#75 祥仔 | 小薯RN 醫護人員

前言：疫情已經維持左超過半年，當大家仍然每日提心吊膽嘅時候，最擔憂嘅莫過於係前線嘅醫護人員，尤其係俗稱 dirty team 嘅醫護團隊。今次邀請左係 dirty team 工作嘅祥仔同我地分享。

1. 可以介紹下咩係 dirty team 嗎？例如工作性質係點？

Dirty team 係專門照顧新冠肺炎病人而成立嘅團隊，成員主要係醫生同護士，當然仲有清潔姐姐同健康服務助理。

係新冠肺炎第一同第二波嘅時候，我地主要係負責照顧一啲確診病例，同埋一啲疑似案例。至於而家第三波，因為太多確診病例，所以主力照顧呢啲病人，我地要係隔離病房工作，亦有部份成員去亞洲博覽館同鯉魚門渡假村幫手照顧病人，佢哋全部都係醫管局嘅醫護人員。

2. 點解你會主動要求入 dirty team？中間有無好大掙扎？

當然有好大掙扎，主要都係考慮到屋企人，怕會傳染到佢哋，所以我都好多時去左住酒店。

點解我會主動提出呢？好多人會諗係咪搏升職或者有咩好處，其實只係單純想幫有需要嘅病人同香港嘅醫療體系，因為真係好多人都會好驚要入 dirty team。我記得 SARS 個陣我仲讀緊小學，個時已經覺得醫護人員好偉大，我希望自己都可以盡一分力。

講到底，都係自己想做醫護嘅初心，就係想盡自己能力去幫助病人。

3. 身邊人對於你入 dirty team 有咩反應？

有啲朋友都擔心我的，我自己都唔夠膽見佢哋，所以除非有啲好重要嘅嘢，否則我都儘量避見。

屋企人我都唔敢見，除左住酒店，係屋企都唔會同檯食飯，因為都怕有機會係無徵兆中招，唔想傳染俾屋企人。

4. 係dirty team工作最大個難關係？

我諗係裝備問題，資源始終唔多，但同時我地唔可以唔理啲病人。

一開始大家都唔熟嘅時候，成日都步步為營，所以感染控制好需要我地嘅努力，同埋好講團隊合作同默契，因為成個 dirty team 嘅成員來自五湖四海，大家一齊付出。

5. 疫情過後最希望做嘅係？

梗係想去旅行啦，同埋都想約返啲朋友，因為疫情期間限聚令搞到好多聚會都取消左。

最後想講嘅係希望香港好返，香港人要加油，會有曙光㗎，只要大家努力做好防疫功夫，大家互相體諒，明白同幫助，難關好快就過㗎啦。

後記：本來想相約祥仔見面傾談，但原來我邀請佢做訪問之時，佢又再準備入 dirty team 打仗，所以今次訪問都係用 whatsapp 訪問。當聽到祥仔係錄音話「大家一齊努力，難關會過個下」我起雞皮，因為香港人係過去一年實在經歷得太多。希望祥仔同一眾醫護人員身體健康，一切順利。