前言：大家係電視上可能有睇過 Chris 揹住背包去唔同地方探索。現實嘅佢係高材生，當年放棄拔尖轉讀國際學校，讀完大學後參加澳洲「全球筍工」進入三強，最後再為 TVB 背遊系列主持。呢位旅遊人嘅故事係點？今次好榮幸請到 Chris 分享。
1. 當初點解會有想法轉去李寶椿，離開自己個安舒區？
當時其實係我有個朋友報，於是我又試下報。本來間學校唔收我的，但考考下公開試又通知我話有位。當我收到公開試成績嘅時候，基本上我無猶豫過就決定去讀李寶椿，因為拔尖通常啲人都係讀醫科，商科或法律，我覺得無咩興趣，太急決定反而可能後悔。同埋我見李寶椿嘅畢業生好多人都去外國讀大學嘅 prospect都很不錯，覺得自己都有機會，無需要因為拔尖平穩而放棄一個可能更好嘅教育機會，所以決定搏一搏。
註：李寶椿係一間著重多元文化及課外活動嘅國際學校
K: 父母有無支持/反對你嘅決定呢？
其實中一／二時父母想我去李寶椿，但我當時細個，無特別諗過要走出comfort zone，所以拒絕。後來中五有機會轉去李寶椿，性格變得想試，父母反而因為拔尖比較穩陣又比較慳時間，叫我再考慮下，當然仲有拔尖比較平，經濟負擔會無咁大，但我當時覺得李寶椿能夠offer嘅體驗同之後到外國升學嘅前景都好吸引同更值得放膽一試，所以堅持想轉校。
2. 如果無 TVB 嘅邀請，有幻想過自己做緊咩嗎？係咪都係同旅遊有關嘅工作？
我其實一直都好想做一個唱片騎師。細細個成日聽電台，所以一直都想試下呢個工作。
3. 作為一個鍾意周圍走嘅旅行家，下一個目標係？
有好多地方我都想去，本身我想係新冠肺炎爆發初期去一個當地未受影響嘅地方，就係馬達加斯加，因為我本身好鍾意動物，所以想去睇動物。
至於其他想去嘅地方，賣個關子先，因為可能係之後嘅節目有機會去。
4. 你好強調要人生好玩，點解會有咁嘅想法嘅？作為一個 slasher，有無諗過下一個 slash?
我諗我細細個已經有咁嘅想法，我覺得又係因為成日聽電台，好多時啲唱片騎師都有其他兼職，分享好多經驗，感覺好有趣，所以我都想試多啲嘢。
我覺得好玩係指去試多啲新嘢，而唔係不顧後果。當然每個人嘅性格不同，大家追求嘅生活都唔一樣。而且我屋企從來無話叫我要做咩工同埋係邊做，所以都令我會想試唔同嘢。
K: 你覺得你而家嘅行為有無受自由度較高嘅母校男拔影響？
我覺得自身性格同教育環境都有影響。縱然大家接受嘅教育都一樣，學校撒左種，但唔係每個人都會有一樣結果，都睇你係咩性格。我係國際學校畢業前某位老師俾我地嘅贈言係 “The world doesn’t need more accountants”，個職業係泛指一啲好普及嘅工作，鼓勵我地嘗試多啲，唔一定要行同一條路。
下一個新嘗試我想做同動物有關嘅旅遊。本身讀生態及進化生物學嘅我係節目好多時都會加插睇動物嘅環節，我覺得人要同動物接觸多啲，睇多啲先會有感情，先明白點解要保護佢地，而生態旅遊係一個好好嘅渠道。
最近都有不同報導話因為疫情嘅緣故，好多地方嘅大自然環境都有改善，咁樣雖然看似好美好，但其實我地應該係要一個可持續發展，人同大自然應該要共存，而唔係只得其中一方。
5. 你去左世界咁多地方，最重要嘅領悟係？
我諗係要記得世界有好多可能性。而我覺得世界嘅可能性就係你嘅可能性。你見到人地有做緊嘅嘢代表你都有機會做到，唔一定只得單一方向。
