前言：我嘅大學師妹西瓜，作為文科生，畢業後投身法律界，再輾轉讀完言語治療碩士，仲曾經飛去非洲做義務工作。究竟一個無理科底子嘅人點解會有咁嘅轉變呢？今次請西瓜分享佢嘅故事。
1. 可以分享一下點解由地理跳到法律界再轉到言語治療嗎？係夢想？定係其他原因？
其實一開始畢業我係希望搵 event management 有關嘅工作，但搵左一陣都未有工，剛好我嘅一位師弟問我有無興趣去律師樓做嘢，我第一次係拒絕的，但後來急住搵工賺錢，所以決定試下，就係咁誤打誤撞開始咗3年法律助理嘅生涯，但心底我知道呢份唔係我嘅 life long job。
後來因為留意到朋友嘅仔仔有自閉症嘅徵狀，所以想了解自閉症多少少，就係網上睇咗唔同資料，仲去咗一間自閉症兒童發展中心做義工，認識到唔同治療對自閉症兒童嘅幫助，因為眼見言語治療師可以幫到自閉症兒童改善溝通問題，就對言語治療抱更大興趣。
為咗確認自己係咪真係想做言語治療師，我有讀過有關認識言語治療嘅基本課程，確認係自己鍾意嘅工作後就去報讀言語治療碩士。前前後後用咗三年時間去尋覓到底自己最想做啲乜，雖然時間唔短，但搵到自己想透過言語治療去幫人呢個目標好值得。
2. 文科生嘅你讀言語治療碩士時有唔少障礙，例如係咩呢？點樣成功克服難關呢？
我只有中三 bio 底子，又無語言學同心理學背景，所以真係由 0 開始。加上我讀書期間屋企發生左啲事，我需要好多時間陪住屋企，所以基本上無咩時間休息，仲要實習，非常辛苦。
因為經常休息不足健康受到影響，不斷病倒，去到一個位醫生建議我暫停讀書一陣，但一停就要停一年，無得停一個學期。又試過唔合格要補讀，所以讀呢個課程一啲都唔順利。
而家回望返，我好感恩喺過程中有好多親友支持我鼓勵我，信仰都比咗好大嘅支持我，能夠撐得過真係好唔容易，好感恩從頭到尾自己都無放棄過。
3. 碩士畢業後點解會去左非洲嘅？點解會揀非洲呢？
咁就要講返 GRM (地理與資源管理學系)啦，大學個陣我曾經去過非洲考察，當時對於當地小朋友個種天真爛漫嘅笑容同熱情印象好深刻，所以我想去非洲做義工，照顧有需要嘅當地兒童，分享好嘅嘢同愛俾非洲小朋友。當然咁樣做我無錢啦，但幫到小朋友個份快樂唔係用錢可以量度的。
4. 係非洲最難忘嘅經歷係？
其實有好多難忘經歷。
記得有一次去到一間屋探訪，未入去已經聞到好臭，入到去係非常恐怖，臭氣熏天，一地垃圾，地下有好多昆蟲，天花板好多烏蠅係到飛，當時嘅我有預計環境會差，但無諗過係咁差。女戶主邀請我坐，嗰下真係好掙扎，但我選擇咗坐低係垃圾堆上同佢傾計。係香港長大嘅我好難想像到佢哋困苦嘅境況，但我知道我所見嘅只係冰山一角。
又有一次有個當地嘅精神病患者想殺我。當時我係醫院做緊嘢，呢個當地人見到我中國人樣，驚我會將新冠肺炎傳播，就立刻衝埋來想傷害我。好在有個非洲醫生反應夠快，幫我擋一擋，個當地人仲打個醫生，好彩個醫生無事，只係爛咗隻手錶。因為我聽唔明當地語言，最初都唔知原來個患者係想殺咗我，個醫生後來同我講返先知，真係嚇死。
仲有一個我覺得超級神奇嘅經歷。非洲好少有言語治療師，甚至連高級醫生都無接觸過。有位高級醫生問我佢個女四歲都唔識講嘢有無辦法可以幫。我去咗探佢個女，做咗少少評估同訓練，同父母分享一啲語言刺激嘅技巧。好開心當晚個醫生就傳咗一個錄音俾我話呀女肯跟佢講嘢，係一個好大嘅進步，佢同太太都覺得好鼓舞。當刻真係好開心。
5. 去非洲工作後最深嘅感受係？有無令妳人生觀有所改變？
我覺得係一啲感受同埋觀感上嘅轉變。非洲人感覺上好容易就會開心，都有令我反思點先為之快樂，同埋咩係快樂呢，又例如點樣係有限嘅時間可以過得更有意義呢？
經歷左咁多後，我更加肯定之前放棄律師樓工作係正確嘅選擇。追夢真係唔容易，所以當你努力達到自己目標個下真係好滿足。
我覺得其中一個我嘅轉變係好容易就感恩，好多喺香港我哋覺得理所當然嘅嘢例如有乾淨食水，穩定電力供應，完善醫療，兩性平等，交通便利等等係非洲都唔係必然存在，所以而家更加懂得感恩。
6. 你係勇於追夢嘅人，關於追夢你想講嘅係？
人生只活一次，做最好的自己。
無論夢想有幾大，有幾無可能，有幾困難，都唔代表追夢係無意義同無價值。
追夢對我黎講係敢唔敢開始同堅唔堅持到底。放棄總比堅持容易。堅持唔一定追到夢，但放棄就一定無可能。
即使呢個世界所有人都唔相信你，否定你，但自己一定唔可以放棄自己。
要謹記無人可以否定你追夢嘅權利，唯一否定到自己嘅人只有自己。
仲有有一句我覺得幾有意思：
普通玩家選擇標準配置，高端玩家選擇自定義配置。
有好多人覺得人生應該點點點，例如要努力讀書入大學，畢業後搵份好工，賺錢買樓買車，結婚生仔，儲錢退休。唔跟住社會大眾模式去生活就係異類，追夢就係奢侈，夢想就係不切實際。但到底我嘅人生係由我去過，點解唔可以自我定義？
人生只活一次，做無憾的自己。
後記：曾經係台灣作家 Peter Su 作品見過呢句「夢想這條路踏上了，跪著也要走完」。係西瓜嘅故事見到有時追夢過程未必會咁順暢，可能會有各種難題，但只要你有信念，堅持住，你會去到你嘅目標，可以享受努力得來嘅成果。
延伸閱讀：
有故事的人 story teller #54 Jackie Yung
中文大學醫科學生
有故事的人 Story Teller | Kenry Lee 