前言：唔知大家有無覺得飛機師呢個職業離自己好遠？我自己唯一嘅認知係電視劇《衝上雲霄》，我無諗過我會有一個舊生去考飛機師，當初亦無聽過佢想做飛機師，今次我邀請 J KIT 分享佢嘅故事。
1. 點解你會想做飛機師嘅？同電視劇《衝上雲霄》有無關係？
大學畢業前半年我開始諗搵工嘅問題，當時嘅我其實好迷茫，當我問自己有咩工作想做嘅時候，我諗到飛機師。
我點解想做機師同《衝上雲霄》無關。其實係我一個朋友嘅朋友係飛機師，聽佢分享都覺得有機會，所以就決定試下。
2. 決定試之前有無好大掙扎？點解最後都決定去馬呢？
其實我一開始都有掙扎的，因為覺得係一件全新嘅事，所以會有難度，但我覺得每個人都有自己嘅長短處，雖然我起步可能比某啲人遲，但我覺得唔試過點知自己得唔得。
K: 咁你覺得你自己邊個長處令你做到飛機師？
我本身係一個比較隨心嘅人，好多時都係「執生」，比較隨遇而安，或者呢個係我既優點，因為飛行本身就有好多變數，即使準備得幾充足，臨場應變同判斷能力都好重要，太墨守成規可能會有反效果，所以機師處理問題謹慎小心之餘都要有彈性，最緊要知道自己做緊啲咩。
而我最後決定嘗試嘅原因係因為呢樣係我當時唯一想做嘅事。
3. 上訓練課程前你對呢份工作有咩想像？訓練完之後有無改觀？
訓練前我覺得呢份工夠彈性，可以周遊列國，我可以寓工作於娛樂，同埋富挑戰性。
訓練後我覺得大致上同我想像一樣，但我而家會更明白安全意識係十分重要，而我亦唔可以太隨心，我需要係有彈性同跟程序上取一個平衡。
以前我會覺得技巧最重要，而家我覺得知識亦非常重要，包括飛機型號，結構，天氣等等。
4. 你由訓練到而家遇過最有趣同最富挑戰性嘅地方係？
訓練課程為期一年半，最有趣嘅地方當然係飛行嘅時間，而最大挑戰係讀書嘅部分。學員需要係半年完成 16 個單元，所以我地需要不斷努力讀書。
最有趣係飛行，尤其係最後可以自己飛嘅時間，因為可以感受到可以一個人駕駛飛機既樂趣同成功感。
K: 中間有無遇到咩挑戰/ 試過想放棄呢？
想放棄就無，但中間都有遇到啲壓力的，因為如果我地嘅 progress test 或者有一部分課程唔及格，我地需要重讀，公司需要俾多啲錢，所以要好努力咁讀。
5. 你對未來工作有咩期許？
當然想快啲飛。
另外我希望向多啲人推廣關於機師嘅工作，希望多啲人可以試下，希望有興趣嘅人都唔好睇少自己，勇敢嘗試下。
其實我參加左訓練後都有朋友 inbox 我問我多啲關於機師嘅資料。
6. 如果同學仔對投考機師有興趣，有咩嘢係佢地可以裝備自己嘅呢？
我會建議同學增加對航空界嘅視野。例如同學可以參加唔同公司籌辦嘅航空課程，呢啲課程會有唔同參觀，亦有啲理論課，同學可以借此更了解呢個行業嘅工作。
同學當然可以係中學修讀相關課程，例如物理，去準備自己，但其實不同背景嘅人都可以投考機師。我知道有文科人，亦有無讀大學嘅人去報考，所以只要你符合唔同公司嘅最低要求就可以。不過我會話英文係重要的，尤其係聆聽能力，因為執勤時成日有機會聽到唔同國家，唔同口音嘅英文，所以準確既溝通同協調係十分重要，總之都係安全要緊。
最後，都係最重要既係你對飛行既熱誠。
Let your passion be your compass!
後記：由一開始知道 J KIT 去讀機師課程已經好期待了解更多，聽到佢嘅分享好感受到佢嘅期待，亦希望佢係未來日子可以好好享受係三萬呎高空飛行嘅快樂。
有故事的人 Story Teller | Kenry Lee 