，放鬆下。
第二樣係學識點樣面對別人目光。
頭先提過其實我啲筋唔夠柔軟，有時都會聽到人地批評。我對於人地對自己嘅睇法變得豁達左，但我希望你唔好背住我講，你直接同我講等我可以知道點樣改善。
6. 你有無為學習芭蕾舞設立一個限期？
無的，我覺得學習一個興趣應該無時間限制。
其實中六要準備公開試嘅過程我都有猶豫係咪應該繼續練習，因為無練習的話啲筋又會硬返。但我決定排優次，而家呢刻我覺得讀書係最重要，我要係知識上有多啲認知，我唔想自己成為一個無知嘅人。
我已經計劃左考完試重投練習嘅過程架啦。
後記：聽完 Matthew 分享，更感受到佢跳芭蕾舞嘅熱誠。縱然可能柔軟度無人地咁好，Matthew 仍然努力跟上大家嘅程度，而我覺得造就呢個有故事的人 Matthew 父母嘅開明實在難得，因為父母並無因為性別刻板印象而限制 Matthew 嘅發展。希望 Matthew 入大學後有更多資源同舞台展示芭蕾舞嘅學習。
#ballet #gender #genderstereotype #性別刻板印象
有故事的人 Story Teller | Kenry Lee 