前言：唔知大家對於「死亡」有咩印象？恐佈？驚？唔想面對？死亡呢個概念感覺係好多人嘅禁忌，今次邀請到中文大學教授《與哀傷共存》嘅 Wallace 同我地一齊講生死教育。
1. 可以分享一下點解你會專做同死亡有關嘅研究嗎？
其實我由大學讀書時候已經對呢個議題好有興趣，由讀書到實習，到博士研究同工作一直都係主力專注呢個課題，例如我大學實習係接觸末期病患病人。
我會開始呢方面嘅研究係同我親人嘅離開有關。我覺得 20 歲前嘅我諗多啲關於愛嘅想法，20 歲後諗多啲同死亡相關嘅嘢。親人嘅離開對我好大衝擊，自己經歷過一啲情緒，我想貢獻返，所以就主力研究死亡。
人生有不同經歷塑造今日嘅自己，我覺得親人嘅離開令我搵到自己嘅方向。
點解會開辦《與哀傷共存》呢個課程呢？其實好少人會特登提起呢啲概念，但我想多啲人可以明白死亡與哀傷，唔好等到最痛個陣先來認識。
不過，幾早認識都好，認識左我地都係會感受到痛，只係我地可以無咁驚慌失措，無咁迷失方向。
2. 香港人對「死亡」的觀念開放嗎？
我覺得而家越來越多人會討論呢個議題。呢個議題本質沉重，但近年比較多不同 projects 去展示，例如電影或者展覽。
死亡嘅重量好多時都令人唔想討論，或者表面多人講左，但去到內心深處嘅想法仍然係好多人嘅禁忌。
以器官捐贈為例，其實好多人都明白背後嘅意義，但總係有好多屋企人唔想捐贈，點解呢？我覺得器官捐贈好多時只係強調捐贈有咩好，但無咩聚焦係死亡所帶來嘅情緒，而正正係因為無回應呢個部份，呢個計劃唔夠成功。死亡應該要有不同層面嘅討論，有時輕鬆啲，有時認真。
3. 一般人對「死亡」感覺負面？你有咩看法？如果要用一隻顏色形容死亡會係咩色？
我會揀藍色。我覺得藍有一個光譜，由淺藍到深藍，而深藍可以近乎黑色。我本身好鍾意天藍色，但亦覺得呢隻藍可以變到好黯淡。
關於死亡呢個概念我地唔可以只係強調某方面，例如話可以珍惜生命，當然我地可以提醒自己要珍惜生命，但的確死亡會令我地覺得痛，會唔開心。我地要擁抱全部嘅感覺，開心與唔開心嘅感覺都要，有笑有淚，同我地人生一樣。
4. 生死教育嘅重要性係？
死亡係不能避免 (inevitable)的，我地可以早啲認識，當我地遇到身邊人離開嘅時候可以接受自己多啲。
生死教育又可以令一個人立刻有改變。既然生命短暫，一個人可能會從新排序，會係做決定上有改變。
K: 你覺得有無話咩時候比較適合做呢？會唔會話太細個未明白呢？
我地成日都會話 “It is never too young to know about life and death”。
就算係小朋友，我地都可以由唔同層面教育，例如植物/寵物死亡，呢啲都係一啲機會談及死亡，當然如果一個人大個啲係可以明白同分享多啲。
但我地都要記住，雖然小朋友未必明白曬，佢哋都會觀察到有咩唔同左，都有感受。
做生死教育，內容同份量我地都可以調教，同埋係一個不斷需要 re-new 嘅過程，唔係講一次就明曬。
5. 除左以上提及你想俾同學們及早認識關於生死，你希望透過大學課堂同論文達到咩目標？
我覺得如我個課程一樣《Living with grief 與哀傷共存》，希望大家可以接受生活入面嘅負面情緒。我地有時候可能要面對苦難，呢個係生命嘅一部分，我地對死亡嘅接納係對生命嘅肯定，了解佢嘅意義。
6. 頭先提到，好多年輕人其實已經要面對親人離世，對於年輕讀者有咩說話想分享？
我覺得如果大家因為親人離世而有情緒，呢個十分正常，亦係一個 starting point 俾我地認識更多。大家唔需要太驚慌失措，要將感受分享俾可信同合適嘅成年人，例如係老師或者社工。有時候屋企人都未必係最合適分享嘅對象，因為可能佢哋都有情緒。你需要搵一個有空間明白你，可以分享同討論嘅成年人。
近年傳媒有好多 projects 都同生死教育有關，其實多啲途徑俾大家了解更多。
我覺得年輕人要搵下佢生命嘅意義係咩，係一個夢想？定係有一啲佢好愛嘅人，如果一個人對生命有期待，當遇到苦難嘅時候會容易啲克服到。當大家明白苦難係生命嘅一部分，苦難只係人生嘅一部分，你仍然要去尋找你對人生嘅期盼，訓練自己應對不同情緒嘅能力。
後記：一開始想搵 Wallace 係因為我覺得學校接觸過好多年輕人都需要面對親人嘅離世，而好多時我地都未必有好好認識同處理自己嘅情緒⋯曾經猶豫好唔好搵 Wallace ，因為我怕接觸「禁忌」話題或會令讀者有不同負面情緒，訪問開首同 Wallace 分享呢個想法，佢話好多時只要係真誠分享，接收者大多能夠接受並進行反思，可以坦承面對自己嘅情緒，最後釋懷並 move on，所以借呢個機會俾大家認識生與死。如果同學們睇完今次嘅訪問有一啲想法/情緒，記得要同我分享。
延伸閱讀及活動：
的確，如 Wallace 所講，近年多左同死亡有關嘅 projects，以下介紹兩首同死亡有關嘅流行曲，前者歌詞非常有意思，後者 MV 拍攝用心，以第一身角度模擬遺體被處理時嘅過程，推介俾大家。
(1) 蔡健雅 — 遺書
(2) 張惠妹 — 身後
另外，位於何文田嘅賽馬會「生命·歷情體驗館」係一個有意思嘅展覽，到訪者可以經歷生命不同階段，包括身後事，有興趣嘅讀者可以去參觀。
有故事的人 Story Teller | Kenry Lee 