前言：好多人都會係屋企整下蛋糕曲奇，唔知大家嘅啟蒙老師係邊個呢？係家政老師？定係媽咪傳授家傳秘方呢？之前係兩位朋友嘅結婚派對食過 Vincy 整嘅蛋糕，今次邀請佢分享下點樣由興趣發展為自己嘅副業。
1. 你係幾時發現自己咁鍾意焗嘢呢？呢件事帶俾你最大滿足感係？
由高中開始的，我覺得由零到有一件滿意既製成品會好有成功感，而且整咗之後可以請人食，share 嘅感覺好開心。
最大嘅滿足感都真係IG shop賣蛋糕出去，當有客人欣賞，同埋send啲靚相俾我，我就已經好開心，
而且有蛋糕嘅時間通常都係開心/慶祝嘅moment，可以參與喺客人一啲開心嘅時刻，例如結婚、BB滿月、60歲大壽，成個感覺好溫馨。
2. 點解會設立 IG shop？點樣兼顧正職同副業？有冇考慮過全職做baking生意呢？
一開始純粹諗住share自己整嘅甜品，估唔到會有人inbox想買蛋糕，朋友又有介紹，慢慢開始就有一啲熟客。
我畢業後半年先返正職，係嗰半年期間，我幫人補習同埋整專注我嘅蛋糕生意，所以唔算同正職好有拉扯，去到依家有正職，我就只可以接熟客同埋假日/假期訂單。
坦白講，如果得自己一個人，全職整蛋糕會好辛苦。既要同客人溝通，又要買材料，設計同埋製作，交收等等，而且花嘅時間同賺到嘅金錢會嚴重不對等，同埋始終唔係成日都有蛋糕訂單，收入都唔算穩定，所以一個人的話就未必考慮全職了。
3. 整造型蛋糕最難嘅地方係？暫時整過最耐嘅蛋糕係幾耐？
客製化嘅蛋糕最困難係要符合客人嘅要求，我哋會盡量符合客人嘅要求。但始終DIY好難做到同張相一式一樣/要蛋糕一樣嘅顏色，所以都要同客人溝通好，大家都明白先得。
每次整蛋糕都要預備好耐，由買材料開始（仲要唔可以一個地方買晒所有材料），到真係整，裝飾同埋洗碗，每一個蛋糕都有血有淚㗎。
最耐既蛋糕整約10個鐘，係兩個人同步一齊整嘅時間，當然個陣亦因為自己唔熟手。整呢啲蛋糕好似做手工咁，而我自己又鍾意做手工，所以我唔覺得好辛苦。其實而家相對熟手左，整一個蛋糕都要大約4個鐘。
4. 你嘅目標？
我嘅目標係正職以外仍然可以weekend有精神整蛋糕。
5. 對有意以分享美食作創業意念嘅讀者有咩分享？
有興趣嘅讀者可以先去蛋糕店返下part time，睇吓自己係咪真係有興趣，同埋熟習下成日匿埋喺廚房嘅生活。要做生意的話仲要update宜家網店市場，因為應該競爭都好大，好多人喺網上面賣蛋糕。
後記：如果係 Instagram 搜尋，好多網店都有外型精美嘅蛋糕，大家各有特色，有啲可能係賣裝飾，有啲係造型蛋糕。仲記得結婚派對上嘅蛋糕以花為主調，每片花瓣都要人手製作同黏上去，非常考功夫。有創意，整嘢食又叻嘅讀者不妨考慮下創立自己嘅品牌。
有興趣了解更多 Vincy 作品嘅讀者可以瀏覽 Instagram “bakingdiaryy”。
有故事的人 Story Teller | Kenry Lee 