前言：大學畢業後一直留意到師妹 Samantha 係花藝方面發展，除左插花同教班，近年佢嘅作品係婚嫁行業非常受歡迎。今次邀請佢分享自己點樣 make her choicesss。
1. 可以介紹下你嘅背景嘛？你係幾時同花產生緣分？
我大學時候已經有一間 studio 教整皮革，畢業後嘗試用花整配飾，有一次偶然機會朋友邀請我幫佢做結婚裝飾。當時嘅我係零經驗，但我朋友好相信我，俾我佈置個場地，個次亦係我第一次用花做比較大型嘅佈置。
接住有幾個朋友都搵我做婚禮佈置，縱然我無咩經驗但大家都相信我，於是我累積到多啲經驗。我覺得我一開始可以上軌道係因為朋友嘅支持。
我個人好多嘢比較鍾意自學，所以我唔係一開始就去上堂考牌，反而係我摸索左，有自己嘅一套先去上堂，我唔想老師個套規範左我。我會睇人地嘅作品，再分析點樣先做到咁樣。自學左兩三年後，我去台灣上堂，由基礎學起。
至於點解我會同花有緣分呢？我之前教人整皮革我覺得好 repetitive，好似無咩 input 同新意念，有啲 burn out，然後有一次我係 studio 望住一朵繡球花，靜靜咁望住朵花，就係咁過左一個鐘，我覺得有治療到我嘅疲勞。
加上當時剛好我同前度分手，我覺得花好似女仔咁，好柔弱，我想我地女仔可以 tough 啲，於是嘗試用唔同花整 accessories，希望將個回憶留住，亦透過花治癒情緒。
我同花嘅緣分亦來自《植物看得見你》呢本書，呢本書提到植物都有五感，透過感官可以感受人類，之間亦會互相溝通，所以我插花鍾意用鮮花，因為感覺多啲 interaction。
2. 開 studio 係咪你嘅計劃？點解會選擇開 studio？
我其實無咩規劃，好多時都係一股衝動。
我初初同呀嫂一齊合作搞 cafe，我負責教班，係呢兩年時間我了解到自己做嘢要一個專注嘅環境，由於 cafe 生意好好，所以我決定騰出空間搬走去搞自己嘅 studio。
雖然話我無咩規劃，但我通常變通或者適應轉變都係比較快，我覺得每樣嘢都有個 right timing，去到某個位你就知道應該做咩決定。
3. 呢份工帶俾你最大嘅滿足感係？
我發現我好享受將識嘅嘢分享俾其他人，我鍾意整理左自己一套系統再教其他人。
有時遇到一啲無插花經驗嘅同學上完堂鍾意花多啲，甚至有啲同學會發展自己嘅 IG shop，呢啲都令我好有滿足感。
K: 香港嘅教育制度有無令啲同學連插花都唔太夠膽創新？要跟足老師呢？
我通常第一堂都強調大家都要搵自己嘅風格。同學仔來到唔係要抄我嘅作品，而係創作屬於自己嘅作品。我要教同學捉魚，唔係就咁俾條魚佢。
4. 我知道你每次準備婚禮嘅花都唔係 set 死曬，而係同新人傾計了解完故事先設計，你最深刻嘅故事係？
有對夫婦自小已經認識，佢哋拍左拖 10-12 年，其中六年係遠距離戀愛，我有好奇問點解六年 long distance 但佢地仍然咁恩愛，個老婆答我「其實可能係距離令佢地更加努力維繫感情，有時唔係近就好，一段關係適當嘅距離都重要」。
5. 花教你最重要嘅一課係？
我覺得呢樣嘢係花成日都提醒住我，但我未完全做到的，就係要好好照顧自己。
花本身好脆弱，而每種花都有不同嘅生長要求，所以要好好照顧花佢地先會生長得好。我而家大部分時間都投資落去 studio 到，有時候留俾自己嘅時間都唔係咁多。花咁細小都要咁多心機照顧，人更加要。
同埋所有嘢都有 right timing。
K: 有無咩令你領悟到呢樣嘢呢？
時間唔啱花唔會開（笑）。
6. “Make Your Choicesss” 係咪都係你嘅人生哲理呢？
我地成日都覺得自己有得揀，例如快餐你有好多選擇，但呢啲選擇都係建基於人地預設嘅套餐，我想要一啲真正嘅選擇，自己去揀最鍾意嘅嘢，所以每次規劃婚禮我最享受係傾計嘅部分，了解新人更多從而設計最適合佢地嘅花。
我覺得人要勇敢去做自己想做嘅事，一個決定無絕對對錯，只要你認為個決定啱，件事就會啱。
7. 你嘅目標係？
我嘅短期目標係開一間 flower school，強調 connection，係人與人之間嘅 connection，人與花嘅 connection。而家大時大節好多人會選擇送花，但有啲人係為送而送，我希望大家係會送一啲 personalise，更有意義嘅禮物，你係因為知道對方鍾意咩花先送，花唔只係生意口號，而係幫大家傳遞訊息嘅媒介。
我希望開到 flower school 之後可以將重心放係創作方面。雖然話每次設計我都希望唔同，婚禮始終有限制，我希望可以做多啲 installation 嘅創作。
後記：入到 Samantha studio 嘅一刻已經聞到花香，今次嘅訪問令我對插花嘅了解多左。常言道「惜花之人」，Samantha 絕對示範左點樣同花建立connection，再透過花將唔同故事講出嚟，希望會有更多有緣人搵 Samantha 說故事。
有興趣了解更多嘅讀者可以 search and like “Make Your Choicesss Floral Lab” Facebook page + Instagram account 欣賞 Samantha 嘅作品。
#florist #flowerarrangement #MakeYourChoicesssFloralLab
有故事的人 Story Teller | Kenry Lee 