前言：唔知大家有無聽電台嘅習慣呢？以前細個有一陣子聽電台，透過大氣電波，只能夠從聲音想像主持人嘅樣同情緒，靠著一個轉數快嘅頭腦同一把好聲音，點樣可以說故事？今次邀請到商業電台 DJ 歪歪分享佢嘅故事。
1. 可以分享一下你嘅入行經過嗎？
其實我好細個已經「入咗行」，喺我小學嗰陣，我媽日日聽香港電台，嗰陣聽到RTHK2有個兒童節目叫《玩玩星期天》，請啲𡃁仔上去做主持，就叫我去試下，結果得咗，就由小四一路做到大學！後來我差唔多大學畢業，903有個新節目叫《309咤叱》請新DJ，雖然我當時人在美國exchange，但都把握機會錄啲demo交返去，就係咁請咗我。
2. 你作為 DJ 嘅使命/目標係？
我希望大家可以對生活有多啲反思，感受得更加細緻。
我覺得出到社會做嘢，可能因為生活嘅重擔、忙碌嘅工作，我哋好容易變得麻木，好又一日唔好又一日，無論係社會事，抑或自己生活嘅經歷，我哋都開始懶於感受同思考，有時就算好多負能量，都唔知根源係咩，唔知點樣疏導佢。而我就希望成為一個大家生活嘅陪伴者，同大家一齊搵生活嘅節奏，思考下生活。
3. 做DJ 令你最有滿足感嘅係？
令大家更加快樂～嗰種快樂未必係來自我引聽眾笑到肚痛，而係我梳理到佢哋生活唔開心嘅情緒，搵到個出口畀佢哋。例如我試過收集聽眾被人收兵嘅愛情經歷，喺節目讀出嚟，講下我自己嘅睇法，然後再播一個我自己寫嘅愛情廣播劇，咁之後有啲苦戀中嘅聽眾話聽完大家嘅傷心經歷，覺得有啲安慰（子華話齋香港人最鍾意睇人xx），同埋聽完我個劇之後，唔開心嘅情緒搵到出口。
另外我都好榮幸喺香港呢個時勢，做咗差唔多兩年時事節目《歪常社會研究中心》，諷刺社會不正常嘅人同事，幫大家苦中作樂，同埋更加了解社會發生咩事。曾經有個聽眾inbox我話：「我覺得903係間cafe，聽啲嘢輕輕鬆鬆，你點解要講時事？」當時未有大型社會運動，我都覺得好難解釋畀嗰位聽眾聽。但大半年後，佢inbox返我，話終於明白點解要喺903講時事，政治係唔可以逃避。
4. 有無啲係聽眾對呢個職業常見嘅誤解？事實又係點嘅呢？
有啲聽眾以為靠把口搵食好容易囉，開咪吹下水又一日，但老老實實，每個人吹水你都想聽咩？葉劉喺收音機吹水你聽唔聽？我覺得魅力加努力，先吸引到人聽囉。
就算係好資深嘅DJ前輩，開咪之前都會做足準備，先至會喺節目同大家分享，而新人更加要畀心機寫稿同搵料，另一方面，要盡力令自己生活更加豐富，識多啲嘢，咁個節目先會好聽。
例如早霸王節目環節「識貨之人」係要試食好新奇嘅食物，咁每個禮拜我都用唔少時間行超市睇下有咩新貨，仲要搵有關嗰款食物嘅得意嘢；又例如環節「霸王KOL」，要搵啲日常生活中我哋習以為常，但冇人知道確實起源嘅嘢，就好似「點解女巫成日揸住掃把」、「點解London Bridge is falling down咁嘅慘劇，會變咗首兒歌」，希望聽眾聽完會開到眼界。
5. 你覺得一個好嘅 DJ 有咩條件？
正如我頭先所講，我希望大家對生活多啲反思，同埋得到快樂，咁我覺得個DJ應該要對生活有態度有要求，同埋係樂意同大家分享自己睇法。第二就係應該聽多啲歌，有自己品味，始終DJ係要播歌，有時一首歌嘅力量係比起你講一萬句嘅力量更加大。而要做到以上嘅嘢，相信要好勤力，係每一行想做得好嘅前提～
6. 你曾經分享做 DJ 係幫助你達成更大嘅夢想，可以分享係咩嘛？
又唔好話邊個大邊個細，我想寫小說出書、 編劇、填歌詞，我其實好鍾意文字創作，有一份份完整嘅創作成品，個感覺好正～
7. 如果年輕讀者對 DJ 呢個職業有興趣可以點樣裝備自己？
過好自己嘅生活，用任何方法分享畀其他人知！
後記：對歪歪一開始有印象係透過 Instagram，當時大妹提及有個幾好笑嘅 DJ，然後我發現好多朋友都有 follow 歪歪。希望今次有俾讀者們了解更多唱片騎師嘅工作。有興趣 follow 歪歪嘅讀者可以 search and like Instagram “903yywong” 或 Facebook “YY Wong 歪歪王” 。
有故事的人 Story Teller | Kenry Lee 