前言：停課期間一次同舊生 Rose 行山，被佢為我拍攝嘅菲林相吸引住，心思思想加入菲林行列，剛好讀地理嘅舊生同大妹不若而同都向我提及「GRM (中大地理系)有個人最近開左間賣菲林相機嘅舖頭」，於是我去一探究竟，亦搵左創辦人之一 Richin 分享。
1. 你係幾時同菲林機產生緣分呢？
其實我係大概一年前先開始接觸，以前我都係用電話影相多，係一個對於菲林相機嘅好奇心令我開始，因為我覺得菲林相機好mechanical，所以想研究多啲。呢一年內我試左好多唔同種類嘅菲林，呈現到唔同感覺嘅作品，係大學甘肅考察返來後見到啲相就更加鍾意。
成件事我係無師自通，自己去探索同認識不同相機同菲林。
2. 點解對菲林相咁情有獨鍾？
一切都係感覺。
我個人係幾感覺行先的，我覺得數碼相有時味精太多，同埋無咩 feel。
菲林相呈現一種好 raw 嘅感覺，相片嘅顆粒令啲相好有質感。
我覺得影菲林相好多時都係 “What you see is what you get”，唔會話影完出來執好曬好似好唔真實咁，菲林係展示景象嘅真面目。
同數碼相唔同，我地影菲林因為無得即時睇結果，每次影相都諗過度過，例如研究下構圖。
我覺得我可以用菲林相嘅方式記錄住我見到嘅香港。
我自己每卷菲林都有一個主題，例如一卷集中影人像，一卷主力影招牌，我希望可以好好運動每卷菲林嘅特性。
3. 點解會創辦一捲？同其他同類店鋪定位有無唔同？
可以先講下點解會選山道呢個鋪位。呢個地方以前係一間畫室，我地另一位創辦人 Celia 以前係到學畫畫，剛好畫室打算搵人頂讓，然後 Celia 就提議呢個地方，我一見到店鋪外面就已經好鍾意，所以決定選呢個地方，而我地就將其中一間房繼續租俾畫室老師教畫畫。
K: 作為一個新界人，你開始營運一捲後有對西環呢個社區改觀嗎？
我好感受到呢個社區嘅 bonding，係一個充滿歷史同情嘅地方，而且西環唔會全部充斥住連鎖店，有好多獨特小店。
我希望一捲可以營造一個菲林相愛好者嘅 community，大家有交流有互動，分享大家對菲林嘅熱愛。
至於點解我想同朋友一齊開一捲呢，既然我咁鍾意菲林相，又剛好有人支持，趁年輕我想試多啲。既有創業意念，又搵到合適舖位，就去馬！
4. 點解選擇係疫情期間創業？
疫情下好多店鋪生意都變差，但我地覺得有危亦有機，例如因為停課我地轉做網上課堂，變相呢段期間彈性大啲，可以多啲時間處理舖頭嘅事。
K: 係呢段期間創業有無猶豫？
都有的，例如會驚我地 handle 唔到，做生意又需要好多學問，好在我地幾個創辦人都分曬工，各有所長。同埋我自己覺得諗到就要去做，要坐言起行，唔等得。
我地呢班中同都唔係每個人有玩開菲林，大家一齊去學。
5. 創立一捲嘅目標係？
最希望菲林呢個興趣可以傳承落去。有啲人會話影菲林相唔環保，因為又要用藥水，亦會有好多垃圾，所以放棄影菲林。香港其實都唔少人有影菲林，希望一捲可以建立到一個 community，亦可以保存到唔同中古機俾菲林愛好者。
後記：訪問後見到隔離舖頭兩隻貓出來行，養貓嘅女士話「丫而家又興返菲林，幾好丫，以前都好流行菲林相機㗎」。訪問出街當日我已經沖曬左第一卷菲林，效果唔錯。影菲林相其中一個樂趣就係等待製成品，我會繼續探索影菲林相嘅樂趣。
幾位年輕人為興趣一齊奮鬥，將自己所愛分享俾其他人，以菲林相機將故事影低，以菲林說故事。有興趣了解更多嘅讀者可以瀏覽 “YatGyun一捲 菲林相機店” Facebook page或 Instagram “yatgyun”。想親自了解更多，當然要去西環山道同幾位傾下計啦！
地址：Shop 2A, Sik On House, 66 Hill Road Sai Ying Poon, Hong Kong
#analog #photography #菲林有毒 #菲林
有故事的人 Story Teller | Kenry Lee 