前言：香港好多人都熱愛行山，但熱愛到要去外地行山嘅身邊只有少數，好朋友 Roy 係其中一位。Roy 由遊歷香港，後來到訪日本，印尼，紐西蘭等地行山，最近更加去左尼泊爾行上喜馬拉雅山。喜歡同大自然接觸嘅佢，究竟行山俾佢咩嘅想法同反省呢？
1. 你記得第一次嘅行山經驗嘛？點解會愛上行山呢？
我第一次行山係 2014 年 1 月 1 號行龍脊。當時朋友話希望新一年目標去多啲新地方，我亦受佢啟發，希望係個年發掘多啲香港嘅地方，亦開始左行山嘅習慣。
我都幾自豪的，因為香港三百幾個山頭我去過大約 150 個，我了解香港多左，亦鍾意嘗試係現實世界認返地圖顯示嘅山。
我行山行到大概 2018 年頭，停左一陣，而家嘗試埋跑山，我覺得呢樣係我嘅抗壓方法，尤其當自己好忙嘅時候，可以俾個腦放空下，唔使諗其他嘢。
2. 點解行山令你咁著迷呢？
其中一個重要嘅原因係我鍾意影相，而係山頂可以影到好多靚景。而當你做一件事做得好，你就會有動力繼續。
行山亦令我對香港更有歸屬感。我覺得行山前嘅我唔係好認識香港，而家我可以見到座山就認得係地圖邊座山，亦會明白多左座山嘅名背後嘅故事。
3. 你去過外地邊啲地方行山？點解最近會揀尼泊爾行呢？
我去過日本、印尼、菲律賓、越南、紐西蘭、馬來西亞同埋土耳其行山，而家我去旅行都希望加插行山嘅環節。
幾年前我已經知道尼泊爾 EBC 呢條行山路線，有睇過相關電影，1718 年香港更有一位好後生嘅男仔登上左山頂亦令我好深刻。當時剛好分手嘅我想行開下，想做啲嘢為自己打氣，當我靜落嚟問自己有乜想做嘅時候，我諗到尼泊爾。我一向都好享受自己一個係山上嘅感覺，好想係一個高海拔嘅地方感受下。
4. 登上珠峰最難忘嘅體驗係？
EBC 呢條路徑出名難行，但我用左 2/3 時間就完成左。但攻上另一個山頂嘅時候不論體能同意志都超出我想像。
係最後一二百米，我基本上係手腳並用，同埋好辛苦，好想放棄，好想留係原地等其他人，但我嘅隨行領隊唔俾我放棄，話 “This is the mountain, you have to go”，亦因為咁我先堅持落去。
其中一幕最難忘係差不多到達嘅時候遇上另一隊外國登山隊，個領隊恥笑我，仲同隊員講 “See, this is what I meant by people under estimating the power of nature”，當時我覺得好羞恥，因為好似拖慢左同行嘅人嘅進度。
5. 你覺得透過行山，大自然俾你最大嘅一課係？
我覺得行山係俾機會人去同大自然親近，融入大自然，而唔係要 show off 自己去過邊有幾厲害。
我覺得係享受個過程而唔係要征服左山。
我覺得今次尼泊爾之旅算係為我上左一課：人係大自然面前要謙虛。就係因為被另一隊登山隊恥笑，我更加提醒自己行山唔能夠掉以輕心，要好好準備先好出發。例如可能事前你要了解旅程嘅難度，預期遇到嘅天氣變化，點樣同領隊溝通等等，所有準備都會令你嘅旅程順利啲。
6. 你覺得開始行山後有無對香港嘅印象唔同左？
有的。其中一次行山體驗印象比較深刻。
個次我自己去荔枝窩行山，落山時發現我個袋有隻小蜥蜴，或者有啲人會好驚，但個刻我覺得我同大自然好 close。
另外荔枝窩個村長有帶我周圍參觀，我就覺得香港有好多人都默默保護緊自己嘅家園同環境，雖然可能佢地做嘅嘢大眾唔知，或者保護荒土唔係香港嘅主流價值，但佢哋仍然盡力去做。
7. 最後有無咩說話同讀者分享呢？
唔同人有唔同嘅興趣，而有時候興趣唔一定幫你搵到錢。但如果你搵到一樣你好鍾意嘅嘢，其實能夠持續咁做都係一件幸福嘅事，所以唔好睇少自己嘅興趣。
後記：大自然從來都係一份免費而美麗嘅禮物，前陣子覺得有一股「打卡」熱潮，好多人為行而行，但其實行山背後大家又有無好好同大自然接觸，俾自己嘅心靈沈澱下呢，又有無藉機會認識我地身處嘅香港？
早排發現左一個好多「山」靚相嘅 instagram account，有興趣嘅讀者可以 search and like @mount.spirit。
#行山 #hiking #nature #Nepal #EBC
有故事的人 Story Teller | Kenry Lee 