前言：相信各位八九十後讀者都有經歷過「抽 YES card」年代，對「膠卡」或「夜光卡」呢啲名唔會陌生。後期出現嘅寵物小精靈卡、遊戲王、召喚王卡等等，掀起過一陣陣熱潮。而家小朋友抽嘅卡可能大家已經唔認識，甚至發展到有網上 e 卡。係白田村嘅花の藝就由八十年代嘅明星卡到現今流行嘅遊戲卡都有，今次搵左蕭太分享佢嘅故事。
1. 可以介紹下你嘅背景嗎？點解鋪頭叫花の藝嘅？
我賣左卡三十幾年啦，一直都係白田呢到。鋪頭叫花の藝係因為一開始我係整壓花手作的，但因為賺得唔多錢，尤其係以前嘅香港，所以就轉型賣卡。
我由第一代 Yes Card 已經開始賣，當年好似係 1990 年，係明星相興起年代，之後開始少啲人買我就轉賣卡通人物卡。
2. 賣卡嘅生意有咩轉變呢？
Yes card 好多人都扭過，可能而家啲人都唔知轉左兩蚊一張了。
而家啲人多數嚟搵舊嘢，主要係以前嗰啲明星卡。以前啲人會買香港明星，而家就多啲搵韓星，不過整體都少左人買，因為個個都可以自己上網下載。
K: 而家會唔會生意好難做呢？
睇你追求啲咩，我而家就已經過左搵錢嘅階段。而家係香港做生意要俾租，又要俾人工，係難啲。不過而家香港社會整體富裕啲，都會多啲人肯花錢買呢啲奢侈品。
K: 而家啲小朋友係咪好多爸爸媽咪都俾好多零用錢買玩具呢？
都係一啲啲。有啲係深水埗住個啲小朋友都係無咩錢，嚟到都未必捨得買嘢，但有啲當然好有錢成盒卡咁買啦。
3. 你係白田賣左咁耐卡，有無觀察到呢個商場嘅變化呢？
好多啦當然，基本上見證住歷史嘅得我地呢到三間賣卡、賣漫畫同賣眼鏡嘅老舖，其他都係補習社同食店。
我唔想話講到好似好偉大咁，但無咩錢賺但我都仍然堅持做花の藝係因為我可以盡少少能力帶動社會，令呢個商場有啲唔同。
4. 係到賣卡三十幾年，有無咩難忘回憶？
試過有次有一個人嚟買遊戲王嘅卡，一口氣買左兩萬蚊。
又試過有一個足球港隊嘅成員結婚當日帶埋老婆嚟同我影相，因為呢到係佢好多回憶嘅地方。
而家多數幫襯嘅多數係熟客，亦偶爾有人想試下搵舊嘢。
5. 蕭太你呢到有無鎮店之寶呢？
賣左啦！（下？）
係兩張陳慧琳同周慧敏嘅金卡，個時唔知價，千幾蚊賣左啦。
後記：當日蕭太見我咁好奇問，一開始仲以為我係信和嘅人去做市場調查，後來知道我用意好熱心分享。以前都有扭 yes card 嘅我見到蕭太嘅珍藏好興奮，立刻好多回憶。訪問過程見到蕭太同小朋友及年輕人嘅互動，我好感受到，呢間小店，承載住好多人嘅回憶。
有興趣嘅讀者可以去白田購物中心嘅花の藝尋下寶，或者你會有意外驚喜。
有故事的人 Story Teller | Kenry Lee 