前言：小羊本身係現代舞舞者，幾年前開始接觸鋼管舞。當我知道小羊開始跳鋼管舞嘅時候第一個感覺係「太厲害啦吧！」親眼見過小羊嘅表演後，好深感受覺得「唔好俾人地嘅看法決定你係一個點樣嘅人」，今次等小羊分享一個男鋼管舞舞者嘅故事。
1. 點解你一開始會接觸鋼管舞嘅？
我本身跳左舞 11-12 年，鋼管舞跳左大概 3 年。
第一年讀大學嘅時候我已經有興趣想試，但因為呢項興趣費用好高，所以當時就放棄左。
到出嚟做嘢後，開始儲到錢，亦想係跳舞方面試下新嘢，所以就去學鋼管舞。
K: 你接觸鋼管舞後同你原先嘅印象/認知有無落差呢？
基本上差唔多，但我無諗過會咁痛。跳現代舞無用咁多上身嘅力，但鋼管舞係要運用全身嘅力，尤其係手臂嘅力量，所以一開始我都有啲吃力。
但好在鋼管舞嘅舞步比較慢，作為一個有經驗嘅舞者我容易啲跟到進度。
K: 跳鋼管舞俾人嘅感覺係性感，其實係咪嘅呢？
係嘅，整體嘅感覺係性感，但其實而家已經演變左唔同感覺同要求出嚟。除左有性感為主調嘅比賽，仲有 Art, Drama 同 Comedy，舞者係要用支 Pole 呈現唔同嘅故事同感覺。
2. 當初知道你學鋼管舞覺得你好勁，其中一樣嘢係可以拋開人地嘅眼光，點解你無因為性別呢個因素猶豫呢？
我又真係無理會人地嘅目光，因為我去學鋼管舞唔係要跳俾人地睇，我係想自己學習，所以我見到時間同錢 ok 我就報名。
K: 有無諗過呢項舞蹈無其他男同學？
我無諗過有無其他男仔學呀。後來認識多啲先知其實全港少過 20 個持續有學習嘅男鋼管舞舞者。可能有多啲男仔玩 pole sports，但鋼管舞真係好少。
3. 係跳鋼管舞嘅過程有無聽過一啲唔友善嘅說話 / 遇過帶有歧視嘅人呢？
係教室入面無，因為去得嘅大家都係為跳舞。我屋企人一開始知道都有啲驚訝，但佢哋不惱都好支持我。唯一可能係我前度吧，佢曾經講過一句「你著到咁少，唔好係我面前跳」，不過都無影響我。
整體而言，大家對於一個男士跳鋼管舞會驚訝，但都算友善的，亦可能因為我有跳舞底子，所以大家都會欣賞跳鋼管舞時嘅我。
4. 作為男性你覺得你跳鋼管舞最大優勢係？
力度！我地嘅肌肉會係跳舞時有幫助，但亦同時間有個唔好處，就係我地會重啲。不過力量嘅控制係睇唔同人。
5. 鋼管舞係咪任何人都可以試呢？有無咩條件會跟得容易啲？
我覺得任何人都可以試，不過我覺得跳舞都需要一啲天份（笑）
我覺得如果你有啲肌肉，有適中柔軟度，再加埋忍痛嘅能力（笑），會令你嘅學習過程容易啲。至於肥瘦其實無影響，反而可能少少肥嘅人會容易夾實支鋼管。
不過例如我手腳比例，同埋手掌太細，會令我個別動作做唔到。
6. 你本身有正職，又成日去練習同表演，你點樣係繁忙嘅工作做好時間管理？
雖然我有正職，但我返工日子唔算多，有表演要準備的話，我會嘗試減少返工日子，希望返最少嘅日子賺最多嘅錢。
我會去諗我點樣先可以令到成件事效益最大，例如我拉筋係一次過幫助到我鋼管舞，瑜珈同跳現代舞。
7. 今次想訪問你其中一個原因係我覺得你無俾性別刻板限死自己，係突破性別刻板上你有無咩俾讀者嘅說話 / 鼓勵？
剛好我最近重溫一個以前出過嘅 Instagram post，我就係寫當我地想去做某件事嘅時候，我地要知道點解我地努力緊，當你努力，你會得到比你想像嘅多。人地可能會有不同意見，但你嘅價值亦唔係取決於人地嘅說話/批評。
有時候可能聽到都會唔開心，但我地要去調節。
我覺得大家想追求嘅嘢都唔同，大家起點同終點都唔同，但我鼓勵大家去尋找自己想做嘅嘢，唔好太在意人地目光。
後記：我成日都會同身邊人講，我會開始跳舞係因為小羊。曾經多次提及想學跳舞，小羊講左句「你已經講左好多次，幾時行動？」就係咁，我踏出安舒區去左報名，亦開始左我嘅跳舞生活。希望小羊係舞蹈造詣上會更上一層樓，嚟緊佢又試新嘢，亦開始教班，希望佢嘅 exploration 會有新嘅發現。
有故事的人 Story Teller | Kenry Lee 