世界實在太多嘢你可以試，就算你係香港都有好多新嘢可以嘗試。香港環境太高壓，令人少有自己空間思考自己想要什麼，所以離開下香港，出去睇下個世界嘅同時，望下其他人嘅生活係點。
K: 你去過咁多地方，比較下覺得香港宜居嗎？
有好有唔好吧。快同方便當然係我地嘅好，但相較之下外國人好似有生活啲，去便利店見到面都可以 chit chat 一輪。我覺得仲要考慮埋職業，有啲工作係適合留係香港做。
6. 去咁多旅行，甚至可以成為你嘅職業，你最開心/有滿足感係？
我諗係仲未死（笑）
因為好多人都覺得我做呢份工生存唔到，但而家我都過得 ok 丫。
其實呢個職業有好有唔好。好嘅係有好多自由同好多可能性，例如我可以構思節目風格同內容；但唔好就係要不斷諗嘢，同埋始終有不穩定性，例如最近咁我就無得飛。
好嘅嘢仲有好多，例如我覺得有意義嘅內容我就可以加插係節目到，又可以周圍去，寓工作於娛樂，不過寓工作於娛樂嘅唔好就係而家少左 pure travel 嘅機會。
有時都會有啲意外驚喜，例如前排我收到一個讀者私訊，佢話重播時睇咗一集節目，之後上網搵曬我所有集數同買左我本書，寫左好多鼓勵說話俾我，我覺得呢啲係做節目無預料到嘅。有時候有活動見到粉絲或觀眾就知道觀眾俾我嘅評價或者搵到知音，當我知道自己嘅節目對其他人帶來少許影響都會有滿足感。
7. 對年輕讀者有咩勉勵說話？例如係面對 change / challenge 時嘅心態？
大家要知道自己鍾意嘅項目同自己嘅專長分別係咩，好多時其實呢兩樣嘢會錯配的。或者好多人因為做某樣嘢叻，有滿足感就以為自己鍾意個件事，但唔一定的。
我地真係應該問自己個 passion 係咩，同發掘下有無機會將一啲專長加以放大，從而幫助自己嘅 passion。大家都要問自己有咩想做，同埋搵出你嘅獨特性。我自己都仲探索緊，不過我地要 keep 住搵答案。
我剛剛做背遊系列嘅時候都有人話唔好，覺得唔夠大路，但我相信所有嘢都有兩面，就係當無人做，你就有空間可以做好。當你夠堅定，唔好理會太多其他人嘅批評，當然你都要中肯，唔係所有意見都唔聽。
關於轉變呢，無人會鍾意唔好嘅轉變，我地可能會失望或者感到 frustrated，但我地都要快啲適應轉變，諗吓點面對，或者係負面中嘗試搵下啲正面嘅元素。
至於挑戰，我成日都覺得試左先，唔得先再檢視下一步應該點改進，我個人係覺得無咩所謂。
後記：Chris 作為高材生，本應可以行一條大家都認為「啱」嘅路，但佢無理會世俗嘅眼光，選擇左自己鍾意做嘅事，過有意義嘅人生。以Chris 曾經係一個訪問講過嘅說話作結：「世上沒有人比你更了解自己，如果認為適合，可行，就應該去試」。
有興趣了解更多嘅讀者可以 search and like “梁彥宗 Chris Leung“ Facebook page 或 Instagram “chrisleungtravels”，Chris 因為最近嘅疫情開設左 《反正肉體無得四圍去不如眼球出走》帶大家遊世界。
另外，Chris 嘅 《就這樣背遊地球》係書局仲買到㗎！
#ChrisLeung #梁彥宗 #就這樣背遊地球 #travel
有故事的人 Story Teller | Kenry Lee 