前言：唔知大家對以前有過山車嘅西九龍中心仲有無印象？係五樓蘋果商場範圍有間鋪叫奇趣坊，賣好多手工藝材料，由一個玻璃瓶到保鮮花都有。前排因為準備媽咪退休同生日所以去左幫襯，細心觀察發現奇趣坊好多寶物，雲姐講左句「呢到係追女仔勝地」，於是我決定邀請雲姐分享佢同奇趣坊嘅故事。
1. 可以介紹一下奇趣坊嘅背景嘛？
我 2007 年就開始做奇趣坊，一開始係賣手製賀卡起家。當時選擇做卡係因為比較冷門，個陣啲人好興用係特別日子用電子卡 / SMS 祝賀，反而個陣開始有人搵卡，所以就以此起家。後來望住市場趨勢，我地轉型，開始賣其他手作材料，慢慢累積不同產品。
我個女小四個陣我開奇趣坊，而家佢都大學就畢業，佢做手工好有天份，佢而家係日本讀書，都會上唔同手工藝課程，同埋我地好多日本進口材料。
2. 奇趣坊賣咁多唔同產品，係咪全部都係你本身識嘅呢？
梗係唔係啦。就算賀卡都係由零開始，要研究點剪，點樣割張紙。
除左我自己嘅想法，有時年輕人同我交流又會刺激我嘅思維，例如佢哋會分享想點樣整一樣禮物，點樣將唔同材料配搭，呢啲都令我諗到好多新嘢。
呢行好多學問㗎，所以都唔係太多人入行，而且做生意成本算高，因為一雙手你一日整到幾多呢？
不過呢樣都係手作個特點，有時啲客見到我地啲產品得返一件以為賣剩，其實係獨一無二，手造係無可能兩件貨品整到一模一樣。
所以我一開始創業唔算係因為好鍾意同好叻，但越做越鍾意。
3. 你營運左奇趣坊超過十年，有咩有趣嘅故事呢？
呢到好多故事㗎，好多人嚟到見到面色已經知咩事，真係好似醫生咁，因應不同情況解決問題。有啲情侶反反覆覆，但最後都結到婚；有求婚成功嘅男仔第二日會好開心同我分享；最搞笑分手又話有分手禮物。做得耐左，其中一個觀察就係好多情侶年初一同情人節分手。唔少客人都同我傾計做左朋友，就係傾談嘅過程我知道佢哋有咩問題，再對症下藥。
4. 你認為奇趣坊最殺食嘅地方係咩呢？
我點解話呢到係「追女仔勝地」，因為不同目的嘅客人我都可以滿足到。你無咩主意的話，我會問你多啲問題了解更多；有主意但唔識整禮物的話，我地又會一步一步教你，又會同你講點樣準備驚喜，我地呢到好多寶物㗎。
5. 你頭先提及呢到以前有開班，點解而家暫時停辦嘅？
以前我地呢到有兼職幫手，又會同社區中心合作，我地呢到都有開班，但自從社會運動就停左，加埋疫情更加唔敢要咁多人聚集。我地而家生意真係主要靠熟客幫手，好在每逢週末生意都仍然幾好。
6. 你可以同讀者分享下點解要做手作嗎？
我覺得係在乎對方嘅表現，不論係情人，朋友或家人，手作都會留低一份難忘回憶，而呢份手作亦係獨一無二的。
禮物無分貴賤，最重要係適合個場景，例如你㨂嘅花背後嘅花語符合情境嗎？
我覺得一段關係唔係得把口話我好掛住你，雙方都要付出同努力，就算對方整得唔夠靚都好，都係屬於你地兩個嘅回憶，感情係需要維繫的。以前開班嘅時候試過情侶一齊嚟，有時可能男仔唔係咁叻，但個過程同回憶都好重要，所以我一直堅持開班。
後記：或者係我自己都鍾意爲身邊人花心思同整手作，所以對雲姐分享嘅故事同理念都好認同。雲姐分享曾經考慮過搬去 D2 place，但考慮到深水埗街坊咁多年嘅感情，最後佢都係決定留返係西九龍中心。想準備禮物俾摯愛？千萬唔好錯過奇趣坊。有興趣嘅讀者可以 search and like instagram “hwwong0708” 了解更多，或者親臨奇趣坊搵雲姐傾下
地址：深水埗西九龍中心五樓蘋果商場第一條巷
有故事的人 Story Teller | Kenry Lee 