前言：「快啲執嘢啦」相信係好多讀者媽咪嘅口頭禪，唔知大家對於執嘢有無覺得困難呢？大家又有無聽過收納呢個概念？Edwin 最近辭去好多人心目中嘅理想金融反洗黑錢工作，特登飛去日本考左二級收納整理師資格，並創業成立 Minimize Concept，究竟「執嘢」點樣成為佢嘅故事？
1. 點解你會想用收納呢個概念創業？
其實可以先講下點解我會同收納扯上關係。大學我係美國讀書嘅時候，我有一個嗜好，就係做「收買佬」，會周圍去收集人地唔要嘅嘢再轉售俾其他人，當時好多美國嘅新移民會需要二手物品，我亦開始左收拾同整理。
我自己離開美國嘅時候，除左一張摺凳，我賣曬全屋企嘅物件。
返來香港係另一個世界，香港人大多唔鐘意用二手嘢，所以就無再做。當我讀商業管理碩士時，我有再提起「收買佬」嘅概念，因為一直係我腦海。
到我出來做嘢後，有一日係 YouTube 見到講「斷捨離」，忽發奇想覺得啲物件就咁掉實在太浪費，如果轉售應該可以賺到錢，於是我決定創業，做收納+二手買賣嘅生意。
屋企人期望我大學讀完商科返來應該搵份好工，奈何我一直都有創業夢，一次又一次反對，直至今次提出收納，屋企人覺得賺到錢又幫到其他人，所以都支持。
2. 收納同一般人認知嘅執屋有咩分別？
有架。執屋係將屋入面嘅物品放返係唔同位置。收納係提倡減物，將唔要嘅物品拎走，可能係掉或者放係迷你倉。
3. 點解會去認真考收納師證書？要考要經過咩步驟？
收納師證書分兩類。二級係上一日半堂再加一個簡單測驗，主要係學習收納技巧，程序同相關分析，好多人上完堂都係應用返係自己屋企到。一級就要做多個測驗同一個案例分析，主要係俾人做生意用，既然我有心創業，當然要去考一級收納師證書。
4. 去實行你嘅計劃暫時覺得最有趣嘅地方係？
我諗係解釋點解自己想轉行。好多人都覺得我本身嘅工作已經好好，我就覺得好睇性格，人一係打工，一係就創業。我覺得自己本身做緊嘅嘢應用唔到係將來嘅生意到，而且我已經試過幾年打工，叫做滿足左屋企人嘅期望。香港樓價咁高，我想我嘅生活舒適啲，加上一直有一個創業夢，所以決定三十歲前離開安舒區。
呢個概念可能同主流香港人唔同，我樂意同其他人交流我嘅想法。
5. 會唔會覺得自己嘅興趣好特別？係香港怕唔怕無人認識呢？
其實我本身個人都有啲八卦，鍾意理人地嘅嘢，所以收納都可以應用下自己嘅性格，又唔覺得非常特別。
香港人太鍾意買嘢啦，所以十分需要學懂收納。
斷捨離而家係香港好多人都聽過，我想食住個勢。
我初初係 Facebook 到分享考收納師證書時已經有好多朋友 approach 我，代表收納呢件事係香港有認知，所以我都唔太擔心。
6. 辭職創業嘅目標？
最重要當然唔使屋企人擔心。我希望可以最少搵到以前收入嘅 70%。除左香港，我希望發展得成熟之後，我可以將生意拓展到澳門，深圳，甚至係我熟悉嘅美國。
7. 你一直都有個創業夢，而家你做到啦，有無咩說話想同讀者分享？
頭先提到，創業與否除左睇性格，仲要睇吓你夠唔夠貪心，如果你知道自己可以去得更遠，唔好咁快滿足，可以嘗試多啲。當然，係實踐夢想嘅同時要兼顧現實，唔好要屋企擔心。
後記：每個人鍾意嘅嗜好同興趣都唔一樣，只要你認真做，專注做好你鍾意嘅事，任何人都有屬於自己嘅舞台同故事。Edwin 勇於離開安舒區，為人生打開新一頁，祝願 Edwin 嘅收納生意成功。
有興趣了解更多嘅讀者可以 Facebook search and like “Minimize Concept 收納顧問服務” 。
有故事的人 Story Teller | Kenry Lee 