前言：早排係 Facebook 見到 Kelvin 上載一張萬宜水庫嘅相片，作為地理人立刻被張相吸引住，再欣賞 Kelvin 其他作品發現佢經常攀山涉水咁去影想要嘅畫面。見到 Kelvin 嘅作品有無以為佢年紀好大？佢得獎個年係 19 歲，今次一齊睇吓佢嘅攝影夢。
1. 除左攝影，感覺你都鍾意冒險，有無話受邊個/邊件事啟發？
其實都唔算，我覺得我性格係鍾意嘗試。以前老師都會同我地傾下揀科，但我覺得老師俾出嚟嘅科我唔係太大興趣，好似有個框咁。中五中六開始對於選科有壓力，但我又唔想受限於個框框，就諗下我自己鍾意咩，同埋試下發展。我覺得拍攝令我搵到生存嘅意義。
2. 畢業前後有無考慮過搵其他工作，攝影只作興趣呢？
我無考慮過搵其他工作呀，大學一年級開始其實我已經有接好多攝影有關嘅工作，開始有收入，中途我仲諗過 quit u，但因為呢個工作比較唔穩定，同埋我想令自己嘅生活有啲保障，所以都係決定完成埋學士學位。
我希望我呢個興趣可以做得獨特啲，希望多啲人可以認識。
3. 攝影最令你著迷嘅係？點解當初咁確定自己愛上攝影？
如果表面嘅原因，我覺得攝影係可以透過計劃，付出同計算而獲得心目中嘅畫面。
深層啲講，我覺得攝影可以探索自己未知嘅可能性。我從來都無諗過自己會踏足咁多國家，會計劃咁多嘢，由酒店，拍攝路線，交通，拍攝地點，全部都係自己搞掂曬。頭兩次計劃真係一團糟，亦影響左拍攝，經過幾次經驗，係呢啲過程我發揮到自己嘅潛能，就係識得點樣做好規劃，計劃好自己嘅拍攝行程。
以前我會覺得露營好麻煩，好似等咁耐就係為左影日出，但原來不斷練習，將呢樣嘢變成日常，我嘅攝影技術已經慢慢接近國際水平，呢啲都係我無預料過。
至於點解我咁肯定自己鍾意，我覺得讀書以外，影相係帶俾我最大嘅滿足感，我覺得唔係只係得把口講話香港有好多靚景，有星空有雲海，而係我真係可以將腦海想像嘅畫面影到出來，同朋友分享。
4. 開始風景攝影後，係香港同世界整體最深嘅體會係？
對於世界嘅體會，我諗係世界感覺好大，但其實又唔係咁大，要去唔同地方無我地想像中咁難。以前我會覺得去西貢都好難，而家成日去好多西貢嘅路我都熟曬。由一開始近啲去台灣，到之後嘅美國，冰島等，只要你有好嘅規劃，其實去呢啲地方無你想像中咁難。只要你有決心去某個地方，你會排除萬難達到目標。
至於對香港嘅體會，表面當然就係我認識多左香港嘅景色，探索多啲就知道香港有自己獨特嘅地方，例如我地嘅城市景色同山景好接近，而且交通方便。
5. 好多時人都只係見到其他人成功嘅一面，要影到靚相其實要付出好多努力，你曾經遇過最困難/最難忘嘅一次係？
其實好多相背後都有挑戰㗎。
一般而言，如果我想影一座山，以冰島為例，我會先係夏天去做考察，計劃下想影嘅景，做下資料搜集，因為好多時冬天天氣唔好，唔可以慢慢研究。有齊呢啲準備功夫，可能一/兩年後去影呢個地方。
其中一個比較難忘嘅體驗係去位於非洲納米比亞嘅死亡谷。納米比亞沙漠園區晚上係唔俾遊人逗留，但我又好想影星空星軌，所以我就將二千幾蚊嘅相機係個園區關門之前放係入面等部機自己影，然後天光我就立刻衝入去拎返部相機。
K: 你有無驚過部相機會唔見咗？
個下無特別去諗，因為個晚已經係行程嘅最後一晚，如果我唔影就無機會。
6. 關於追夢對年輕人嘅勉勵係？
好多時你可能會覺得自己無咩可能，但你都要問自己有幾想，同埋有無行動嘅決心。當你好想去做，你會開始計劃，開始行動。
有時我地頭一兩次嘅經驗可能會失敗，但我地要從錯誤中學習，改善後下次做好啲。我嘅分享係有恆心你就會做到。
K: 你嘅目標係？
我希望去曬心目中想去嘅地方。
後記：好多時係社交媒體見到 Kelvin 嘅動態都係一啲佢行緊去目的地嘅經歷，最近印象好深係佢係冰島遇上大風雪但仍然一步一步行上山，為嘅係心目中嘅理想畫面。為左目標，大家又願意付出幾多？
有興趣嘅讀者可以 search and like “Kelvin’s Landscapes” Facebook page 或 Instagram “kelvin_yuen_”，最近 Kelvin 上載左幾條好多靚景嘅短片大家唔好錯過。
Kelvin 幾年前仲出版過個人攝影集《野孩子追夢的世界》，有興趣嘅讀者可以補購:
#KelvinYuen #photography #nature #HongKong
有故事的人 Story Teller | Kenry Lee 