前言：捉伊人大家一定有玩過，大家可能只係當係一個遊戲看待，有無諗過將呢個活動認真發展會變成點？熱愛運動嘅 Kit 同朋友一齊創辦左香港捉伊人總會，希望借呢個項目推廣普及運動，一齊嚟睇下捉伊人嘅故事。
1. 可以介紹一下你地嘅背景嘛？點解會有創立總會嘅 idea？
Kit: 我本身係一個救護員，半工讀修讀左浸會大學運動管理課程，亦有做過 Adidas trainer，見到好多唔同人身體嘅需要，想都市人郁多啲同健康啲。我有搞過街頭健身，但我想試一啲簡單啲嘅項目，有時係公園見到小朋友跑來跑去就覺得不如試下係捉伊人入手，因為呢個項目滿足到唔同層面，既有運動，亦做到康樂同消閒。
一開始都有諗過會唔會無聊，然後上網望下發現原來捉伊人有國際總會（比賽時間二十秒，競賽員要越過障礙物掂到對手）。我同朋友於是就成立左香港總會，仲係荃灣愉景新城舉行過第一次香港嘅捉伊人比賽。
Winter: 我係 ASICS 嘅長跑教練，好多時候都會接觸成人同青年，感覺好似我地運動發展無咩係專注係小朋友到，而捉伊人正正可以俾小朋友開始訓練，亦有好多唔同好處。
2. 捉伊人呢個遊戲有無咩係大眾無留意嘅一面/好處？
Kit: 除左一般運動帶來嘅好處例如平衡力，肌耐力同心肺功能，捉伊人仲可以訓練參與者思考同判斷能力，因為你要諗點走，仲可以培養速度同爆發力。呢啲能力其實對於小朋友參加其他運動項目都好有幫助。
3. 你地覺得係香港推廣體育活動/比賽嘅優勢同難處係？
Kit: 我覺得係要咩都識，由組織、聯絡、搵贊助、搵場地、建立網頁通通都要識，好多嘢我都係由頭學起，好在我用得返一啲以前係健身總會嘅經驗。政府其實無咩 support 俾我地，好多負責運動規劃嘅人根本就唔做運動，所以都未必完全明白我地嘅情況。
Winter: 我覺得其中一個困難係大家點睇捉伊人呢項運動，好多人可能覺得只係一個小朋友嘅遊戲，而且而家嘅小朋友有咁多活動可以選擇，要令佢地參與呢個「偏門」嘅活動唔容易。
Kit: 其實我地之前舉辦嘅小朋友比賽係香港獨有，外國嘅比賽多數都係俾青年同成人。我希望我地稍後舉行青年比賽，贏左嘅人再 send 去參加國際比賽。
K: 家長普遍反應如何？
Winter: 當然有啲家長覺得使咩參加比賽，係公園跑下未得囉，但我地嘅比賽係同相近程度嘅對手跑，除左有獎項，小朋友都可以了解自己多啲。
有啲家長好正面的，甚至話原來唔知自己嘅小朋友可以跑得咁快，因為好多時可能要返工根本無機會同小朋友去跑動下。
4. 有好多同學將來有興趣從事體育行業，唔知兩位有咩分享？例如可以點裝備自己？
Kit: 我覺得同學要認識自己嘅方向，究竟你係想向咩方向發展呢？你想做教練？搞手？定係運動員？知道之後就集中火力去達到自己嘅目標，例如想做教練你就要去考牌；想做搞手嘅就要學習點樣處理唔同嘅難題；運動員就要諗點樣突破自己。
Winter: 我覺得你要鍾意運動，當你好鍾意，好專注咁訓練一項運動，你係可以靠呢樣嘢搵食的。例如我都探索左好耐先發現自己長跑有天份，然後我專注做好長跑訓練。
當你搵到自己鍾意嘅運動，你自然信心多左，亦會願意嘗試其他唔同類型嘅嘢。
Kit: 當你夠鍾意呢樣嘢，你就會有動力做好佢，去推廣佢。要夠鍾意係因為過程中你可能會遇到困難，亦有機會部分時間無咩出路，但你嘅熱愛會幫你衝破呢啲難關。搵到你鍾意做嘅嘢，辛苦你都會努力做，enjoy 件事。
Winter: 同學亦要知道你想做嘢工作嘅基本要求係咩，裝備好自己，令自己條路容易行啲。
5. 總會嘅願景？
Kit: 希望家長會俾自己嘅小朋友喪跑（笑）。希望香港會有捉伊人代表，繼而參加國際比賽，最好當然係奧委會做到會員。
我地希望小朋友係玩多啲，推廣多啲，青少年先開始訓練參加比賽。
後記：傾談過程好感受到 Kit 同 Winter 對運動同籌辦捉伊人活動個團火，兩位而家係運動界別有自己嘅定位，但其實佢地都經過挫折，長時間探索同努力，先有今日嘅成就。所以如 Kit 講，只要你夠鍾意，你就可以衝破難關。期望捉伊人總會之後更多嘅成就。
總會第一次籌辦嘅比賽:
有興趣了解更多嘅讀者可以瀏覽：
有故事的人 Story Teller | Kenry Lee 