前言：經常係社交媒體見到兩位中五同學週末時候總係著住整齊道袍，拎住劍集訓，好奇下問兩位同學係咪參與劍道，原來係居合道，今次搵兩位同學介紹下呢個源自日本嘅武術。
1. 可以簡單介紹居合道係咩嗎？
K: 居合道有好多流派，我地係戶山流，強調攻防意識，使用日本刀嘅武術。居合道源於日本，二戰期間日本士兵使用各種西洋劍覺得唔適合，所以日本政府提議統一軍隊使用嘅武器，成立左陸軍戶山軍校，由各流派參與並集各派嘅精髓俾日本軍隊。戶山流強調全攻型，出招要致命。
S: 我地同劍道唔同嘅地方係我地用打刀。劍道比較運動化，亦唔係用真刀。雖然居合道比起劍道無咁普及，但係日本都有比賽的。
2. 一開始點解會接觸居合道？係咩原因令你地繼續學習？
S: 中三個年發生左啲事令我覺得有點一無是處，當時有朋友介紹我睇日本動漫，我就好奇去搜尋下，我覺得自己唔鍾意劍道，於是就係 Facebook search 下，搵到而家嘅師傅同道場，於是就試下去上堂，我試左無耐已經開始拉其他朋友一齊上堂。
我本身鍾意武術，鍾意睇打打殺殺嘅電影，我覺得呢個興趣好優雅，但又可以滿足我想打交嘅慾望，當然仲有鍛鍊身體。
K: 我係 Sparky 介紹下接觸居合道，初初佢邀請我其實我拒絕，但試左之後我幾鍾意，可以滿足我嘅破壞慾，感覺可以打交但無咩後果，另外我都認同居合道好優雅。
3. 學習居合道最困難嘅地方係？你地又點樣克服呢？
K: 我師傅覺得我係學習過程囂張同自大。我覺得我仍然學習緊點樣收斂自己嘅態度，除左行為上，更重要係心性。
S: 我的話會係技巧遇到瓶頸。有時候我會覺得自己突破唔到，但唔可以放棄，要繼續嘗試。
K: 我都有遇過類似情況，我覺得好重要係我地要知點解同點樣去做某個動作，而唔係憑感覺，知道原因就會懂得點去突破瓶頸。
4. 學習居合道有令你改變嗎？
S: 我覺得最大嘅改變係我個人無咁急躁。我本身比較急，容易動怒，有時仲有啲暴力，一開始學習有啲動作做唔到我都會有脾氣的，但而家好左，因為隨住時間建立 muscle memory 我嘅技巧都有所進步。
K: 而我嘅改變當然就係我嘅態度。同師傅溝通後，我已經好左，而之前唔夠勤力嘅我而家會努力練習唔同技巧。
5. 你地係居合道嘅學習目標係？
S: 我想報恩。師傅幫左我好多，曾經有一輪我無錢交學費，但師傅仍然願意教我，所以我想報答返師傅。我同師傅嘅關係仲親過同屋企人，我希望將居合道發揚光大。我更加想嘅當然係參加唔同比賽，從而令香港嘅居合道受日本官方認可。
K: 我就希望係青出於藍勝於藍，我要努力鑽研唔同花式，希望挑戰技術嘅極限。
後記：眼見兩位年輕人已經搵到自己咁鍾意嘅興趣好替佢地高興，亦樂見居合道係佢地身上帶來嘅轉變。Ken 同 Sparky 分享居合道男女學員都有，有興趣嘅讀者可以瀏覽 「SeigiKai 誠毅會 – 全日本戶山流居合道連盟 同 誠斬會 香港支部」Facebook 專頁或 Instagram “seigikai_hk” 了解更多。
有故事的人 Story Teller | Kenry Lee 