前言：前排係 Facebook 見到名為「港版浪浪別哭」貓喵堡嘅介紹，呢到係好多流浪貓嘅暫託地方，希望遇到唔同有心領養嘅人帶貓貓返屋企。親自到訪後邀請左 Winter 同我地分享多啲佢同貓貓嘅故事。
1. 點解一開始會有概念開設呢個「流浪貓暫託平台」嘅貓 cafe 呢？
我自己係愛貓之人，剛好有意創業，我就想做啲自己鍾意嘅嘢。本身我同屋企人都有餵開流浪貓，有時我地見到啲貓仔都唔忍心唔救，所以以前都會將係街遇到嘅貓仔俾義工或有心嘅朋友。
我而家創業，就有機會可以將兩個概念融合，同獨立義工們合作，當義工們救到流浪貓，同佢地清潔好後，就會寄放係我地到，然後再等待有心嘅領養者。
2. 營業左一年多啲，暫時遇過最難忘嘅故事係？
曾經有義工係元朗救到一胎三隻小貓，有一家四口本身已經有養三隻貓，原本只係打算領養一隻。家長對於再養一隻表示同意，但要小朋友承擔照顧嘅責任。呢家人黎嚟左幾次同貓咪們相處，最後唔忍心拆散呢三隻貓全部領養曬，佢哋好好彩，遇到好嘅屋企，亦可以同本身嘅貓相處到。
另一個故事係有一家人原意想領養兩隻幼貓，後來再有一隻貓媽媽同貓仔嚟左，好多時成貓都難啲入屋，好在呢家人同呢兩隻貓好合眼緣，係十日內探訪左幾次後就領養左。
3. 你地同台灣《浪浪別哭》定位上有無唔同？
我覺得我地理念大致一樣，其中一個分別係浪浪別哭係收留流浪貓同狗，而我地就只有流浪貓。營運上我地都有一樣分別的，浪浪別哭嘅貓狗都有個時限，例如佢哋一直係台北店都無人領養，就會去台中同台南店嘗試下，但我地希望會照顧所有貓直至佢哋被領養。
其實好多人都會義無反顧咁照顧流浪動物，但唔係個個都可以持續咁做，始終長貧難顧，所以我希望貓喵堡以自負盈虧嘅形式，將賺到嘅錢照顧有需要嘅貓貓。我期望集合唔同平台加唔同人嘅努力，令啲貓曝光率多啲，亦希望可以幫輕下貓義工嘅工作。
4. 你呢到嘅貓咪來自唔同地方，亦各自有自己嘅故事，怕唔怕小朋友唔識同佢哋相處？
其實有啲貓 cafe 唔俾小朋友進場，但我地覺得呢個其實係一個好好俾小朋友學習嘅機會，我地希望家長係陪住小朋友一齊同貓咪相處，小朋友由細個開始學習，點樣同其他生物相處。
5. 你選擇主人嘅時候有無咩特別條件？
除左一般基本條件例如裝窗網，當然我希望搵到願意照顧貓咪一生一世嘅主人。我都會留意究竟個家庭肯唔肯為左領養而係屋企作出改變，例如曾經有一個爸爸屋企有好多模型玩具，為左領養貓咪，佢願意調整，將啲玩具入盒。
6. 透過貓喵堡希望可以達到咩目標？
我覺得如果香港有多啲類似嘅平台唔係壞事，因為每個 party 都有自己嘅角色。
我希望可以幫手推廣領養嘅風氣。其實近年香港已經好左，例如大家都會提倡領養代替購買，連鎖寵物店亦開始停售寵物，呢啲都係一個好開始，我希望可以盡自己能力幫手。
後記：近年樂見香港同台灣等地提倡「領養代替購買」，但偶爾仲係網上見到有不負責任嘅人棄養或者好多人係街邊遇到初出生小貓嘅情況。開業一年已經幫左 24 隻貓入屋，希望 Winter 呢個平台可以幫到更多貓咪入屋，令更多人成為全職貓奴（嘿）。
有興趣嘅讀者可以 search and like Meowcastlehk 貓喵堡 Facebook page，有意到訪嘅可以透過 Whatsapp 6251 2147 訂位。
延伸閱讀 (關於浪浪別哭):
延伸閱讀 (貓義工 May 姐的故事)
有故事的人 Story Teller | Kenry Lee 